LUKAS 1
1
1Eshi vahapu va hovela okutunga ehepaululo loinima ei ya ningwa mokati ketu, 2ongaashi venya va li tete ovamoni, novalongi veendjovo ve di tu fiila, 3naame yo, eshi nda konakona shili aishe ngaashi ya shikulafana kehovelo, nda hala ndi ku shangele, Teofilus, omufimanekwa, 4opo u shiive nawa oshili shomahepaululo oo we a longwa.
Exunganeko lokudalwa kwaJohannes
5Opomafiku aHerodes, ohamba yOvajuda, okwa li ku nomupristeli edina laye Sakaria, wetanga laAbia, nomukainhu waye womoludalo laAron, edina laye Elisabet. 6Ndele vo aveshe vavali ova li ovayuki koshipala shaKalunga nokweenda moipango aishe nomeenghedi dOmwene, ndele va li vehe na oshipo. 7Ndele vo ova li vehe na okaana, osheshi Elisabet okwa li ongadji naaveshe vavali va kulupa.
8Ndele fimbo kwa li ta longo oilonga youpristeli koshipala shaKalunga omolufo letanga laye, 9okwa hoololwa panghedi yovapristeli, a ka twimine motembeli yOmwene. 10Ndele ongudu aishe yovanhu oya li pondje, tai ilikana pefimbo letwimino. 11Opo nee omweengeli wOmwene okwe mu holokela a kala ofika kolulyo loaltari yokutwimina. 12Ndele Sakaria okwa haluka eshi e mu mona, noumbada we mu kwata. 13Ndelenee omweengeli okwa tya kuye: “Sakaria, ino tila, osheshi eilikano loye ola udika, nomukainhu woye Elisabet ote ku dalele okamati, ndele to ka luku Johannes.
14Ndele ye ota ka kala ehafo nenyakuko kwoove,
ndele vahapu otava ka hafela edalo lako.
15Osheshi ye ota ningi omunene koshipala shOmwene,
omaviinyu nomeva keshe haa kolwifa ite a nu,
ota yadifwa Omhepo Iyapuki
fimbo e li medimo laina.
16Ndele vahapu vomovana vaIsrael
ote va alulile kOmwene Kalunga kavo.
17Ndelenee ye ote mu tetekelele
momhepo nomeenghono daElia,
nomitima dooxe ote di alulile kovana,
novahaduliki keendunge dovayuki,
opo a longekidile Omwene oshiwana sha pwa.”
18Sakaria okwa tya komweengeli: “Eshi ohandi shi dimbulukwa koshike? Osheshi ame onda kula nomukainhu wange okwa kulupa.” 19Ndele omweengeli okwe mu nyamukula ta ti: “Aame Gabriel, ou handi kala ofika koshipala shaKalunga, ndele onda tumwa ndi ku popife, ndi ku udifile ondaka ei yehafo. 20Ndele tala, ove to fiti ondaka, ito shiiva okupopya fiyo efiku olo eshi tashi ningwa, shaashi ino itavela eendjovo odo dange, tadi wanifwa shili pefimbo lado.”
21Ndelenee ovanhu ova li kuteelela Sakaria, ndele ova kumwa eshi a kala mo unene motembeli. 22Ndelenee eshi a dja mo, okwa nyengwa okupopya kuvo, ndele vo ova koneka kutya ye okwa mona emoniko motembeli, ye okwe va lapa ndele ta kala a fita ondaka.
23Ndele opo nee omafiku aye okulonga oilonga youpristeli eshi a pwa ko, okwa shuna nee keumbo. 24Ndele omafiku enya eshi a pita po, Elisabet okwa ninga omufimba, ndele okwa hondama eehani nhano ndele ta ti: 25“Osho ngaha Omwene okwa ningila nge pomafiku enya eshi a tala kwaame a kufe nge okudinwa kwovanhu.”
Exunganeko lokudalwa kwaJesus
26Ndele mohani onhihamano omweengeli Gabriel okwa tumwa kuKalunga a ye koshilando shomuGalilea, edina lasho Nasaret, 27okokakadona ka putulwa komulumenhu edina laye Josef, womepata laDavid, nedina lokakadona oMaria. 28Ndele omweengeli eshi e uya mo kuye okwa tya: “Kundwa, oove omufilwanghenda! Omwene oku li naave. Oove omunangekwa noupuna mokati kovakainhu.”
29Ndele ye okwa halukifwa keendjovo odo nokwe lipula kutya ekundo olo otali ti ngahelipi. 30Ndele opo omweengeli okwa tya kuye: “Maria, ino tila, osheshi ove owa mona onghenda kuKalunga. 31Ndele tala, ove to ningi omufimba ndele to dala okamati, ndele to ka luka edina lako Jesus.
32Ye ota ningi omunene,
ndele Ye e nokwiifanwa Omona waau wOkombadambada.
Kalunga Omwene ote mu pe olukalwa louhamba waxe David;
33ndele Ye ota ningi ohamba yeumbo laJakob fiyo alushe,
nouhamba waye kau na apa tau xulu po.”
34Opo Maria ta ti komweengeli: “Eshi otashi ka ningwa ngahelipi, osheshi omulumenhu nghi mu shii?” 35Ndele omweengeli okwe mu nyamukula ta ti: “Omhepo Iyapuki otai ku dile kombada, neenghono daau wOkombadambada otadi ku tuvikile, onghee hano omudalwa ou omuyapuki ota ka lukwa Omona waKalunga. 36Ndele tala, naElisabet, omukweni, ou kwa tiwa ongadji, okwa ninga omufimba wokamati moukulupe waye, nohani ei yaye oyo onhihamano, 37osheshi Kalunga iha nyengwa kusha.” 38Ndele Maria okwa tya: “Tala, aame omupiya wOmwene, nandi ningwe ngaashi wa tya.” Ndele omweengeli okwa dja po puye.
Maria ta talele po Elisabet
39Ndele pomafiku enya Maria okwa fikama ndele ta i nokweendelela komukunda wokeemhunda, okoshilando shonhumba shomuJudea. 40Ndele okwa fika meumbo laSakaria, ndele ta kundu Elisabet. 41Ndele opa ningwa nee, Elisabet eshi a uda ekundo laMaria, okaana oka nhuka medimo laye, ndele Elisabet okwa yadifwa Omhepo Iyapuki. 42Ndele okwa popya mokule ta ti: “Oove omunangekwa noupuna mokati kovakainhu, ndele nakudalwa ou womwoove omunangekwa noupuna! 43Ndele osha dila nge peni, ina yOmwene wange te uya kwaame? 44Osheshi ondaka yekundo loye eshi ya fika momatwi ange, okaana oka nhuka kehafo medimo lange. 45Ndele omunelao oyou ta itavela kutya osho te shi lombwelwa kOmwene, otashi ka wanifwa.”
Eimbilohambelelo laMaria
46Opo Maria a popya, ta ti:
“Omwenyo wange otau hambelele Omwene pombada,
47nomhepo yange otai nyakukilwa Kalunga, Omukulili wange,
48eshi a tala ouxupi womupiya.
Tala, okonena omapupi aeshe otaa fimaneke nge ndimunelao.
49Osheshi Omunaenghono a ningila nge oinima inene,
nedina laye olo oliyapuki,
50nefilonghenda laye otali kala koludalo nokomaludalo,
okwaava have mu tila.
51Okwa longa oilonganghono kokwooko kwaye,
ndele okwa halakanifa po
ava va li ve nomadiladilo elinenepeko momitima davo.
52Ovapangeli okwe va undula ko komalukalwa
ndele okwa nenepekifa ovaxupi.
53Ovanandjala okwe va kutifa nouwa,
noipuna okwe i lekela ongaho.
54Okwa tambula Israel, omupiya waye,
opo a dimbulukwe efilonghenda laye
55kuAbraham nokoludalo laye fiyo alushe,
ngaashi a lombwela ootate.”
56Ndele Maria okwa menekela puye eehani nhatu ndele okwa shuna keumbo lavo.
Okudalwa kwaJohannes
57Ndele efimbo laElisabet lokudala la fika, nokwa dala okamati. 58Ndele ovashiinda vaye novakwao eshi va uda Omwene e mu ningila onghenda inene, ova hafa pamwe naye. 59Ndele efiku etihetatu ve uya va ka pitife okaana etanda, ndele ova hala ve ka lukile edina laxe Sakaria. 60Ina okwa nyamukula ta ti: “Ahowe, edina lako otali lukwa Johannes.” 61Ndele vo ova tya kuye: “Mepata leni kamu na nande umwe e na edina eli.” 62Ndele ova lapa xe, edina lilipi ngeno a hala oku ka luka. 63Ye okwa indila okapelende, ndele ta shange mo ngaha: “Edina lako oJohannes.” Aveshe ova kumwa. 64Opo tuu opo okanya kaye nelaka laye ola fituluka, ye okwa popya ndele ta hambelele Kalunga. 65Ndele aveshe vomoushiinda ova kwatwa kehaluko, nokomukunda aushe wokeemhunda daJudea okwa hepaululwa aishe ei ya ningwa, 66ndele aveshe ava ve di uda ove di lipula momitima davo ndele ova tya: “Okaana aka otaka ningi okashike?” Osheshi eke lOmwene ola li naye.
Eimbilohambelelo laSakaria
67Ndele xe Sakaria okwa yadifwa Omhepo Iyapuki, nokwa xunganeka ta ti:
68“Omwene Kalunga kaIsrael na fimanekwe,
osheshi e uya okutala oshiwana shaye,
ndele okwe shi longela ekulilo,
69ndele okwe tu tumbila oluvinga lexupifo
omeumbo laDavid, omupiya waye,
70ngaashi a lombwelifa omakanya ovaxunganeki vayapuki
momafimbo ounyuni wonale,
71oku tu xupifa movanaita nafye
nomomake aaveshe ovo ve tu tonda,
72a monifile ootate olukeno,
Ye a dimbulukwe ehangano laye liyapuki,
73eano olo e li anenene tate yetu Abraham,
74e tu pe omhito,
opo eshi twa xupifwa momake ovatondi vetu,
tu mu longele tuhe na oumbada
75omouyuki nomouyapuki koshipala shaye omafiku etu aeshe.
76Ndele ove okaana,
oto ka ifanwa omuxunganeki waau wOkombadambada,
osheshi ove u nokutetekelela Omwene noku mu palela eendjila daye,
77u longe ovanhu vaye okushiiva exupifo
nedimepo lomatimba avo,
78omolwefilonghenda lomomutima waKalunga ketu,
omo eluwa lokombada tali tu tendele,
79li tu minikile ava hatu kala omutumba momulaulu
nomomudidimbe wefyo,
ndele li yukifile eemhadi detu mondjila yombili.”
80Ndele okaana oka kula ndele oka pama momhepo, ndele oka kala meembuwa fiyo efiku olo a holokela Israel.
Currently Selected:
LUKAS 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.