JOSUA 1
1
1Moses, omupiya wOmwene eshi a fya, Omwene okwa popya naJosua yaNun, omupiya waMoses, ndele ta ti: 2“Omupiya wange Moses okwa fya. Fikama hano, taulula Jordan, nye novanhu aveshe, mu ye moshilongo Ame handi ke shi pa ovana vaIsrael. 3Onhele keshe tai lyatwa komhadi yeni, Ame handi ke i mu pa, ngaashi nda popya naMoses. 4Oshilongo ashishe shOvaheti, okudja kombuwa nokuLibanon fiyo okomulonga munene nokutya, omulonga waEufrat, nofiyo okEfuta Lopokati mouninginino, otashi ka ninga oshilongo sheni. 5Kape nomunhu ta dulu okulipopila koshipala shoye momafiku aeshe omokukala kwoye. Ngaashi Ame nda kala naMoses, osho Ame ohandi ka kala naave. Ame itandi ku efa ndele itandi ku fii po. 6Kala wa pama. Kala wa nyatipala. Osheshi ove oto ka tukulila ovanhu ava oshilongo efyuululo, Ame nde shi udanekela ooxe nokwaana ndi shi va pe. 7Kala ashike wa pama nokunyatipala ndele wanifa naanaa omhango aishe, Moses, omupiya wange, e i ku lombwela. Ino yapuka mo muyo nande okolulyo ile kolumosho, opo u kale u nelao keshe apa to i. 8Embo lomhango ei iha dje mo mokanya koye, ndelenee i konakona omutenya noufiku, opo u shiive okuwanifa naanaa ashishe eshi sha shangelwa mo. Osheshi osho ove to ka kala u nelao meendjila doye ndele oto kala nouwa. 9Ame inandi shi ku lombwela hamba: kala wa pama ndele nyatipala? Ino tila ndele ino haluka, osheshi Omwene Kalunga koye oku li naave keshe apa to i.”
Ovaisraeli va kala nokudulika kuJosua
10Opo nee Josua okwa lombwela ovakulunhu voshiwana ndele ta ti: 11“Endaendeni monhanda mu lombwele ovanhu mu tye: ‘Lilongekidileni onghuta, osheshi omafiku atatu ngeenge a piti po, tamu ka taulula Jordan mu ka nangale edu olo Omwene Kalunga keni te ke li mu pa, mu ke li nangale.’ ” 12Ndele Josua okwa lombwela Ovarubeni nOvagad netata lepata laManasse, ndele ta ti: 13“Dimbulukweni oshinima osho Moses, omupiya wOmwene, e mu lombwela, ye eshi a tile: ‘Omwene Kalunga keni te mu pe onhele yetulumuko ndele te ke mu pa edu eli.’ 14Ovalikadi veni, ounona veni, noimuna yeni nai kale medu eli Moses e li mu pa moushilo waJordan. Ndelenee nye vene, ovakwanyati aveshe, mu nokukwatela ovamwaxo komesho mwa dililwa mokutaulula noku va kwafa 15fiyo Omwene ta pe ovamwaxo ngaashi nye, ndele navo yo tava nangala edu eli Omwene Kalunga keni te ke li va pa. Opo nee tamu dulu okushuna koshilongo sheni mwe shi nangala, osho Moses, omupiya wOmwene, e mu pa moushilo waJordan, kepito letango, mu shi nangale.” 16Opo nee vo ova nyamukula Josua ndele tava ti: “Ashishe eshi we shi tu lombwela, fye ohatu ke shi ninga, nakeshe apa to tu tumu, ohatu ka ya ko. 17Naanaa ngaashi twa dulika kuMoses, ohatu ka dulika yo kwoove. Omwene Kalunga koye na kale naave ngaashi a kala naMoses. 18Omulumenhu keshe ou ta anye elombwelo loye ndele ita dulika keendjovo doye moinima aishe ove to ke tu lombwela, ota ka fya. Kala ashike wa pama nokunyatipala.”
Currently Selected:
JOSUA 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.