JEREMIA 1
1
Omuxunganeki Jeremia ta ifanenwa oshilonga shomuxunganeki kuKalunga
1Eendjovo daJeremia, omona waHilkia womovapristeli vokuAnatot, medu laBenjamin, 2ou a hangika kondjovo yOmwene momafiku aJosia yaAmon, ohamba yaJuda momudo omutimulongo nomutitatu wepangelo laye, 3nokwa hangikululwa momafiku aJehoiakim yaJosia, ohamba yaJuda, fiyo okexulilo lomudo omutimulongo nowotete waSedekia yaJosia, ohamba yaJuda, fiyo Ovajerusalem va twalwa moupika mohani onhinhano.
4Ame onda hangika kondjovo yOmwene tai ti: 5“Ame onde ku hoolola nokuli fimbo inandi ku shitila medimo lanyoko, nonde ku yapula, fimbo ino dja mo medimo lanyoko, ndele nde ku ninga omuxunganeki woiwana.” 6Opo nee ame onda tya: “Akutu Omwene Kalunga! Tala, ame kandi shii kupopya, osheshi aame omunyasha.” 7Ndelenee Omwene okwa lombwela nge, ta ti: “Ino tya: ‘Aame omunyasha,’ osheshi keshe apa handi ku tumu ou nokuya po, nakeshe eshi handi shi ku lombwele ou noku shi popya. 8Ino va tila, osheshi Ame ondi li pamwe naave ndele handi ku xupifa.” Omwene osho ta ti. 9Opo nee Omwene okwa nana eke laye nokwa kuma nge kokanya. Ndele Omwene okwa tya kwaame: “Tala, ohandi tula eendjovo dange mokanya koye. 10Tala, nena eli ohandi ku tula po kombada yoiwana noyomauhamba oku i dikula po noku i nyona po, noku i hanauna po noku i tunga noku i twika.”
11Ondjovo yOmwene oya hanga nge vali, ndele tai ti: “Jeremia, ove u wete shike?” Ndele nda nyamukula: Ondi wete oshitai shomuti waamandel. 12Opo Omwene okwa lombwela nge: “Heeno, ou shi wete shili, osheshi Ame ohandi kala nokupashukila ondjovo yange ndi i wanife.”
13Ndele ame nda hangika lutivali kondjovo yOmwene, ya tya: “Ove u wete shike?” Ndele ame nda nyamukula: “Ondi wete ombiya ya fuluka ya taalela koumbangalanhu.” 14Opo Omwene okwa lombwela nge: “Oumbangalanhu oko taku di omupya tau hange oonakukalamo aveshe vomoshilongo. 15Osheshi tala, Ame ohandi ifana oiwana aishe yomauhamba okoumbangalanhu, Omwene osho ta ti. Ndele vo otave uya ndele tave liyalele omalukalwapangelo, keshe umwe olukalwa laye, poivelo yaJerusalem nopeehotekuma adishe tadi shi dingilile, noilando aishe yaJuda. 16Ndele Ame onda hala oku va hololela omatokolo ange molwowii wavo aushe, eshi ve liteeka nge, ndele va twimina oikalunga imwe ndele ve linyongamena koilonga yomake avo vene. 17Ove hano limangeleka moshiya shoye, fikama u tonge kuvo adishe handi di ku lombwele. Ino va tila, opo Ame ndihe ku halukife moipafi yavo. 18Osheshi tala, onena tuu eli ohandi ku ningi ohotengulu ya pama nongudi yoshivela nekumahote loshikushu okukondjifa oshilongo ashishe, eehamba daJuda, omalenga aye omakulunhu, ovapristeli noshiwana shomoshilongo. 19Ndele vo otave ke ku lwifa, ndelenee itave ku dulu nande, osheshi Ame ondi li pwoove nohandi ku xupifa,” Omwene osho ta ti.
Currently Selected:
JEREMIA 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.