1 SAMUEL 1
1
1MuRamataim omwa li omulumenhu Omusufi, wokeemhunda daEfraim, edina laye Elkana yaJeroham yaElihu yaTohu yaSuf Omuefrat. 2Ye okwa li e novalikadi vavali. Edina laumwe la li Hanna, nedina lomutivali ola li Peninna. Ndele Peninna okwa li e novana, ndelenee Hanna okwa li ehe novana. 3Nomulumenhu ou okwa li ha di moshilando shavo ndele ta i omudo keshe okwiilikana nokuyambela Omwene womatanga ovakwaita kuSilo, oko ovana ovamati vavali vaEli, Hofni naPinehas, va li ovapristeli vOmwene. 4Ndele mefiku limwe Elkana okwa yamba nokwa yandja komwalikadi waye Peninna nokovana vaye ovamati noukadona oitukulwa yombelela yeyambo. 5Ndelenee okwa yandja kuHanna luvali oitukulwa, osheshi okwa li e hole Hanna. Ndelenee Omwene okwa fitika po oshidalelo shaye. 6Nomukwao okwe mu shinda nokushindilila e mu handukife, shaashi Omwene okwa fitika po oshidalelo shaye. 7Nosho ngaha sha ningwa omudo nomudo, ye eshi a ya kongulu yOmwene. Osho ngaha winya e mu handukifa, onghee Hanna a lila ndele ina hala okulya sha. 8Nomulumenhu waye Elkana okwe mu lombwela: “Hanna, oto lilile shike ndele ito li sha? Nomolwashike omwenyo woye tau nyika oluhodi? Haame ngeno ndi dule ovamati omulongo?” 9Opo nee Hanna okwa fikama, vo eshi va lya nova nwa muSilo, fimbo omupristeli Eli a li omutumba kolukalwa laye poshivelo shotembeli yOmwene. 10Nokwa ilikana Omwene mouyehame ulula nokwa lila nokulililila. 11Ndele ye okwa udaneka eudaneko ndele ta ti: “Omwene womatanga ovakwaita, Ove ngeenge to tale oluhepo lomupiya woye omukainhu, ndele to dimbulukwa nge, ndele ito dimbwa omupiya woye omukainhu, ndele to yandje komupiya woye omukainhu okaana okalume, opo nee ame ohandi ke ka yandja kOmwene ka ninge kOmwene omafiku aeshe omokukala kwako. Noshimbi itashi ke uya komutwe wako.” 12Ndele ye eshi a ilikana efimbo lile koshipala shOmwene naEli ta tale okanya kaye, 13osheshi Hanna okwa popya momutima waye, omilungu daye adike de linyenga, ndelenee ondaka yaye inai udika, ndele Eli okwa diladila ye a kolwa. 14Ndele Eli ta ti kuye: “Fiyo onaini to kala ngaashi omunhu ongholwe? Litukumuna oukolwe woye!” 15Ndelenee Hanna ta nyamukula ta ti: “Ahowe, omwene wange, aame omukainhu ndi nouyehame wokomwenyo. Inandi nwa omaviinyu ile oikunwa tai kolwifa, ndelenee nda tukumuna omwenyo wange koshipala shOmwene. 16Ino tala omupiya woye omukainhu omukolokoshi, osheshi omolwouyehame wange nomolwounene woluhodi lange nda popya efimbo lile.” 17Ndele Eli okwa nyamukula ndele ta ti: Inda nombili, Kalunga kaIsrael ne ku pe eshi we mu indila meilikano loye. 18Opo nee ye ta ti: “Omupiya woye omukainhu na filwe onghenda momesho oye.” Omwalikadi okwa dja po opo, ta li ndele ina kala vali e noluhodi. 19Vo eshi ve liungaana ongula inene ndele va ilikana koshipala shOmwene, vo ova shuna ndele tave uya meumbo lavo muRama. Elkana a nangala nomwalikadi waye Hanna, nOmwene okwe mu dimbulukwa. 20Ndele eshi pa pita omudo umwe, Hanna ou a li omufimba, okwa dala okaana okamati nokwe ka luka Samuel, osheshi ye ta ti: “Ame nde ka indila kOmwene.”
21Omulumenhu Elkana neumbo laye alishe eshi va fikama va ka yambele Omwene eyambo lomudo keshe nokutwala ko eyambo laye leudaneko, 22Hanna ina ya ko. Ndelenee ye okwa lombwela omulumenhu waye: “Okaana okamati ngeenge ka tova, ohandi ke ka twala ko, opo ka holoke koshipala shOmwene nokukala ko efimbo alishe.” 23Nomulumenhu waye Elkana okwe mu lombwela: “Ninga hano eshi tashi ku wapalele. Kala po fiyo okaana okamati ka tova; Omwene na wanife ashike eendjovo daye.” Omwalikadi a kala ko ndele ta nyamifa okaana kaye okamati fiyo e ka tovifa. 24Ndelenee ye eshi e ka tovifa, okwa ya pamwe nako neengobe nhatu deemhedi noufila u fike peekilograma omulongo nomaviinyu oshitoo shimwe, nokwe ka twala kongulu yOmwene mu Silo. Nokaana okamati ka li kanini natango. 25Ndele va toma ongobe yomhedi ndele tava twala okaana okamati kuEli. 26Ndele ye ta ti: Akutu, omwene wange, oshili, ngaashi u nomwenyo aame omukainhu winya nda li ofika apa pwoove ndele handi indile kOmwene. 27Okaana aka okamati onde ka indila kOmwene, nOmwene okwa pa nge eshi nde shi mu indila. 28Onghee hano nda hala yo oku ka yandja kOmwene omafiku aeshe okukala kwako. Naka kale ka yandjelwa Omwene. Ndele oko vo va ilikana Omwene.
Currently Selected:
1 SAMUEL 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.