OMAYELETUMBULO 6
6
Omalondwelo
1Omumwange, ove ngeenge wa ninga omuponhele woifuta yomukweni, wa yandja eke kwaau uhe mu shii, 2we limangifa keendjovo domokanya koye, wa kwatwa keendjovo dokanya koye, 3shi ninga hano, omumwange, opo u lixupife, osheshi wa kwatwa komake kumukweni: inda u lininipike kuye u mu fininike, 4ino itavelela omesho oye eemhofi, neemhafu doye okukumuka. 5Lixupifa momake ngaashi omenye nongaashi odila meke lomukwati weedila. 6Omundede ove, inda kokafelepuka, u tale eendjila dako u mone eendunge! 7Ko kehe nomupiti wokomesho, nomupashukili ile omupangeli, 8ndelenee ko take likongele omungome wako mokulombo, eendja dako ke di tuvikile mefimbo lokufu. 9Omundede ove, fiyo onaini to kala wa nangala, onaini to ka penduka meemhofi doye? 10Natango kofa po kanini, natango kumuka kanini, natango lixukata omake oye u tulumukwe, 11opo nee oluhepo tali ku uya ngaashi omweelaeli, noufyoona ngaashi omulumenhu a dililwa oiti.
12Ou ha endaenda nokanya ke yadi oipupulu, oye omukolokoshi nomulongi wowii, 13ou ta pepe nomesho ta nyota edu neemhadi ndele ta yandje omadidiliko nominwe daye, 14okukengelela oku li momutima waye, ta diladila alushe oumbudi ndele ta kunu eemhata. 15Onghee hano ehanauno laye tali mu vakele, ta ka teywa po divadiva, ehe neveluko.
16Oinima ei iheyali Omwene te i tondo, noinima iheyali oyo oixuna komwenyo waye: 17omesho elinenepeko, elaka li noipupulu, nomake taa tileshi ohonde ihe netimba, 18omutima tau diladila omauko mai, eemhadi tadi endelele okuninga owii, 19ondobwedi i noipupulu tai tandavelifa oipupulu ndele tai kunu eemhata mokati kovamwaina ovalumenhu.
Elondwelo molwomukainhu mwii
20Omumwange, diinina oshipango shaxo, ino ekelashi elongo lanyoko. 21Oyo i manga, i kale alushe pomutima, i endjelelifa mofingo yoye. 22Oyo i ku pitile komesho mokweenda kwoye, yo i ku pashukile mokunangala kwoye, nomokupenduka kwoye oyo i ku popife. 23Osheshi oshipango osho olamba, nelongo olo ouyelele nehanyeno lomoutekuduliko olo ondjila yomwenyo, 24opo yo i ku amene komukainhu mwii, nokelaka lomufenhu lomukainhu wovanhu. 25Momutima woye ino halukila ouwa waye, neemhafu daye dihe ku kwate. 26Osheshi molwombwada okamungome taka kanifwa, nomukainhu a hombolwa ta yulu omwenyo u nondilo.
27Olyelye ta dulu okuhumbatela mekolo laye omundilo, noikutu itai pi mbela? 28Ile olyelye ta dulu okweenda komakala a hanya, eemhadi daye itadi tutu mbela? 29Osho ngaha tashi ningilwa ou ta i mo momukainhu wamukwao. Keshe umwe te mu kumu, ita kala ina handukilwa. 30Omulunga ita dinwa mbela nande ta vake e likutife, shaashi ye e na ondjala. 31Ndele ye eshi a monika e nokufuta luheyali. Ye e nokuyandja po oinima aishe yeumbo laye. 32Ou ta teya ohombo nomukainhu, ye ke neendunge. Ou a hala okunyona po okukalamwenyo kwaye mwene, osho na ninge. 33Ye ota ka hangika koshiponga nokohoni, nokudinwa kwaye itaku dimwa po. 34Osheshi oukodi tau xwameke ehandu momulumenhu, ndele ehe nolukeno mefiku longhone. 35Ye ina hala nande ofuto, ndele ita itavele nande u hapupalife ofuto yoye.
Currently Selected:
OMAYELETUMBULO 6: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
