OMAYELETUMBULO 13
13
Omayeletumbulo taa tongo oinima i lili nai lili
1Omona omunandunge ta pwilikine outekuduliko waxe, ndelenee omusheki iha udu ko ekumaido. 2Omoiimati yokanya kaye keshe umwe ta li ouwa, ndelenee ovaliteeki ve hole okukolokosha. 3Ou ta lungamene okanya kaye, ota amene okukalamwenyo kwaye. Ou ta makula unene omilungu daye, ota i mehanauno. 4Omwenyo womundede tau haluka, ndelenee ita mono sha, ndelenee omwenyo wovadiinini tau ka kutifwa. 5Omuyuki ta tondo okupopya oipupulu, ndelenee okukala kwomuhenakalunga okwo ohoni ndele taku nyonyodolwa. 6Ouyuki tau amene ou ha ende ehe noshipo. Ndelenee ouhenakalunga tau pundukifa omulunde. 7Ope na umwe te linomo nokutya, ye oshipuna, ndelenee ke na sha nande. Umwe te lininipike nokutya, ye ohepele, ndelenee e noinima ihapu. 8Oikulila yokukalamwenyo kwomulumenhu oyo oupuna waye, ndelenee ohepele ita udu omafininiko. 9Ouyelele wovayuki tau minikile nokuhafifa, ndelenee olamba yovahenakalunga tai dimi. 10Elinenepeko tali eta eemhata. Ndelenee pwaava hava tambula omapukululo, ope nounongo. 11Oinima ya likolwa noupu tai ninipala, ndelenee ou ta diinine mokwoongela kanini nakanini, ota ka weda ko alushe. 12Okuteelela efimbo lile taku kulaukifa omwenyo. Ndelenee eteelelo la wanifwa olo omuti womwenyo. 13Ou ta dini Ondjovo, ote linyono po, ndelenee ou ha tila Oshipango, ota ka mona ondjabi. 14Elongo lomunongo olo ofifiya yomwenyo okukandula po eemwiyo defyo. 15Eendunge diwa tadi eta ohokwe, ndelenee ondjila yovaliteeki oyo ikukutu. 16Omunamayele keshe ta longo neendunge, ndelenee elai tali tandavelifa oulai. 17Omutumwa omuhenakalunga ta i momupya, ndelenee omutumwa e shii kulineekelwa, oye ngaashi ondjolowele. 18Oluhepo nohoni oyo oshipewa shaau ta ekeleshi outekuduliko. Ndelenee ou ta udu ekumaido, ota ka fimanekwa. 19Ehalelo la wanifwa olo linyenye komwenyo. Ndelenee okukukuma owii okwo oixuna kelai. 20Kala nokweenda novanongo, opo nee naave yo u ninge omunongo. Ndelenee ou ha endafana novashima, ota ka laipala. 21Omupya tau shikula omulunde, ndelenee ovayuki tava mono elao ondjabi. 22Omulumenhu muwa ta fyuululifile ovatekulu vaye, ndelenee emona lovalunde tali tuvikililwa ovayuki. 23Oshikokola sheehepele otashi eta eendja dihapu. Ndelenee vahapu tava hanaunwa po, shaashi ihava kala mouyuki. 24Ou e nonghenda noshitetati, ye ha tondo omona waye. Ndelenee ou e mu hole, ote mu hanyene. 25Omuyuki ta li fiyo a kuta. Ndelenee edimo lomuhenakalunga tali hepekwa keemhumbwe.
Currently Selected:
OMAYELETUMBULO 13: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
