YouVersion Logo
Search Icon

Epeco 1

1
Amot
1 # Tic 18.19-21; 19.1 Waraga man oya i baŋ Paulo ame en akwena a Kricito Yecu pi mit Obaŋa.
Baŋ jo Obaŋa ame tye i Epeco, a gin jo a genne i Kricito Yecu:
2Obaŋa Papa wa kede Rwot Yecu Kricito miwu winyo kede kuc.
Winyo me cuny ame omio jo a tye i Kricito
3Myero opwo wunu Obaŋa, Papa a Rwotwa Yecu Kricito, pien i Kricito doŋ omiowa kwone winyo me cuny luŋ ame tye i polo.
4En rik oyerowa i Kricito ame mom ru ocibo acakki te lobo, me wan obed jo acil i nyime aboŋo balloro i komwa, pi mar mere. 5Obaŋa pi mittere kene rik oyiko con ni wan myero odok itino mere pi tic a Yecu Kricito. 6En otimo man me wek wan opak mottere me kica me kwogo adwoŋ a en omiowa i Wode ame emaro. 7#Kol. 1.14Pi remo me to a Wode, wan doŋ olakorowa oko i balwa, kite ame kica mere dwoŋ kede, 8ame en omiowa abup meicel. Pi ryeko mere kede pi niaŋŋere luŋ, 9en oyabbiwa muŋ me mittere, kun lubo yikkere aber a rik en oyiko me co bo i kom Kricito.
10Yik Obaŋa ame ebino cobo ka kare mere oromo, en me coko ginaketa luŋ aluŋa ame tye i polo kede i wi lobo, noto karacel i Kricito.
11Pien jami luŋ otiye kun lubo tam Obaŋa kede mittere. En oyerowa i Kricito pi tammere, me wan obed jo mere, kun nwoŋo rik en oyiko con ni, 12wan jo a rik ogeo bedo kede gen i kom Kricito myero omi jo pak kwogo mere. 13Wun daŋ i Kricito rik iwinyo wunu kop me ateni, ame en amut aber me larrewu. Wun daŋ iye wunu en, eka ote miyowu Cuny Acil a rik ociko pire me bed acalo anennere ame omwono i komwu. 14En ajeŋ me gin a wan obino nwoŋo i kare Obaŋa bino lakoro jo mere ikome, jo te pako kwogo mere.
Kwac a Paulo baŋ Obaŋa
15Man en omio, geye ame awinyo pi iyeewu i kom Rwotwa Yecu, kede marwu baŋ jo Obaŋa luŋ, 16mom aweko pwoyo Obaŋa pirwu, kun akobo nyiŋwu daŋ i kwacca. 17Akwao Obaŋa won kwogo ame papa a Rwotwa Yecu Kricito, me miwu cuny me ryeko, dok daŋ oyab ŋecwu i kome. 18Dok daŋ en meny tamwu, me iniaŋ wunu i kom gen ame olwoŋowu iye, kede i kom mot me kwogo adwoŋ, ame en mio baŋ jo mere me doŋ bed megi atwal; 19dok daŋ me iniaŋ wunu i kite ame teko mere adwoŋ meicel a mom pimere tye ka tic kede i yiwa, wan jo ame oye Yecu. Man rom aroma kede tic atek meicel me twerrere 20#Jab. 110.1a rik ocero kede Kricito i akina a jo oto, te cibe bedo i kabedo me kwogo i laŋete tuŋ cem i polo.
21En doŋ tye malo, loo kwon loc kede twer kede teko kede dito luŋ ame tye i polo, kede nyiŋŋoro ame orwo i lobo me kare man kede en a bino ca; 22#Jab. 8.6#Kol. 1.18Obaŋa doŋ oketo jami luŋ aluŋa i te twer a Kricito, me en lo, dok omie baŋ lwak jo oye en, me en bed acalo awie kun loo jami bec abeca. 23Lwak jo oye Kricito obedo kom Kricito, opoŋ daŋ kede Kricito, Kricito daŋ Opoŋ i jami luŋ aluŋa.

Currently Selected:

Epeco 1: La79

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy