OMAYELETUMBULO 12
12
Omayeletumbulo taa tongo oinima i lili nai lili
1Ou e hole outekuduliko, ye e hole eshiivo. Ndelenee ou ha tondo okuhanyenwa, ye omushima. 2Ou muwa ta hokiwa kOmwene, ndelenee ou okayoka komedu ote mu tokola. 3Kape nomunhu ta dulu okulikaleka nomwenyo molwouhenakalunga. Ndelenee omudi wovayuki itau tengauka. 4Omwalikadi omudiinini ye oshishani shomulumenhu waye, ndelenee omupwidi e li ngaashi otwila yomomakipa aye. 5Omadiladilo ovayuki omawa; nomauko ovahenakalunga oo ekengelelo. 6Eendjovo dovahenakalunga odo okunangela ohonde, ndelenee okanya kovayuki otake va xupifa. 7Ovanhu ovahenakalunga tava kombwa po ndele vehe po vali. Ndelenee eumbo lomuyuki tali kala po. 8Omulumenhu ta fimanekwa paendunge daye. Ndelenee ou e nomutima wa pilalala ta ka dinwa. 9Omudinwa ou e nomupiya, e dule omulitumbi ehe nomungome. 10Omuyuki a shiiva osho oshimuna shaye sha hala. Ndelenee omutima womuhenakalunga uhe nonghenda. 11Ou ha diinine epya laye, e nomungome muhapu. Ndelenee ou ta lalakanene oinima yongaho ehe neendunge. 12Omuhenakalunga te lihalele oikongwa yaava vai, ndelenee omudi wovayuki otau eta oiimati. 13Etauluko lomilungu olo omwiyo mwii, ndelenee omuyuki ta xupifwa moudjuu. 14Oiimati yokanya kaye tai eta po ouwa uhapu, noshilonga shomake omunhu tashi mu alukile. 15Ondjila yelai oya yuka momesho aye mwene, ndelenee ovanaendunge tava pwilikine epukululo. 16Ehandu lelai tali holoka divadiva, ndelenee omunaendunge te limwenenene efifohoni. 17Ou ta popi odo doshili, ota hepaulula osho sha yuka. Ndelenee omuhepaululi omunaipupulu ta kengelele. 18Omunhu ta tu neendjovo ngaashi eongamukonda, ndelenee elaka lovanaendunge tali velula. 19Omulungu u shii kulineekelwa tau kalelele fiyo alushe, ndelenee elaka loipupulu epakumo leisho. 20Ava hava diladila owii, ekengelelo li li momutima wavo, ndelenee ava hava tungu ombili ove nehafo. 21Omuyuki ita hangika nande komupya umwe, ndelenee ovahenakalunga ve yadi oiponga. 22Omilungu doipupulu odo oixuna koshipala shOmwene, ndelenee Ye a hokwa ovadiinini mokukala kwavo. 23Omunhu omunamayele ta mwenenene eshiivo laye, ndelenee omutima womalai tau ingida pombada oulai wao. 24Eke lomudiinini tali ka pangela, ndelenee omundede ta fininikilwa oilonga. 25Oshisho shomomutima womunhu otashi u fidimike poshi, ndelenee ondjovo yehekeleko otai u hafifa. 26Omuyuki ota tongola oufita waye, ndelenee ondjila yovahenakalunga tai va pukifa. 27Omundede ita mono oshifitukuti moukongo, ndelenee okudiinina okwo emona lomunhu li nondilo. 28Melila louyuki omu nomwenyo, nokweenda nalo oko itaku twala mefyo.
Currently Selected:
OMAYELETUMBULO 12: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
