Tutulan Tau Israelen 30

Parintana Alatala mamin dapamondokang lo’da’

11Jaji manjarumpi baki’ Musa, “Na, parinta yang kupamondokangen lo’in di aso di’en, kosan jalu badidit. Kosan jalu bajao’ lo’in manyuro’ na’an ikule’ iala. Okan. 12Okan inang di surga manyuro’ lo’in mangatoani, Intain ona’ inaiten itiang mala indor lo’a parintana, yang laloang manjarumangen lo’ka’ mainto’ ilola’anina parintana dinen? 13Okan bapi inang sabala’a jawaan manyuro’ lo’in mangatoani, Intain ona’ manarearen lo’a jawaan itiang mala lo’a parintana, yang laloang manjarumang lo’ka’ mainto’ ilola’anina iki’? 14Na’an kenang. Jaruma i Yahuwe mamin mainso’ jaji lo’in. Andian mamin di baba’in, andian mamin di atenin mainto’ ilola’anina ikin,” ingka kenang.

15“Jaji bele poang ikin. Aso di’en jalu kusorongangen lo’in andian dua baranana. Kusorongang jalu manyuro’ tio’, jalu manyuro’ mandua’ang jalu palin maamen. Kusorongang bea jalu manyuro’ mate, jalu manyuro’ arugi. 16Yang kuasanen jalu manyuro’ tio’ di’en, kole’a ilalam parintaku’ lo’in di aso di’en, kusuro’ lo’in arungkin mangasaang lo’a i Yahuwe, Alatala yang isembaan ikin. Kusuro’ lo’in tio’ malola’ani dalana nanna parintana, ambata paratorana nanna ukuma. Ati’en saja ilola’ani awan dinen daikin ona’ to’ tio’. To’ insang bayu’. Daberkatikin inang di tana’ to’ idintamaien ikin itiang malalako’i. Dapamaamkin kole’a i Yahuwe, Alatala yang isembaan ikin.

17“Sabalika, ati’enkin lempang ilalam atenin, ati’enkin na’an malola’ani panamuna, laloang tatarikkin barik itiang manyemba lo’a jalu bokanen, itiang malola’ani panamuna, inang lalo rugina. 18Manjarumak tapat-tapat lo’in di aso di’en, ati’en awan dinen basanin pastikin ona’ takibar. Na’ankin balaun lalako’en inang di tana’ isualina Yordan yang to’ idintamaien ikin itiang malalako’i.

19“Jaji di aso di’en manjarumak lo’in manyorongang jalu manyuro’ tio’ nanna jalu manyuro’ mate. Kusorongang lo’in jalu manyuro’ mandua’ang berkat nanna jalu manyuro’ dadua’ kutuk. Dadalinga bua jarumku’ kole’a samuana yang lalako’en di surga nanna di duniaan. Ile’i poang ikin jalu manyuro’ tio’en, mainto’ dapatin tio’ rabarik nanna araanakin, 20mainto’ ikasaanga ikin i Yahuwe, Alatala yang isembaan ikin. Taantalinganin lo’a unyi jaruma, manangko’kin lo’a. Kole’a i Yahuwe, ialalo yang manyuro’ tio’en lo’in. Ia ona’ yang manyuro’ lo’in balaun lalako’en inang di tana’ dabayaangen dinen, yang dajarumangen nanna sumpana, to’ dameang ingka lo’a arabaki’ baki’ Abraham, baki’ Isak nanna baki’ Yakub,” ingka kenang manjaruma baki’ Musa lo’a ambata gulungan tau Israelen.

Currently Selected:

Tutulan Tau Israelen 30: EBE

Highlight

Copy

Compare