OMAYELETUMBULO 11
11
Omayeletumbulo taa tongo oinima i lili nai lili
1Oshiyelekifo inashi yuka osho oixuna koshipala shOmwene, ndelenee okuyeleka kwa wana Ye e ku hokwa. 2Apa tape uya ounhwa, otape uya yo okufifa ohoni, ndelenee ounongo tau kala pwaava ve lininipika. 3Ovayuki tava endifwa kouhenashipo wavo, ndelenee ovaliteeki tava hanaunwa po koipupulu yavo. 4Emona itali kwafa sha mefiku loupyuhandu, ndelenee ouyuki tau xupifa mo mefyo. 5Ouhenashipo womuyuki tau lalakanifa ondjila yaye, ndelenee omuhenakalunga tau nyonwa po kouhenakalunga waye. 6Ouyuki wovayuki tau va xupifa, ndelenee ovaliteeki tava ka kwatwa kolwisho lavo vene. 7Pefyo lomuhenakalunga etimaumbwile laye tali xulu po, neteelelo lovanaipupulu tali kana po. 8Omuyuki eshi ta xupifwa mo momupya, nomuhenakalunga ta i mo ponhele yaye. 9Nokanya kaye omupopi wowii ta nyono po omukwao, ndelenee eshiivo tali xupifa omuyuki. 10Oshilando tashi hafele elao lovayuki, novahenakalunga ngeenge tava xulu po, oshilando tashi kuwilile. 11Oshilando tashi pamekwa kokunangeka noupuna kwovayuki, ndelenee okanya kovahenakalunga take shi hanauna po. 12Ou ehe neendunge, ota dini omukwao, ndelenee omulumenhu e neendunge ta mwena. 13Ou ta endaenda nomalundilo, ota holola oshiholekwa, ndelenee ou e nomhepo i shii kulineekelwa, ota tuvikile oshinima. 14Apa pehe nepukululo, oshiwana tashi xutuka, ndelenee ovapukululi vahapu otava eta exupifo. 15Ou wa ninga omuponhele woifuta yomukwao ote likongele oudjuu. Ndelenee ou ta tondo okuyandja eke, ota kala ehe nombudi. 16Omukainhu a wapala ota fimanekwa, novanaenghono tave lilikolele oupuna. 17Omulumenhu onakufilonghenda ota kongele omwenyo waye ouwa: ndelenee ou ehe nonghenda, ta twala ombelela yaye mwene momupya. 18Omuhenakalunga te likongele eliko loipupulu, ndelenee ou ha kunu ouyuki, ondjabi i shii kulineekelwa. 19Ouyuki washili tau twala komwenyo, ndelenee ou ha shikula owii, ota shikula efyo. 20Ou e nomutima inau yuka, oye oixuna koshipala shOmwene, ndelenee ava va koshoka mokukala kwavo Ye e va hokwa. 21Oshili, ovo vai itava kala inava handukilwa. Ndelenee oludalo lovayuki otali xupifwa. 22Omukainhu muwa ehe neendunge, e li ngaashi olinga yoshingoldo meyulu loshingulu. 23Omahalo ovayuki taa twala kelao, ndelenee elineekelo lovahenakalunga olo etokolo lehandu. 24Onakuyandja ta wedelwa ko shihapu, ndelenee ou ta luvapala, ota hepa. 25Omwenyo ou tau nangeke noupuna, otau ka kutifwa, nomuhekeleki wovakwao ota hekelekwa yo ye mwene. 26Ou ta luvapalele oilya, ta tulwa omutima kovanhu. Ndelenee enangeko noupuna tali kala komutwe waau ta landifa oilya. 27Ou ta kongo osho shiwa, ota kongo osho sha wapala. Ndelenee ou ta kongo owii, oo otau uya kombada yaye. 28Ou te lineekele oupuna waye, ota ka punduka. Ndelenee ovayuki tava ka hapa ngaashi ohapo. 29Ou ta dongakanifa eumbo laye, ota fyuulula omhepo, nelai tali ka ninga omupika waau e nomutima u nounongo. 30Oshiimati shomuyuki osho omuti womwenyo, ndele ou ta likola eemwenyo oye omunongo. 31Ngeenge omuyuki ta mono ondjabi kombada yedu, unene hano omuhenakalunga nomulunde.
Currently Selected:
OMAYELETUMBULO 11: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
