Tutulan Tau Israelen 13
13
Soala tau mawa alingoon lo’a banuana
1Jaji kenang jaruma i Yahuwe, “Umpamana andian nannin panjarum, yang datamuun kaingka marati ambata gulungan mui manyuro’ itamu jalu to’ adariin di ona’en. Umpamana dalam jaruma andian kalo’a panyunyua atau jalu laan-laanen yang to’ dapolaan, dala to’ itiang bukti mainto’ iparasaya’ina ikin jaruma dinen. 2Umpamana laloang adari tanda dinen awan bua jaruma. Na, ti’ mamin dabuktiang jaruma dinen, laloang daia mawa lo’in, Se’ manyembaki’ lo’a dinen. Dinen lalo yang patut isembaan, ingka kenang, manujuang lo’a jalu isembaan yang nampiin ikilala ikin. Jarum awan dinen, dinen lalo yang ijagaien. 3Ada’ manaantalingaan lo’a panjarum atau pamui awan dinen. Indinang lalo i Yahuwe Alatala yang isembaan iki’ mangilalaina lo’ka’, to’ datiang manyuro’ paita ateka’. To’ datamu balu’ ai pangasaangka’ lo’a, ti’ nanna sajangka’-sajangka’a ateka’ mangasaangka’ lo’a, ti’ sajangka’-jangka’a nyawaka’. 4Yang arung ilola’aniin iki’ kosan bokan. Jangka’a i Yahuwe Alatala yang isembaan iki’ yang arung ilola’aniin. Ia yang patuten ipaduliin. Arungki’ parandam lo’a parintana, arung ilola’ani panamuna. Malayaniki’ lo’a, manangko’ki’ lo’a.
5“Jaji panjarum atau pamui yang mawaan jarum awan dinen de’i arung idukum mate ikin. Kole’a nanna jaruma awan dinen daia mawa-awa tau, dasuro’ malawan lo’a panamuna i Yahuwe, lo’a Alatala yang isembaan iki’. Padahal ia dinen i Yahuwe yang mawaan lo’ka’ minsaluan dari negeri Mesir. Ia yang mamasutangen lo’ka’ lo’a karaja pangkamen. Ialalo arung idukuma tau balu’aan dinen, kole’a daia to’ mawa lo’in lempang dari dalan yang daparintangen kole’a i Yahuwe, Alatala yang isembaan iki’. Kajau’an awan dinen arung idunjang jaji dari antaranin,” ingka kenang parajarina baki’ Musa lo’da’.
6“Ati’en andian mobos jarum awan dinen, jarum mawa lempangen, kapisi sairun saatka’ manjarumen, kapisi anakka’ babaka babainyeen, kapisi bainyeka’ yang ikasaangen iki’, kapisi kawan tapatka’, ada’ taantalingana. Ungka’ daia manjarum, Se’ manyembaki’ lo’a jalu bokanen, ingka kenang manjaruma manuju lo’a jalu isembaan yang nampiin ikilala iki’ tarangkat dari nanna arabakika’, 7manuju lo’a jalu dasembaan kole’a ambata suku kulilingin inang yang bajao’en sapa dua, yang mainso’en sapa dua. 8Ati’en awan dinen jaruma ada’ ipadulina, ada’ taantalingana. Ada’ bea mangamase’iin lo’a atau malamun kasala’anna. 9Daia tetap arung idukum mate. Tangan diri’u arung tajolo pakaji’en itiang maukum mateen lo’a. Baru’ tau bayu’en tamba bea maukum mateen. 10Arung iparati nanna batuun sampai mate, kole’a daia mangilalai kakaru’ to’ palingo lo’in mawa marantang lo’a i Yahuwe, Alatala yang isembaan iki’ dinen. Padahal ia yang mawaan lo’ka’ minsaluan dari negeri Mesir, ia yang mamasutangen lo’ka’ dari karaja pangkamen. 11Na, ati’en tau mawa alingoon mamin idukum balu’a dinen, baru’ tababar dongo dinen lo’a banua dinen, lo’a banua dinen sasara tau Israelen manyuro’ atakut. Kosan lagi’ antaraka’ yang baraniin mawa basa kajau’anen awan dinen rabarik. Kenang ratina idukuma iki’ balu’a dinen.
12“Jaji maminnin aduduk inang di negeri yang to’ dameang lo’in kole’a i Yahuwe, Alatala yang isembaan iki’, maam-maamkin. Umpamana andian dongo idalingaan ikin, dongo dari banua seraan di negerinin inang. 13Jaji ilalam dongo dinen daasan andian tabobos tau basa ajau’en yang mawa alingoon lo’a banuada’ dinen. Se’ manyembaki’ lo’a dinen. Dinen lalo yang patut isembaan, ingka kenang, manujuang lo’a jalu dasembaan yang nampiin ikilala iki’, ingka kenang ilalam dongo idalingaan ikin. 14Ati’en awan dinen dongona, arung isari barik ikin. Arung iselidiki jaji. Arungkin matoani maam-maam. Maminna iselediki ikin, ati’en saja tapat, ati’en andian tapat buktina kole’a andian mamin adari jalu palin ajau’en inang di banua dinen, 15samuana yang lalako’en di banua dinen arung mate kausana. Maam mantuariin, maam inatangen, arung iduno’ samuana nanna pedangen.
16“Maminna akaus mate, ambata gulungan tikana dinen arung ikapulungang kausa inang di rawang banuaan. Laloang samuana arung itutung itiang pamindara jalu atutungen lo’a i Yahuwe, Alatala yang isembaan iki’. Maam banuaan, maam tikana, arung itutung kausana. Na’an pandekin mamola banua inangen lagi’. Arung ipalaloang arusak awan dinen sampai salaun-launna. 17Ada’ mawa mole’en jalu dari banua dinen lo’a saonin mainto’ akausa poang inang ajau’a nyawana i Yahuwe, arasina yang palin balasaan, supaya kosan lagi’. Baru’kin dakamase’i, baru’kin dakasaang. Insang sikadanan bayu’in barik di duniaan awan lalo bayanajo lo’a arabakinin. 18Tentukin dapamaam barik kole’a mainya’in malola’ani panamuna i Yahuwe, Alatala yang isembaan iki’. Mainya’kin parandam lo’a ambata gulungan parintana yang kujarumangen lo’in di aso di’en. Mainya’kin mawa basa tapaten di jolona arona,” ingka kenang manjaruma i Yahuwe yang dasuro’ jarumangen lo’ku’.
Currently Selected:
Tutulan Tau Israelen 13: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
