NUMERI 1
1
Okuvalwa kwovalumenhu Ovaisraeli ava va wana okuhomona moita
1Mefiku lotete lohani onhivali momudo omutivali, vo eshi va pita mo medu laEgipiti, Omwene okwa popya vali naMoses metwali leongalo mombuwa yaSinai, ndele ta ti: 2“Vala omuvalu aushe weongalo alishe lovana vaIsrael pamapata avo, pamadina avo, ovalumenhu aveshe kumwe, komutwe nomutwe, 3nye naAron mu nokuvala ovalumenhu va wanifa omido omilongo mbali ile ava va koya po, ava vomuIsrael va wana okuhomona moita pamatanga avo. 4Ndele pamwe nanye napa kale omulumenhu womepata keshe, omukulunhu wepata.” 5Nomadina ovalumenhu ovayakuli veni oyaa: muRuben: Elisur yaSedeur. 6MuSimeon: Selumiel yaSurisaddai. 7MuJuda: Nashon yaAminadab. 8MuIsaskar: Netanel yaSuar. 9MuSebulon: Eliab yaHelon. 10Movana vaJosef: MuEfraim: Elisama yaAmmihud. MuManasse: Gamaliel yaPedasur. 11MuBenjamin: Abidan yaGideon. 12MuDan: Ahieser yaAmmisaddai. 13MuAsser: Pagiel yaOgran. 14MuGad: Eliasaf yaRehuel. 15MuNaftali: Ahira yaEnan. 16Vo ova ifanwa mo meongalo, ovakulunhu vomapata ooxe, ovakulunhu vomapata omuIsrael. 17Opo nee Moses naAron va tambula ovalumenhu ava va tumbulwa komadina avo, 18ndele vo va shiva eongalo alishe mefiku lotete lohani onhivali. Ndele va shangelwa membo pamapata avo omaumbo avo, pamuvalo womadina, komutwe nomutwe, ava va wanifa omido omilongo mbali ile va koya po, 19Omwene ngaashi a lombwela Moses. Ndele vo ove va vala mombuwa yaSinai.
20Ovana vaRuben, oshiveli shaIsrael, pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe, ava va wanifa omido omilongo mbali ile va koya po, aveshe ava va wana okuhomona moita, 21ovo tuu ovo vomepata laRuben, ava va valwa ova li omayovi omilongo nhee nahamano nomafele atano.
22Ovana vaSimeon pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe, ava va wanifa omido omilongo mbali ile va koya po, aveshe ava va wana okuhomona moita, 23ovo tuu ovo vomepata laSimeon, ava va valwa, ova li omayovi omilongo nhano nomugoi nomafele atatu.
24Ovana vaGad pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe ava va wanifa omido omilongo mbali ile va koya po, aveshe ava va wana okuhomona moita, 25ovo tuu ovo vomepata laGad ava va valwa, va li omayovi omilongo nhee naatano nomafele ahamano nomilongo nhano.
26Ovana vaJuda pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe ava va wanifa omido omilongo mbali ile va koya po, aveshe ava va wana okuhomona moita, 27ovo tuu ovo vomepata laJuda, ava va valwa, ova li omayovi omilongo heyali naane nomafele ahamano.
28Ovana vaIsaskar pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe, ava va wanifa omido omilongo mbali ile va koya po, aveshe ava va wana okuhomona moita, 29ovo tuu ovo vomepata laIsaskar, ava va valwa, ova li omayovi omilongo nhano naane nomafele ane.
30Ovana vaSebulon pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe ava va wanifa omido omilongo mbali ile va koya po, ava va wana okuhomona moita, 31ovo tuu ovo vomepata laSebulon, ava va valwa aveshe ava va wana, ova li omayovi omilongo nhano naheyali nomafele ane.
32Ovana vaJosef, ovana vaEfraim pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe ava va wanifa omido omilongo mbali ile va koya po, aveshe ava va wana okuhomona moita, 33ovo tuu ovo vomepata laEfraim, ava va valwa ova li omayovi omilongo nhee nomafele atano. 34Ovana vaManasse pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe ava va wanifa omido omilongo mbali ile va koya po aveshe ava va wana okuhomona moita, 35ovo tuu ovo vomepata laManasse, ava va valwa, ova li omayovi omilongo mbali naavali nomafele avali.
36Ovana vaBenjamin pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe, ava va wanifa omido omilongo mbali ile va koya po, aveshe ava va wana okuhomona moita, 37ovo tuu ovo vomepata laBenjamin ava va valwa, ova li omayovi omilongo nhatu naatano nomafele ane.
38Ovana vaDan pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe ava va wanifa omido omilongo mbali ile va koya po, aveshe ava va wana okuhomona moita, 39ovo tuu ovo vomepata laDan, ava va valwa, ova li omayovi omilongo hamano naavali nomafele aheyali.
40Ovana vaAsser pakudalwa kwavo, pamapata avo, pamaumbo avo, pamuvalo womadina avo, komutwe nomutwe, ovalumenhu aveshe kumwe, ava va wanifa omido omilongo mbali ile va koya po, aveshe ava va wana okuhomona moita, 41ovo tuu ovo vomepata laAsser, ava va valwa, ova li omayovi omilongo nhee nalimwe nomafele atano.
42Ovana vaNaftali pakudalwa kwavo, pamapata avo, nomaumbo avo, pamuvalo womadina avo, komutwe nomutwe, ovalumenhu aveshe kumwe ava va wanifa omido omilongo mbali ile va koya po, aveshe ava va wana okuhomona moita, 43ovo tuu ovo vomepata laNaftali, ava va valwa, ova li omayovi omilongo nhano naatatu nomafele ane.
44Ovo tuu ovo va valwa kuMoses nokuAron nokovakulunhu vOvaisraeli, vo omulongo navavali, keshe umwe a vala epata laye. 45Osho ngaha hano ava va valwa movana vaIsrael pamaumbo avo, ava va wanifa omido omilongo mbali ile va koya po, aveshe ava va wana okuhomona moita, 46aveshe ava va valwa ova li ve fike pomayovi omafele ahamano nomayovi atatu nomafele atano nomilongo nhano. 47Ndelenee Ovalevi vomepata looxekulu yavo inava valwa pamwe navakwao.
48Osheshi Omwene okwa popya naMoses, ndee ta ti:
49“Epata laLevi alike inamu li vala, nomuvalu walo aushe mokati kovana vaIsrael itau shangelwa mo, 50ndelenee Ovalevi va tula moshilonga shetwali liyapuki noshoinima aishe yalo naaishe i li mo. Vo ove nokuhumbata etwali liyapuki naaishe ei i li mo ndele vo ve nokuyakula moilonga yomulo nokwoonga onhanda keembinga adishe detwali liyapuki.
51“Netwali liyapuki ngeenge tali fikama, Ovalevi ve noku li pangulula. Netwali liyapuki ngeenge tali kanghama, Ovalevi ve noku li pangela po. Ndele omuyeni ou ta ehene kulo na dipawe. 52Novana vaIsrael ve nokwoonga onhanda keshe umwe monhele yaye, nakeshe epata pepandela lalo pamatanga avo. 53Ndelenee Ovalevi ve nokwoonga onhanda keembinga adishe detwali liyapuki, ehandu liha holoke kombada yovana vaIsrael. Osho ngaha hano Ovalevi ve nokuyakula moilonga yetwali liyapuki.”
54Novana vaIsrael ve shi ninga naanaa Omwene ngaashi a lombwela Moses, osho va ninga.
Currently Selected:
NUMERI 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.