Jn 16
16
1“Ami ja'aĝatema naa'me naajo' uo'oe qaedi ja aĝañiñi da'me adepi'i. 2Qa'a male ami qoyamaĝadegue qomle jogaa'me tamenaĝaiqui', nataq'aen yovida'a qomle da'me 'uo ga'me ami yala't queda'me eetedapega naq'aeta da'me loequenataĝanaĝac joñe'me Dios. 3Jenjo' yauote qa'a ja yateto'n ñe'me Taĝadena' uotaĝa ta'le jayem yateto'n. 4Naq'aeta da'me ami ja'aĝatema, qaedi qom male yovita ga'me laloqo', qama'le auenache'ta da'me jayem joote ami ja'aĝatetapema.
Na'me 'lonatac ñe'me Dios Lepaqal
“Jenjo' jo'ne chiyoqochiñe da'me ja ja'aĝatetac, qa'a jayem maliaĝa ami jouetauelo. 5Qalaĝaja nayi male jec qaedi jona'ajop joñe'me jo'ne jayem namaĝaquena, qama'le da'me ami qaya'te gamachaqaega jayem yenatec ga'me jo'ne jajoyi. 6Nayi lichiguilo naa'me adai'lidi' qa'a ja'aĝatetac da'me dojo' 'uo. 7Qalaĝaja ami ja'aĝatema da'me jo'ne eja: yataqachiñe 'noota da'me jec. Ta'le ja jec, qama'le ñe'me Necochaĝaua ja novitequena qama'le ja ami 'te uetauelo; qalaĝaja qom jec, qama'le ñamaĝaquena. 8Mane'e qom novi', qama'le yayatenaĝanaĝaneque jogaa'me jiyaĝa'u jo'ne aleua laje' da'me eeta jogaa'me lepatenaĝanaĝaco, nataq'aen joga'me chimadichiñe, nataq'aen da'me lec'atenaĝanaĝac joñe'me Dios. 9Qa'a nach'eda da'me mach'e lepatenaĝanaĝac: queda'me ja jayem 'te p'iida'a. 10Nataq'aen nach'ayem jo'ne jayem chimaqategue: qo'che' da'me male jec'ata ñe'me Taĝadena', qama'le ja yitaĝa jayem auañiya jo' qomle. 11Nataq'aen nach'eda da'me lec'atenaĝanaĝac ñe'me Dios: ñe'me jo'ne nejaliaĝatelegue jena'me aleua, joote 'uo da'me ne'uaĝanaguec.
12“Jayem qa'a maliaĝa jalcote daa'me yapaĝaguenataĝanaĝaco laqaya' jo'ne te'me ami janema, qalaĝaja da'me ami maliaĝa ja auaqanachichi ta'le yema da'me auayachiñe. 13Qalaĝaja qom novi' ñe'me Dios Lepaqal jo'ne yataqatelegue, nach'eñe jo'ne ami yauegouelo yema naa'me naajo' jo'ne ejoda, qa'a ja 'yaĝatetac da'me mach'e 'naĝatetapela't, dite da'me 'yaĝatetac yema ga'me jo'ne domachiya, nataq'aen ami yayatenaĝanaĝaneque gaa'me uo'oe jo'ne di'yo't qomle. 14Nach'eñe ñe'me jo'ne yaloĝon da'me mach'e 'yonaĝac, qa'a yaconegueta naa'me jo'ne jayem chiyoqodayi qama'le nach'e ena'am ami yayatenaĝanaĝaneque. 15Yema ga'me loĝot joñe'me Taĝadena', nach'e ena'am mach'e yoĝot, qo'che' ja'aĝatetac ñe'me Dios Lepaqal da'me yaconegueta jogaa'me jo'ne jayem chiyoqodayi, qama'le ami yayatenaĝanaĝaneque joñe'me.
16“Nayi cha'li cada'ac da'me ja jayem 'te auañiya, qalaĝaja ja cop'a da'me yitaĝa jayem auañiya qomle.”
Da'me nachoĝodec 'uo da'me namaic jo'ne chiyaqayi
17Qama'le uo'oe gaa'me lapaĝaguenataqa jo'ne mach'e nenatetapega'ajalo:
—¿Jach'e ga'me yelo'teguet da'me dojo' jo'ne qo'mi 'yaĝatema, da'me cha'li cada'ac da'me male ja jauanaĝa, nataq'aen da'me 'uo ga'me ja cop'a da'me yitaĝa jauanaĝa? ¿Jach'e ga'me eeta yec'ata ga'me neta'ña ñe'me Let'a? 18¿Jach'e ga'me yelo'teguet da'me dojo' jo'ne «cha'li cada'ac»? Ja jayatenaq jach'e jogamaĝa eetapega.
19Qalaĝaja Jesús joote yayaten da'me jetaque 'uo ga'me qoyenatec, qama'le enaac:
—Ami ja'aĝatema da'me jo'ne cha'li cada'ac da'me ja jayem 'te auañiya, qalaĝaja ja cop'a da'me yitaĝa jayem auañiya qomle. ¿Qo'li nach'ena jo'ne auenataĝañetapec da'me ami? 20Eja da'me ami ja'aĝatema: da'me ami cha'li anoyeñitac qomle nataq'aen da'me 'uo da'me adachoĝodequi, qalaĝaja joga'me aleua laje'pi cha'li 'uo da'me lamaic. Da'me ami, te'me 'uo da'me adachoĝodequi, qalaĝaja ja cop'a da'me male neleguemaĝata da'me adamaiqui. 21Qom 'uo jaga'me yauo jo'ne c'oe, male 'uo da'me lemalaqataĝanaĝac q'aen yovita ga'me mach'e laloqo', qalaĝaja qom yem da'me niyiñe ga'me notolec, qama'le ja yitaĝa uenate'ta da'me lachoĝodec, queda'me 'uo da'me lamaic da'me male 'uo ga'me c'oĝot jo'ne niyi'ña jenjo' aleua. 22Qama'le naq'aeta da'me ami, cha'li 'uo da'me adachoĝodequi nayi, qalaĝaja da'me jayem 'ñiyelaq jo' qomle qama'le yitaĝa ami jauanalo, qama'le naa'me adai'lidi' najaĝayelo da'me adamaiqui jo'ne qaya'te ta'le doĝotaĝanec.
23“Qom yovita da'me dojo' qama'le ja yitaĝa jayem auenachetac. Eja da'me ami ja'aĝatema: joñe'me Taĝadena' ami yanema yema ga'me jo'ne auajelaĝañiyec jouaĝat da'me jayem ademii'teguet. 24Chayovida'a nayi da'me ami qaya'te auajelaĝañiyec jouaĝat da'me jayem ademii'teguet, qalaĝaja nayi ami ja'aĝatema da'me dojo': auajelaĝañiyec qama'le auacoñiyeguet, qaedi da'me adamaiqui male nalo'ta't.
Jesucristo joote nomat ñe'me jo'ne nejaliaĝatelegue jena'me aleua
25“Ja'aĝate'tape naa'me naajo' uo'oe nataq'aen da'me uo'oe gaa'me yaloqotenaĝanaĝaiqui'; qalaĝaja yovita jo' qomle ga'me nolo' qom jen di'yoq da'me ja'aĝatetac joñe'me Taĝadena'. 26Qom yovita ga'me nolo' qama'le auajelaĝañiyot jouaĝat da'me jayem ademii'teguet; ja ja'aĝatetac ta'le nach'ayem da'me ñachoĝodenot ñe'me qaedi ami yichoĝoden, 27qa'a nach'eñe ñe'me Taĝadena' jo'ne ami noqopitalo, jouaĝat da'me jayem adoqopichiya, nataq'aen da'me a'uamaqachiñe da'me naqayem jo'ne jachiyoĝogue ñe'me Dios. 28Eja da'me joote jeca'e di'me lejaliaĝa ñe'me Taĝadena' qaedi ñec'ata jenjo' aleua, qama'le nayi jeca'e jenjo' aleua qaedi ji'iyelaĝa joñe'me.”
29Chane'eja enapega't jogaa'me lapaĝaguenataqa:
—Nayi male yataqatelegue da'me a'uaĝatetac, da'me male ja auauo'oe gaa'me ch'e adaloqotenaĝanaĝaco. 30Nayi male jauanaĝa da'me auayaten yema naa'me naajo' uo'oe nataq'aen ja auouetaque ta'le 'uo ga'me ya'uo ga'me lenataĝanaĝac. Chane'eja chiyaqayi da'me dojo' nayi ja'amaqatenaq da'me auachiyaqaje'ma ñe'me Dios.
31Jesús 'yategueta jogaa'me:
—Chane'eja, ¿qo'li male jayem auep'iiya'a? 32Qa'a male jayem novita da'me yaloqo', nataq'aen da'me nach'ena jenjo' nolo' da'me adelagaqai ami onolqa'tape naa'me ayiyapegue'galo, qama'le jayem aueñi onolec. Qalaĝaja ja jayem 'te onolec qa'a ñe'me Taĝadena' jayem ue'tajop. 33Joote ami ja'aĝatema yema daa'me daajo' qaedi ami uetauelo da'me 'nemaĝac da'me adaloi'ta't queda'me jayem ovi'tajop. Ga'me aleua laje'pi ami yachalo'te qomle da'me adachoĝodequi, qalaĝaja 'noota qom a'nañaĝachi qa'a da'me jayem joote ñomat ñe'me jo'ne nejaliaĝatelo'te ga'me aleua laje'pi.
Currently Selected:
Jn 16: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina