Jn 17
17
Jesús dajelaĝalo'te jogaa'me lapaĝaguenataqa
1Mane'e ca'li yem da'me 'yaĝatetac da'me dojo', qama'le Jesús yeloje'ma di'me piyem qama'le enaac: “Am Taĝadena', nayi male jayem novita da'me yaloqo': 'noota qom jayem a'nonaĝachichigue, qaedi nach'e ena'am da'me jayem male am 'ñonaĝachichigui. 2Qa'a naqa'am jo'ne jayem auanem da'me yañoqotaĝanaĝac qaedi ñejaliaĝatelo'te yema ga'me jiyaĝadipi, nataq'aen da'me auanema da'me 'loyaĝac jo'ne ja 'naidena'a yema jogaa'me jo'ne jayem auanema. 3Qama'le nach'eda da'me 'noyaĝac jo'ne ja 'naidena'a chiyaqayi da'me am qoyateton, da'me am onolec Dios jo'ne yataqatelegue, nataq'aen da'me jayem qoyateton, da'me jayem Jesucristo jo'ne jayem anamaĝaquena.
4“Jayem joote am 'ñonaĝachichigui da'me cha'li joue'ta jena'me jenjo' aleua, nataq'aen joote jomat da'me jo'ne jayem auamaĝalo'te. 5Nayi, am Taĝadena', jayem a'nonaĝachichigue da'me am jona'ajop, qaedi yitaĝa jauana da'me jalchi'ena 'yoyaĝac jo'ne onaĝaic da'me am jone'tajop ca'li da'me cha'li jona'li 'uo jenjo' aleua.
6“Jogaa'me adiquiyaqa jo'ne aleua laje', joote jen am yayate'n. Nach'egaua mach'e adalemaĝaje'te, nataq'aen da'me naqa'am jo'ne jayem auanema, qama'le joote yoqocha'alo naa'me at'aqataqa. 7Qama'le nayi yayate'n da'me yema gaa'me jo'ne jayem auanema yataqata am chiyoqodayi; 8qa'a joote ja'aĝatema naa'me 'naqataqa jo'ne jayem auanema, qama'le nach'e ena'am yaconegueta jogaa'me. Nataq'aen da'me yataqachiñe am nomeda'a da'me eja am jachiyaqayi, nataq'aen da'me ja yoqolegue't da'me naqa'am jo'ne jayem anamaĝaquena.
9“Jajelaĝalo'te naa'me naajo' ac'oqo'te, qama'le ja jajelaĝalo'te ga'me ch'e aleua laje'pi, dite gaa'me jo'ne jayem auanema, qa'a nach'egaua jo'ne yataqachiñe adalemaĝaje'te. 10Yema gaa'me yalemaĝaje'te nach'e ena'am adalemaĝaje'te, nataq'aen yema adalemaĝaje'te nach'e ena'am yalemaĝaje'te, qama'le da'me mach'e 'yonaĝac qoyela'a da'me uetauelo jogaa'me.
11“Jayem male ja yitaĝa joue'ta jena'me aleua, da'me cha'li jec qaedi yitaĝa am jona'ajop. Qalaĝaja naa'me naajo' qamqa'me maliaĝa ueteda'ña jena'me aleua. Am Taĝadena' jo'ne ja am 'te 'nalegue, 'noota qom auen netelalo naa'me naajo' ac'oqo'te da'me mach'e adañoqotaĝanaĝac jo'ne am chiyaqayi, nataq'aen da'me joote jayem auanem, qaedi male yataqachiñe auen nalo'ta'ajalo qama'le ena'am da'me am nataq'aen da'me jayem. 12Da'me jayem ca'li cha'li jouetauelo jogaa'me, qama'le je'euoĝonot da'me adañoqotaĝanaĝac jo'ne jayem auanem, qaedi yataqata jetelalo jogaa'me. Qama'le qaya'te ta'le yejomac, dite jo'me jo'ne jalchi'ena taya'a da'me yejomac, qaedi yepaquichigui da'me 'yaĝatetac naa'me nedii's.
13“Nayi male am jec'ata, qalaĝaja ja'aĝatetac da'me dojo' da'me cha'li joue'ta jenjo' aleua, qaedi naa'me naajo' male najaĝayelo da'me namaic jo'ne yataqatelegue da'me jo'ne jayem ue'tajop. 14Joote janema naa'me at'aqataqa, qalaĝaja jenjo' aleua laje'pi niquiya'alo qa'a naa'me naajo' jo'ne jojapegue'to ja 'lachaqa't jena'me jenjo' aleua, qama'le ena'am da'me jayem ja 'yachaqa' jena'me aleua. 15Qalaĝaja ja jiyaĝanaque da'me aue'n queda'e jena'me aleua, dite da'me aueuolo'te, ena'te auaje'tema da'me ja no'en. 16Qama'le ena'am da'me jayem ja 'yachaqa' jena'me aleua, naa'me naajo' nach'e ena'am ja 'lachaqa't jena'me aleua. 17Nataq'aen aviyamaĝatetouelo da'me eja jo'ne am chiyaqayi, nach'edaua daa'me at'aqataqa jo'ne yataqata ejoda. 18Qama'le ena'am da'me jayem anamaĝalo joga'me aleua laje'pi, nayi da'me jayem nach'e ena'am jayem jamaĝalo joga'me ch'e aleua laje'pi. 19Qama'le yajouaĝat naa'me naajo' da'me jayem male ñiyamaĝatela't, qaedi nach'e ena'am niyamaĝatetedoue da'me jo'ne eja.
20“Ja nach'enauate' naa'me naajo' jo'ne ñachoĝodetapelo'te, dite da'me nach'e ena'ama gaa'me jayem p'iida'a qomle domachita da'me jayem 'yaĝatetedac naa'me naajo' ac'oqo'te. 21Am ñachoĝodenot qaedi yemeda naa'me naajo' da'me nach'e eta't nalo'ta't; qama'le ena'am da'me am Taĝadena' jayem oue'tajop qama'le da'me jayem nach'e ena'am am jone'tajop, nataq'aen naa'me naajo' qo'mi ue'tajopa, qaedi joga'me aleua laje'pi ja yoqolegue't da'me naqa'am jo'ne jayem anamaĝaquena. 22Joote janema da'me 'nonaĝac 'me onaĝaic, da'me jo'ne jayem auanem ca'li, qaedi yema nalo'ta't, nach'e ena'am da'me am nataq'aen jayem yataqata qadalo'ta't, 23queda'me jayem male jouetauelo jogaa'me nataq'aen da'me am nach'e eta't jayem oue'tajop, qaedi yataqata nalo'ta't naa'me. Chane'eja qom naq'aeta qama'le yema joga'me aleua laje'pi male nomeda'a da'me jayem anamaĝaquena, nataq'aen da'me adoqopitalo naa'me, nach'e ena'am da'me yataqata jayem adoqopita.
24“Am Taĝadena', naa'me naajo' jo'ne jayem auanema, da'me jayem jetaque nach'e ena'ama jayem ueteda'ajop, ga'me jo'ne jona'ña qomle, qaedi yauata da'me 'yonaĝac, nach'eda jo'ne am chiyaqayi, jouaĝat da'me jalchi'ena jayem adoqopita ca'li cha'li jona'li 'uo jena'me aleua. 25Am Taĝadena' jo'ne am yataqatelegue, joga'me aleua laje'pi ja am 'te yateto'n, qalaĝaja jayem qamqa'me am jateton qama'le naa'me naajo' male yayate'n da'me naqa'am jo'ne jayem anamaĝaquena. 26Chane'eja joote am jatetonaĝanaĝaneque nataq'aen da'me mach'e at'onaĝac nach'e ena'am da'me nach'e eta't da'me jayatenaĝanaĝa'n, qaedi da'me adoqopich'i jo'ne jayem auen ue'tajop nach'e ena'am uetauelo jonaa'me, qama'le nach'ayem da'me jouetauelo.
Currently Selected:
Jn 17: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina