2 Co 1
1
Lep'iyenataĝanaĝac ñe'me Pablo
1Jayem Pablo 'me jayem lamaĝajec ñe'me Cristo Jesús, qa'a naq'aeta da'me loequenataĝanaĝac ñe'me Dios. Ami jep'iye'tape nayi, nach'e ena'am ñe'me qadaqaya Timoteo, da'me ami qadaqaya' p'etaqadaiquipi jo'ne Dios lec'oqo'tolqa 'me oñiya'ña di'me Corinto, nataq'aen uoja'aegaua qadaqaya' 'me neda'ña di'me aleua jo'ne Acaya. 2'Noota qom Dios mach'e Qadet'a nataq'aen ñe'me Qadejaliaĝanec Jesucristo ami yanema da'me anichoĝodenataguequi nataq'aen da'me at'emaĝaqui.
Pablo yanem da'me lamaic joñe'me Dios
3'Noota qom 'ñonaĝataĝaye ñe'me Nedios nataq'aen Let'a ñe'me Qadejaliaĝanec Jesucristo, nach'eñe ñe'me Qadet'a jo'ne choĝodenataĝanaĝaic nataq'aen Dios jo'ne 'uo da'me loyaĝanataĝanaĝac. 4Nach'eñe qo'mi loyaĝanate't nale uo'oe ena'uaque qadachoĝodeco, qaedi qo'mi nach'e ena'am jaqanatetaq ta'le qaloyaĝanate'tape jogaa'me jo'ne 'uo da'me lachoĝode'j. 'Uo da'me qadoyaĝanataĝanaĝac qa'a ñe'me Dios qo'mi loyaĝanate'tape ca'li. 5Qa'a naq'aeta da'me lachoĝodeco ca'li ñe'me Cristo qo'mi uetelo'te, qama'le qo'mi jouaqata'ñi' ñe'me queda'me 'uo ga'me qadachoĝodec, nach'e ena'am qo'mi uetelo'te da'me qo'mi qoloyaĝanate'tape 'me chiyaqayi ñe'me Cristo. 6Qom 'uo da'me qadachoĝodec, qama'le naue ami qoloyaĝanate'tape nataq'aen ami qonec'alaĝatedegue. Nataq'aen qom qo'mi loyaĝanate't ñe'me Dios, qama'le nach'e ena'am da'me ami qoloyaĝanate'tape, qaedi auaqanachichi ta'le 'uo da'me at'añaĝaqui da'me anapogaĝadeñiyegueta da'me nach'edaua qadachoĝodeco 'me joote qo'mi ualo'te. 7'Uo da'me qadajoĝonataĝanaĝac jo'ne t'añañe queda'me ami, qa'a naq'aeta da'me qo'mi ovita'ñoto da'me qadachoĝodeco nach'e naq'aeta qo'mi ovi'tajopa da'me male qo'mi qoloyaĝanate't.
8Ami yaqaya'olqa, jepagaqatapega ta'le auayachiñe da'me dojo' queda'me yataqachiñe jalcote qayoĝode' gaa'me qadaqalaico 'me qo'mi ualo'te ca'li jouaqa'a di'me aleua jo'ne Asia. Qanapiyenaguec jo'ne yataqachiñe t'añi jo'ne yamta'le ja qadalo'oguet, nataq'aen chayovida'a ja jenaqatapega qadec'aletaye da'me qolaqa'e di'me aleua. 9Janomaĝaguet da'me ena'am ta'le qo'mi qoyamaĝadoue da'me qadeleuaĝa, qalaĝaja dojo' nach'eda qo'mi yapaĝagueneque da'me qaedi ja mach'e ñip'iyaqala't, dite ñe'me Dios jo'ne 'niyelaĝachijeguem ga'me joote yele'u. 10Qama'le Dios qo'mi nec'alaĝatedegue nataq'aen qo'mi yaiyaĝaneque da'me let'adaic te'me qoyen qadeleuaĝa. Jep'iyaqa queda'me maliaĝa yitaĝa qo'mi nec'alaĝatedegue, 11qom qo'mi alecochiiyalo, da'me qo'mi auajelaĝañilo'te. Ta'le qayoĝode' gaa'me qo'mi dajelaĝalo'te, nataq'aen qayoĝode' gaa'me jo'ne netotedapec ñe'me Dios queda'me male qo'mi yanema da'me liyalaqataĝanaĝac.
Da'me eeta ñe'me Pablo da'me ja dajoyi di'me Corinto
12'Uo da'me chiyaqayi da'me qani'yoĝodenaĝac, nach'eda da'me qadetadenataĝanaĝac qo'mi 'yaĝatema queda'me yataqachiñe ja 'nalegue da'me qadajoĝoc nataq'aen ja jauoqo 'te lale'gue jo'ne ua'ña jena'me aleua, nataq'aen p'ajaye dojo' jo'ne ami joqote'tagueta. Qo'mi ja ñajenaqa'teguet ta'le qo'mi yaue'j da'me ch'e jiyaĝaua layatenaĝanaĝac, dite da'me jep'iyaqa ñe'me Dios da'me 'uo da'me leyalaqataĝanaĝac. 13Jogaa'me qadediijel qaya'te jedaĝañi ta'le yaqa'a ga'me ami auaqanachichi ta'le auec'achiñe nataq'aen auaqanachichi ta'le auayachiñe. Nataq'aen jepaquetapega ta'le yataqachiñe auayachiñe, 14naq'aeta da'me lae jo'ne joote qo'mi auayachiñe', queda'me qom 'niyelaq ñe'me Qadejaliaĝanec Jesús, ami male auanomiyeguet da'me qo'mi avi'yoĝodeñi'tape, nach'e naq'aeta da'me qo'mi janomaĝaguet da'me ami ji'yoĝodenaqa'tape.
15Jep'iyaqa da'me dojo', jayem joote jenatetapega da'me ami jec'atalo qaedi ami jauanalo, qama'le naq'aeta da'me ami jichoĝodeneque da'me dos ami jejapichiyalo. 16Joote jenatetapega da'me 'uaeñe ami jejapichiyalo ca'li ja'ya di'me Macedonia ladic, qama'le ua'edi ta'le 'ñiyelaq, yitaĝa ami jejapichiyalo. Qama'le naq'aeta da'me 'uo ga'me jayem alecochiiya da'me jec'ata di'me Judea. 17¿Jeele ja yataqachiñe jenate'ta da'me dojo' ca'li jetaque ja'uo? Uotaĝa ca'li ja'uo da'me dojo', ¿jeele ja yataqachiñe eja ga'me yelnataĝac? ¿Qo'li auepíchitapega queda'me 'uo ga'me ja'aeñi yelnataĝac ena'am ta'le ja yataĝalegue, qom jenaac “jaja'a” qama'te ua'edi paja'a jenaac “aja'y”? 18Qalaĝaja nach'eñe ñe'me Dios ami yayataĝade'teque da'me qo'mi qaya'te ua'a ta'le ñenaĝataĝaye da'me ami ja'aĝataĝama “jaja'a” qama'te paja'a jenaqaac “aja'y.” 19Qa'a Jesucristo, Lec'oĝot ñe'me Dios, nach'eñe jo'ne qo'yaĝatetac ca'li Silvano choqoñe'me Timoteo nataq'aen jayem jo'ne ami japaĝaguenaqatapeque, ja naqaeda ta'le “jaja'a” qama'te ua'edi paja'a enaac “aja'y.” Dios yanem ñe'me Cristo da'me nach'e eta't eja jo'ne ja yitaĝa yem, 20qa'a nach'eñe ñe'me chiyaqayi da'me yepaquichiguilo ena'uaque ga'me jo'ne joote Dios 'yaĝa'tape jo'ne jetaque yauo'oe. Qo'che' nale 'ñonaĝataĝaye ñe'me Dios, jenaqaac “Jaja'a, nach'e naq'aeta da'me dojo',” chiyoqotelegue ñe'me Cristo Jesús. 21Dios nach'eñe qo'mi 'yañaqate't qaedi ja jaĝanaĝaye ñe'me Cristo, da'me jenaqa'ta nataq'aen ami nataq'aen ja qo'mi 'te 'nalo'te q'ae'n da'me qo'mi yiyota'alo. 22Joote qo'mi 'yaneque jaga'me 'lanaĝanaqate, nataq'aen yanayelo naa'me qadai'li ñe'me Lepaqal 'me ja 'nalegue nach'eda 'nanaĝajet qoyen ga'me jo'ne qo'mi qoyanema qom'te.
23Qalaĝaja qom maliaĝa ja jec'ata di'me Corinto, jo'ne te'me naq'aeta da'me yelnataĝac, jee'tem da'me 'naĝatoqo't ñe'me Dios, nach'edata da'me 'uo da'me ami jetela'ate da'me ja ami 'te jec'atalo. 24Ja naqaeda ta'le ena'am da'me qadoĝot ga'me adepi'i; da'me jo'ne jepagaqatapega nach'eda ami yecochaĝalo qaedi 'uo da'me ami uetauelo da'me adamaiqui, qa'a ami joote adaloyeguet da'me adepi'i.
Currently Selected:
2 Co 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina