YouVersion Logo
Search Icon

JUDAS 1

1
1Judas, omupiya waJesus Kristus, omumwaina waJakob, kwaava va ifanwa ndele va yapulwa muKalunga Tate ndele va amenenwa Jesus Kristus. 2Onghenda nombili nohole nai mu hapupalele.
Eitavelo nali kondjelwe
3Ovaholike, eshi nda li nda hala nokuhalelela oku mu shangela molwexupifo letweni atusheni, ame onda li ndi udite ndi noku mu shangela noku mu kumaida, nye mu kondjele eitavelo eli la pewa ovayapuki polumwe aluke. 4Osheshi oku novanhu vamwe ve livakela mo meongalo leni, ava va shangelwa nale etokolo eli, ovahenakalunga, efilonghenda laKalunga ketu otave li pilike pailonga yavo youhalu ndele tave likale Jesus Kristus, ou Omupangeli nOmwene wetu umwe aeke.
Ovalunde tava handukilwa
5Nande aishe omwe i shiivifilwa nale, onda hala oku mu dimbulukifa vali nokutya, Omwene ou a xupifa tete oshiwana medu laEgipiti, konima okwa nyona po aveshe venya va anya oku mu itavela. 6Novaengeli venya, ava va li inava diinina oulenga wavo, ndele va fiya po omitumba davo vene, okwe va idilila nomulaulu, omomapando alushe, va diininwe ngaha fiyo okefiku olo linene letokolo. 7Ngaashi Sodom naGomorra nomikunda domoushiinda wayo, eshi va li moluhaelo panghedi yavo nova puka nokushikula ouhalu wombelela, paenghedi dihe fi dopaushitwe, ova ninga edidiliko eshi va hepekwa nehepeko lomundilo waalushe.
8Osho yo ovatwi veendjodi ava otava nyateke ombelela ndele tava dini ouhamba notava sheke ovo vomoshinge. 9Omweengeli omukulunhu Mikael nande a twa eemhata naSatana omolwoshimhu shaMoses okwa tila oku mu ula ondjovo yetokolo noku mu sheka. Okwa tya ashike: “Omwene ne ku handukile!” 10Ndelenee ovanhu ava hava sheke osho kave shi shii. Ndele otave linyonaunine mwaayo ve i shii konghedi youshitwe ngaashi oinamwenyo ihe neendunge. 11Woo kuvo, osheshi va enda nondjila yaKain, nomokulikongela ondjabi ve liundulila mepuko laBileam ndele tava ka nyonaukila mokulundakana kwavo ongaashi kwinya kwaKora.
Ovalundakani ava vomeongalo
12Moivilo yeni yohole ovo omalopyolopyo ohoni vehe na ouxwenge mokulya nanye nokuxwaka. Ovo va fa oilemo ihe nomeva tai tewatewa komhepo, ovo va fa omiti dopokufu da yaumuka, dihe noiimati, ya fya luvali, va dudwa mo nomidi. 13Ovo omakufikufi omefuta tava tutumike onhutu yohoni yavo vene. Ovo eenyofi da pukilila, ovo va teelelifwa omulaulu womilaulu fokofoko fiyo alushe.
14Naave yo Henok, omutiheyali kokudja kuAdam okwe va xunganeka, a tya: “Tala, Omwene ote uya novayapuki vaye omayovi omilongo, 15okutokola aveshe nokuhandukila ovahenakalunga aveshe omolwoilonga yavo aishe youhenakalunga, ve i longa mouhenakalunga wavo, neendjovo davo adishe dikukutu, ovalunde ovo vehe na Kalunga ve di popya va twa ondubo naye.” 16Ovo tuu ava ovanaenyamukudi alushe nohava ngongotele oipewa yavo ei ve i na, ndele tava kala nokushikula omauhalu avo, nomakanya avo taa popi eendjovo dounhwa ndele tava heke ovanhu nokukonga shavo vene.
Omakumaido nepandulo
17Ndelenee nye ovaholike, dimbulukweni eendjovo mwe di lombwelwa nale kovayapostoli vOmwene wetu Jesus Kristus, 18eshi va tile kunye: “Momafiku ahauxuuninwa otape uya ovasheki, hava endifwa komauhalu avo ouhenakalunga.” 19Ovo tuu ovo tava eta omatukauko, ovo ovanhu vopashitwe, ndele kave nOmhepo. 20Ndelenee nye, ovaholike, litungileni kekanghameno leitavelo leni liyapuki, nye mu ilikane mOmhepo Iyapuki, 21opo mu likaleke mohole yaKalunga nokuteelela onghenda yOmwene wetu Jesus Kristus komwenyo waalushe. 22Fileni onghenda ovo ve na omalimbililo. 23Va xupifeni noku va vakula momundilo. Vamwe va fileni onghenda nokutila nokutonda oshikutu shavo sha nyatekwa kombelela.
24Ndelenee Oye ou ta dulu oku mu amena, muha punduke note mu kaleke mehafo koshipala shoshinge shaye, muhe noshipo, 25Oye aeke Kalunga nOmuxupifi wetu omolwOmwene wetu Jesus Kristus, Oye na pewe efimano nounene neenghono nepangelo manga omafimbo a li ehe ko nena nofiyo alushe! Amen.

Currently Selected:

JUDAS 1: OKYB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy