2 OVATESSALONIKI 1
1
1Paulus naSilvanus naTimoteus,
Okeongalo lOvatessalonika muKalunga, Tate yetu nomOmwene Jesus Kristus.
2Efilonghenda kunye nombili yaKalunga, Tate yetu noyOmwene Jesus Kristus!
Paulus ta pandula Kalunga molwOvatessalonika
3Otu nokupandula Kalunga alushe molweni, ovamwatate, ongaashi osha wapala yo, osheshi eitavelo leni otali kulu shili, nohole yeni yokuholafana tai hapupala mukeshe umwe mokati keni, 4opo fye vene ohatu litange momaongalo aKalunga molweni, omolwelididimiko leni neitavelo leni omokutewatewa kweni akushe nomaudjuu oo hamu a humbata. 5Osho edidiliko letokolo laKalunga la yuka, nokutya nye mu talwe mwa wapalela ouhamba waKalunga, ngaashi tamu u hepekelwa yo. 6Kalunga okwe shi tala sha yuka okwaalulila ovahepeki veni omahepeko, 7noku mu pa, onye tuu ava mwa hepekwa, etulumuko pamwe nafye omokuholoka kwOmwene Jesus, fiku ta di meulu pamwe novaengeli vaye ovanaenghono, 8omomalaka omundilo, fiku ta handukile ava inava shiiva Kalunga noitava dulika kevaengeli lOmwene wetu Jesus. 9Ovo tava ka wilwa kehandu nokenyonauko laalushe tali di koshipala shOmwene nokefimano leenghono daye, 10mefiku olo te uya okuvadimifwa movayapuki vaye nokukuminwa movaitaveli vaye aveshe, osheshi onye omwa itavela ehepaululo twe li mu udifila.
11Onghee hatu mu indilile alushe Kalunga ketu e mu tale mwa wapalela eifano, Ye a wanife neenghono ehalo leni alishe okuhala ouwa noshilonga sheitavelo, 12edina lOmwene wetu Jesus opo li fimanekwe munye, nanye yo muye, panghenda yaKalunga ketu noyOmwene Jesus Kristus.
Currently Selected:
2 OVATESSALONIKI 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.