YouVersion Logo
Search Icon

Jn 15

15
Uva lichidic jo'ne yataqatelegue
1Yitaĝa enaac ñe'me Jesús:
—Naqayem jo'ne jayem uva lichidic 'me yataqatelegue, qama'le ñe'me Taĝadena' mach'e neteloqo't. 2Nach'eñe yichaĝaye yema jaga'me yepee jo'ne qaga'te jala; qalaĝaja yema jaga'me 'uo jaga'me jala, qama'le yepoloqo't qaedi let'adaic da'me nejalayaĝac. 3Da'me ami joote ami yoqovite', chiyaqayi da'me joote auacoñiyeguet da'me 'yaqataĝanaĝac. 4Nach'e eta't jayem auoqochi'taguet, qama'le nach'e ena'am da'me jayem ami joĝotetaita. Jaga'me lepee jaga'me uva lichidic ja yaqanatet ta'le mach'e ya'uo jala, qom ja yoqote'taguet jaga'me uva lamo, qama'le nach'e ena'am da'me mach'e at'oyaĝaqui: qaya'te anejalayaĝaqui qom ja nach'e eta't adaloi'ta't da'me jayem auoqochiyeguet.
5“Naqayem jo'ne jayem uva lichidic, qama'le da'me ami naqa'ami jo'ne lepeel. Ga'me jo'ne nach'e eta't jayem yoqote'taguet, nataq'aen jayem da'me joqote'taguet joga'me, qama'le jalcote ga'me nejalayaĝac; qalaĝaja qom ja jayem 'te auoqochi'taguet, qama'le qaya'te auaqanachichi. 6Joga'me jo'ne ja nach'e eta't jayem yoqote'taguet, nach'ega jo'ne qoyajaĝa'ya ga'me p'aye qama'le ua'ña da'me daqaqa qama'le ena'ama gaa'me lepeel jaga'me uva lichidic nale qoyapotena't qama'le qoyachedañgui ga'me dole' qaedi yavi'j.
7“Qom nach'e eta't adaloi'ta't da'me jayem auoqochiyeguet, queda'me nach'e eta't ami uetauelo naa'me 'yaqataqa, qama'le gamachaqaega aviyaĝañiyaque ami qoyanema. 8Qom jalcote da'me anejalayaĝaqui qama'le auovidiya'a da'me ami yataqatelo'te yapaĝaguenataqa: nach'eda da'me dojo' jo'ne yaloĝon da'me 'lonaĝac ñe'me Taĝadena'. 9Da'me jayem ami joqopitalo nach'e ena'am ñe'me Taĝadena' da'me jayem noqopita; da'me mach'e yoqopich'i 'noota qom nach'e eta't ami uetauelo. 10Qom auoqochiyalo naa'me yamaĝajoĝonaĝaco, da'me yoqopich'i nach'e eta't ami uetauelo, qama'le ena'am da'me jayem jo'ne joqocha'alo naa'me lamaĝajoĝonaĝaco ñe'me Taĝadena', qama'le nach'e eta't jouetaue da'me mach'e loqopich'i.
11“Naq'aeta da'me ami ja'aĝatema qaedi da'me yamaic male ami uetauelo qama'le da'me mach'e adamaiqui yataqachiñe nalo'ta't. 12Jenjo' mach'e yamaĝajoĝonaĝac jo'ne ami janema nayi: queda'me jalcote da'me ami joqopitalo, 'noota qom nach'e naq'aeta da'me anoqopichiyapega't da'me ami. 13Da'me noqopich'i let'adaic jo'ne qaya'te ena'am, nach'eda da'me dojo': qom 'uo ga'me jiyaĝaua yanegue da'me 'loyaĝac qaedi nec'alaĝatedegue jogaa'me laqaya'olqa. 14Qama'le naqa'ami jo'ne ami yaqaya', qom a'vichi ga'me jo'ne ami jamaĝalo'te. 15Ja yitaĝa ami jiyaĝanaĝaneque da'me ami ñejoĝonaqa, qa'a ga'me ch'e nejoĝonec ja yayaten ga'me mach'e ye'tetac joga'me lejaliaĝanec. Ami jiyaĝanaĝaneque nayi da'me ami yaqaya', qa'a joote ami jayatenaĝanaĝaneque yema da'me jo'ne jayem 'yaĝatem ñe'me Taĝadena'. 16Ja ena'am ta'le jayem adiquiyaqui, dite da'me ami mach'e ami yiquiyaqa, qama'le ami jamaĝalo'te da'me oquiyi qaedi aueñi jalcote da'me anejalayaĝaqui, nach'aga jaga'me anejalai jo'ne ja yitaĝa pal. Qom naq'aeta qama'le ñe'me Taĝadena' ami yanema yema ga'me jo'ne aviyaĝañiyaque, jouaĝat da'me jayem auoqochi'taguet. 17Chane'eja male ami jamaĝalo'te da'me dojo': 'noota qom anoqopichiyapega't.
Ga'me aleua laje'pi niquiyata ñe'me Jesús choqogaa'me lapaĝaguenataqa
18“Qom ga'me aleua laje'pi ami niquiya'alo, qama'le auayachiñe da'me naqayem jo'ne je'uaechiñe da'me jayem niquiyata. 19Ta'le ami ch'e aleua laje', jena'me jiyaĝadipi jo'ne aleua laje'pi ami noqopitalo, qama'le e'n ami ena'ama q'ae'n jogaa'me mach'e laqaya'. Qalaĝaja joote ami yiquiyaqa queda'me joote ami jachiyoĝotauelo joga'me ch'e aleua laje'pi. Chane'eja nach'eda jo'ne chiyaqayi da'me ami niquiya'alo, qa'a male ja ami 'te ch'e aleua laje'. 20Anetoviñetac da'me jo'ne joote ami ja'aĝatema: «Qaya'te namaĝajec ta'le napacalegue joga'me lejaliaĝanec.» Qom naqayem da'me 'uo da'me ñecanaguec, qama'le nach'e ena'am ami 'uo da'me anecanaguequi, nataq'aen qom qoyoqocha'alo naa'me 'yaqataqa qama'le nach'e ena'am qoyoqocha'alo naa'me mach'e at'aqataqadi'. 21Yema jenjo' jo'ne ami qo'yeteque chiyaqayi da'me jayem auoqochi'taguet, qa'a ja qoyateton ñe'me jo'ne jayem namaĝaquena.
22“Jogaa'me te'me qaya'te ta'le laviyaĝajet, da'me ta'le ja ñanaequena da'me jojapegue'to. Qalaĝaja nayi qaya'te nichoĝodenataguec queda'me yajouaĝat jonaa'me mach'e loeco; 23ga'me jo'ne jayem niquiya'a, nach'e ena'am niquiya'a ñe'me Taĝadena'. 24Te'me qaya'te ta'le laviyaĝajet, ta'le ja jauo'oe naa'me jo'ne ja yaqanate't ta'le yauo'oe jogaa'me jiyaĝa'u laqaya'. Qalaĝaja da'me joote yauata jenjo' 'uo, qama'le jayem niquiyata nataq'aen niquiyata ñe'me Taĝadena'. 25Qalaĝaja jena'me jenjo' male 'uo nayi qaedi yepaquichiguilo naa'me nedii's jo'ne joote qoyedidiñe, da'me enaac: «Jayem niquiyata qalaĝaja ja di'yoq ga'me jayem yajouaĝatem.»
26“Qalaĝaja novitequena qomle ñe'me anecochoqo't, ñe'me Dios Lepaqal jo'ne chiyoqo'ot joñe'me Taĝadena', qama'le 'yaĝatetac joñe'me jo'ne yataqatelegue. Ñamaĝaquena qomle qaedi chiyaqaue joñe'me Taĝadena' qama'le jayem 'yaĝatetac. 27Qama'le nach'e ena'am da'me naqa'ami jo'ne ami 'yaqataĝanaĝanaqa, qa'a joote jayem ovi'tajop ca'li da'me jo'ne 'uaechiñe.

Currently Selected:

Jn 15: TSN

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy