OVAGALATI 1
1
Ekundifo
1Paulus, omuyapostoli, hakovanhu ile hamomunhu, ndelenee okuJesus Kristus nokuKalunga Xe, ou e mu nyumuna movafi, 2novamwatate aveshe ve li pwaame, nokomaongalo omuGalatia.
3Efilonghenda kunye nombili yaKalunga Tate yetu noyOmwene wetu Jesus Kristus, 4ou e liyandja omolwomatimba etu, opo e tu xupife mefimbo lii lounyuni wopaife opahalo laKalunga, Tate yetu; 5Oye na fimanekwe alushe fiyo alushe! Amen.
Evaengeli lexupifo olo limwe alike
6Ame onda kumwa, eshi mwa pilamena diva ou e mu ifana mefilonghenda laKristus, ndele mwa ama kevaengeli limwe, 7nande kali fi limwe; ndele ope na vamwe tave mu piyaaneke nova hala okweendameka evaengeli laKristus. 8Ndele ngeno nande ofye ile omweengeli womeulu ne mu udifile evaengeli limwe, lihe fi eli twe li mu udifila, oye na fingwe. 9Ngaashi twa tonga nale, osho handi mu lombwele nopaife vali: ngeenge ope na ou te mu udifile evaengeli limwe, lihe fi olo mwe li tambula, oye na fingwe. 10Ame ohandi kongo paife ohokwe yovanhu ile oyaKalunga? Ile handi kongo okuwapalela ovanhu? Ngeenge onda hala okuwapalela ovanhu natango, ngeno kandi fi vali omupiya waKristus.
Evaengeli lashili kali fi lopanhu, olopaJesus Kristus mwene
11Ndelenee ovamwatate nye, ohandi mu shiivifile evaengeli eli nde li udifa kali fi lopanhu; 12nongaashi inandi li pewa kovanhu noinandi li longwa, ndelenee onde li hololelwa kuJesus Kristus.
13Osheshi okukala kwange kwonale kwomOujuda mwe ku uda, eongalo laKalunga nhumbi nde li telatele unene noku li hanauna po, 14nonda li nda ehena komesho mOujuda ndi dule vakwetu vahapu novomepupi lange vomoludi letu, ongaashi nda li omuladi okudiinina eenghulunghedi dootatekulu. 15Ndelenee eshi sha wapalela Kalunga, ou a hoolola nge okudja medimo lameme nokwa ifana nge molwefilonghenda laye, 16okuholola Omona mwaame, opo ndi mu udife mokati kovapaani, ame inandi kundafana nopehovelo nombelela nohonde, 17ndele inandi ya kuJerusalem kwaava va li tete ovayapostoli komesho yange, ndele onda ya kuArabia nonda alukila vali kuDamaskus.
18Ndelenee eshi pa pita eedula nhatu, onda ya kuJerusalem, tu ka shiivafane naKefas, nonda kala puye omafiku omulongo naatano. 19Ndele ovayapostoli vamwe inandi va mona, Jakob aeke, ou omumwaina wOmwene. 20Naadi handi di mu shangele, tala, okoshipala shaKalunga ihandi fufya. 21Opo nee onda ya komikunda daSiria nodaKilikia. 22Ndele omaongalo enya omuJudea e li muKristus, inaa shiiva nge koshipala. 23Vo ova kundana ashike: “Winya e tu telatele nale, ota udifa paife eitavelo eli e li hanauna po nale,” 24ndele va hambelela Kalunga molwange.
Currently Selected:
OVAGALATI 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.