Tutulan Tau Israelen 22

Ukum tau marusaken lo’a babainye bungasen

13Umpamana andian babakaan mala bainye. Barik maminna sitindo’anen nanna bainyena dinen, mamin dainso’i, daia laloang mangalibakang lo’a babainye dinen. 14Laloang daia pajau’-jau’ lo’a babainye dinen kole’a kaingka’ okan lagi’ bungas. “Babainye dinen,” ingka, “kuala itiang bainyeku’. Jaji kudinso’i babainye dinen, inang kutamuna okan bainye bungas. Mamin pan dabungas tau. Kosan jaji tanda bukti lo’a bainye bungasa,” ingka kenang pajau’a lo’a bainyena. 15Na, ati’en mamin awan dinen, barik amana induna babainye dinen arung mawa kain yang itiang bukti kole’a daia tapat-tapat babainye bungas. Arung daawa lo’a toa-toaan yang aduduken di ale’ kasaan di baba’ mambangan pagar tagapa banuaan.

16Mondok inang rabarik, arung manjarum amana babainye dinen, “Anakku’ mamin kumeang lo’a babaka di’en itiang bainyena. Barik awandi’en, daia alibak lo’a anakku’. 17Sampai andian jarum pajau’a lo’a anakku’ kole’a okan kaingka anak babainye bungas. Poangsi nanga sialana anakku’ di’en tapat babainye bungas. Na, di’en lalo tanda bukti bainye bungasa nanga dinen,” kenang manjaruma amana. Laloang arung dapayoang kainna anaka lo’a toa-toaan di banua dinen.

18Na, ati’en mamin awan dinen, mamin sukup nanna buktina babainye dinen tapat babainye bungas, ambata toa-toaan arung maukum lo’a babaka pajau’en dinen. 19Daia arung mamayar utanga saratus papaka duit piraken lo’a amana babainye dinen. Kole’a daia babaka dinen mamin pajau’-jau’ lo’a babainye bungas tau Israelen. Babainye dinen tetap dala datiang bainyena. Salangke tio’a daia na’an pande sarak nanna babainye dinen.

20Kenang ukuma ati’en daia tapat tabukti anak babainye bungas. Poangsi ati’en tapat bua dalam pangaduanna babaka dinen, ati’en kosan idua’ang tanda bukti lagi’api babainye bungas di nanga sialada’, 21babainye dinen arung iawa lo’a mambangan saona amana. Mondok inang rabarik, samuana ambata gulungan babaka sabanuaan nanna arung mamarati kausa lo’a babainye dinen nanna batuun sampai daia mate. Ratina daparatiin nanna batuun, kole’a daia babainye dinen palin ajau’ basana dapolaan antaraka’, sampai daia mamola basa kakanjianen launna masi lalako’a di saona amana. Kajau’an balu’a dinen arung idunjang jaji dari antaranin.

22Ati’en andian di antaranin itingkam ikin tau sitindo’anen nanna bainye tau, arung babainye dinen sarata babakaan idukum mate. Arung idunjang jaji ikin kajau’an balu’a dinen dari antaranin tau Israelen.

23Umpamana andian babaka sidua’en nanna babainye bungasen di banuaan, babainye dinen mamin datajuk. Ati’en laloang datindo’i babainye dinen, 24arung idukum dua-duana. Arung iawa ikin lo’a insaluanna pakar tagapa banuaan, laloang arung iparati nanna batuun sampai mate. Yang babainyeen ratina idukum matena kole’a kapisi daia andian di banuaan, na’an bea daia mamuko kalongang kalena lo’a tauen. Babakaan dinen idukum matena kole’a daia barani marusak bainye tau. Arung idunjang jaji ikin kajau’an balu’a dinen dari antaranin.

25Kenang de’i ati’en damansangi ilalam banuaan. Poangsi ati’en adari di kosan ateengen, laan. Babaka dinen de’i ati’en sidua’ nanna anak babainye maminen sitajuk nanna tau bokanen insaluanna banuaan, ati’en laloang daia mamaksa lo’a babainye dinen, dabasai, rabarik babaka poang yang idukum mateen. 26Babainye dinen ada’ iai-aina. Kosan sala’a yang patut idukum mateen. Soala dinen ianggap sama awan tau yang mamansangiin lo’a uranga, yang mauno’en lo’a uranga. 27Kole’a anak babainye dinen de’i dadua’ang di kakalenana inang di kosan ateengen. Kapisi daia mamuko-muko, kosan tau mandalingaan. Kosan tau manggulungiin. Ialalo na’anna idukum babainye dinen.

28Ungka’en poang anak babainye bungaseen yang dabasai de’i kosanpi taju’a, laan barik ukuma. Ati’en laloang datamu tau, ti’ datingkam, 29babaka dinen arung mamayar utanga lima pulo’ papaka duit pirak lo’a amana babainyeen. Laloang babainye dinen arung dala tiang bainye kole’a mamin daia marusak lo’a. Salangke-langke tio’a daia na’an pande sarak nanna babainye dinen.

Currently Selected:

Tutulan Tau Israelen 22: EBE

Highlight

Copy

Compare