OMAYELETUMBULO 10
10
Omatumbulo maxupi taa tongo oinima i lili yomokukala kwomunhu
1Omayeletumbulo aSalomo: Omona omunaendunge ta hafifa xe, ndelenee omona elai oye oluhodi laina. 2Omamona a likolwa mouhenakalunga, itaa kwafa sha, ndelenee ouyuki tau xupifa mefyo. 3Omuyuki, Omwene ite mu efele ondjala, ndelenee olwisho lovahenakalunga Ye ote li kandula po 4Ou ta longo neke li noundede, ota ningi omukwanaluhepo, ndelenee eke lomudiinini tali likolifa. 5Omumati omunaendunge ta tuvikile mokufu, nomumati ta kofa, mefimbo leteyo ota fifa ohoni. 6Omanangeko noupuna e li kombada yomutwe womuyuki, ndelenee okanya kovahenakalunga taka holeke oukolokoshi. 7Okudimbulukiwa kwomuyuki taku nangekwa noupuna, ndelenee edina lomuhenakalunga tali xulu po. 8Ou e nomutima u neendunge, ota diinine oipango, ndelenee ou e nomilungu doulai, ta wile po. 9Ou ha ende moshili, ehe nombudi, ndelenee ou ta pengifa eendjila daye, ota ka hololwa. 10Ou ta lembe nomesho aye, ta eta po ouyehame, ndele ou ta popi oulai ta ka wila po. 11Okanya kovayuki oko ofifiya yomwenyo, ndelenee okanya kovahenakalunga taka holeke oukolokoshi. 12Ehandu tali pendula eemhata, ndelenee ohole tai tuvike omatauluko. 13Ounongo tau monika komilungu dovanaendunge, ndelenee ou ehe neendunge ta ka dengwa noshitetati kombuda. 14Ovanongo hava tuvikile eshiivo, ndelenee okanya kelai oko ehanauko li li popepi. 15Emona loshipuna olo oshilando shaye sha pama, ndelenee oluhepo lomukwanaluhepo olo ehanauko laye. 16Eliko lomuyuki tali eta omwenyo; oikongwa yomuhenakalunga oyo oulunde. 17Ou ta diinine outekuduliko, e li mondjila yomwenyo ndelenee ou ta kandula po omapukululo, ota ka puka. 18Ou ta holeke ehandu, e nomilungu doipupulu. Ndele ou ta tandavelifa omalundilo, ye elai. 19Apa pe neendjovo dihapu, etauluko itali pumbulukwa po. Ndelenee ou ta kelele omilungu daye, ye omunaendunge. 20Elaka lomuyuki olo oshisiliveli sha hoololwa; nomutima womuhenakalunga kau na shilonga. 21Omilungu dovayuki tadi yukifa ovanhu vahapu. Ndelenee omalai taa fi, shaashi ehe neendunge. 22Enangeko noupuna lOmwene, olo tali likolifa, noshilonga shidjuu itashi wedele ko sha. 23Okulonga oshilonga shii taku hafifa elai, ndelenee ounongo tau hafifa omulumenhu e neendunge. 24Osho omuhenakalunga te shi tila, otashi mu hange. Ndelenee osho ovayuki ve shi hala, tave shi pewa kuYe. 25Oshikungulu eshi sha pepa, ovahenakalunga kave po vali; ndelenee ekanghameno lovayuki la pama fiyo alushe. 26Ngaashi omaetika komayoo nongaashi omwifi komesho, osho yo omundede komutumi waye. 27Okutila Omwene taku hapupalifa omafiku, ndelenee omido dovahenakalunga tadi xupipikwa. 28Eteelelo lomuyuki tali xulile mehafo, ndelenee etimaumbwile lomuhenakalunga tali xulu po. 29Ondjila yOmwene oyo ohotengulu yovayuki, ndelenee oyo ehanauko lovalongi vouhenouyuki. 30Omuyuki ita ka tengauka fiyo alushe, ndelenee omuhenakalunga ita ka kala mo moshilongo. 31Okanya komuyuki taka tutuma ounongo, ndelenee elaka loipupulu tali ka kombwa po. 32Omilungu domuyuki odi shii eshi sha wapala, ndelenee okanya komuhenakalunga oko ekengelelo longaho.
Currently Selected:
OMAYELETUMBULO 10: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
