मती 20

अँगुर खेत रे क-कामकु रआ हुडिञ गाम

1“सिरमा राइज मियड् खेत मालिक लेका इदानआँ, जे अपन अँगुर बिठा रे का कामकु काम रे हेलावकु तआ अगम ञीन्दवात रे उडुङ लेनय। 2जोटोः हुँनि क-कामकु तआ मुसिञ रे मियड् चंदी रआ ठड़रा टका ए-एम तआ ताय लअय जोटोः हुँकू अनेज् रआ अँगुर बिठा रे बिदा लिड्कुअय। 3करीबन नाव बजे हुँनि उडुङ लेनय जोटोः हुँनि चबुतरा रे एटाः होड़कु बेकार तींगुन ञेल लिड्कुअय, 4जोटोः हुँकू कथावा लिड्कुअय, ‘आपे हों इञः रआ अँगुर बिठा रे काम तआ सेनपे, आपे तआ इञः उचित कमायनी ओवापेअइञ।’ 5तब हुँकू होंडे सेनोः लेनाकु हुँनि करीबन तीकिन जोटोः तीसरा बेला हों बहरा रे उडुङ कनते हेंका लअय। 6मी घंटा बेरा दोहोलेना हिना बेरा रे उडुङ कनते हुँनि एटाःकु तींगुन ञेल केते कथालअय, ‘आपे नोंडे दिन भाइर बेगारी चितानपे पड़ीयना?’ 7हुँकू उतारा लआकु, ‘चितानतआचि आले ओके हों काम रे ककु हेलाव तड्लेआ।’ तब हुँनि हुँकूइ कथावा लआ, ‘आपे हों इञः रआ अँगुर बिठा रे जू सेनपे।’”

8 # लेबी 19:13; नियम 24:15 “मालिक अयुब् बेरा अँगुर बिठा रेनि मुवार कथावा लअय, ‘क-कामकु राअ् कुमी, तयोम वेज्‌नाकु एतेन पहिल वेज्‌नाकु गोटे तआ बनी ओवाकुमी।’ 9क-कामकु वेज्‌लेनाकु जोटोः जे मी घंटा बेरा दोहोलेना घनी काम रे हेलाव दोहोलिड्कुआ हुँकू तआ मियड् चंदी रआ ठड़रा टका ओवा लिड्कुआ। 10जब पहिल रे हेलाव लेनकु होड़ वेज्‌लेनाकु, हुँकू सोचाव दोहोलआकु आले तआ बेसते ञमोआ बकिन हुँकू तआ हों मियड् चंदी रआ ठड़रा टका ञमलेना। 11जब हुँकू तआ टका ञमलेना दो खेत रेनि मालिक तेङ रे कुड़कुड़ाव लेनाकु 12‘हुँकू कथा लआकु, आले दिन भाइर कठोर मेहनात केते सितोङ सहावलआ, नोकू थोड़ेः एकेन होड़ मी घंटा बेरा दोहोलेना रआ समय रे काम लआकु, तियो अमः नोकू तआ आले बरोबर बनी ओवा लिड्कुअम!’

13“‘खेत मालिक,’ हुँकू मे से मियड् उतारावा केते कथालअय, ‘ओय भाइकु, इञः आपे सुधा कइञ अनयय यतेआ। तना इञः तुली आपे कपे ताय दोहोलआ चि आपे तआ मियड् चंदी रआ ठड़रा टका ओवापेअइञ। 14आपे रआ बनी ने इदीपे जोटोः सेनोःपे। इञः आपे तयोम हेलाव लेनाकु तआ हों आपे रआ इमेन ओवाकु तआ अराव तनाइञ। 15तना इञः रआ धनखुरजी इञः हिछा ते उचित एरोइञ कर-बर बुजालेए? आपे इञः रआ बढ़ियाँ काम रे चितान तआ बुरा नजाइर ते ञेलेअपे?’”

16 # मती 19:30; मर 10:31; लुका 13:30 “नोंका ते जे तयोम रेकुआ हुँकू मड़ाङ रे योओकु जोटोः जे मड़ाङ रेकुआ हुँकू तयोमोओकु।”

ईसु अनेज् रआ गोजोः रआ बारे तीसरा खेप आगमजानी

(मरकुस 10:32–34; लुका 18:31–34)

17ईसु जेरुसलेम रआ होरा रे सेनो गोन दोहोनय बरहो चेलाकु मी पड़ा रे इदी केते हुँकू कथावा लिड्कुअय। 18“ञेलेपे,” “जेरुसलेम सेनोगोनाबुन, होंडे मनवाँ होपोन मुध पुरोहित जोटोः धरम पोथी सि-सिखवकु रआ अती रे सोपावियाकु। हुँकू गोजे रआ डन्ड ठहरावीआकु। 19जोटोः हुँकू हुँनि गैर-जहुदीकु एडे सोपावियाकु जे हुँनि ठ-ठा वाइयाकु जोटोः कोड़रा ते हुमागियाकु। फिन हुँनि कुरुस रे ठोकावियाकु बकिन हुँनि पे रोज रे जिवेड्-बिरीदियय।”

जबदी रेनि लंञी रआ आरजी

(मरकुस 10:35–45)

20होना बेरा जबदी रेनि लंञी अपन सेंगोज् किन सुधा ईसु ठँवरे वेज्‌लेनय, जोटोः मड़ाङ रे इकड़ुम कनते चितानकुन हुँनि एतेन को-कोय अराव लेनय। 21ईसु हुँनि सोधव लअय, “अमः चितानम चहावओना?”

हुँनि उतारा लअय, “इञः रेनकिन बरिया बाबु कोड़ाकीन अमः जबान एमेमी चि अमः रआ राइज रे मिहोंड़ अमः रआ जोम होरे जोटोः मिहोंड़ कोंजरा होरे दुड़ूः किनमी।”

22ईसु हुकिन कथावा लिड्किनय, “अबन कबन ठुवावना चि चितानबन कोययना, जे दुख रआ डुभा रे ञू-ञू अवला इदानियाँ, तना ञू बेजा केएबन? जोटोः जे बतिसमा अँगावे अवला इदानियाँ होना अँगाव केएबन?”

हुकिन उतारा लआकिन, “आँ, अलिङ ञू बेजा यालिङ!”

23तब हुकिन कथावा लिड्किनय, “कटोरा रआ दो अबन जरुड़ ञूए अबन, बकिन इञः रआ जोम होरे चहे कोंजरा होरे अबन दुड़ूः रआ अधिकार इञः रआ न लगे, होना ठँव दो हुँकू तआ हके जेकर तआ इञः रेनि बबा बनाव तेयार तदय।”

24जब दस चेलाकु नोआँ अयुम लआकु दो हुकिन बनार बोयहा तुली कयरावा यनाकु। 25#लुका 22:25,26ईसु चेलाकु ताय अनेज् ठँवरे राअ् केते कथावा लिड्कुअय, “आपे ठुवा यतेअपे चि गैर-जहुदीकु रेनि हकिम होड़कु तेङ रे अपन सकती ते राइजेअय, जोटोः हुँकू रेनकु जने-माने नेताकु, होड़कु तेङ रे अपन अधिकार चलावे तआ अरावओकु। 26#मती 23:11; मर 9:35; लुका 22:26बकिन आपे रआ तला रे नोंका अलो होयावओ। आपे मे से जे सेंड़ायोः अरावओय, हुँनि आपे रेनि धँगड़ पड़ीयोः; 27जोटोः जे आपे मे से जे परधान पड़ीयोः चहावओय, हुँनि आपे रेनि बन्धुवा होयावओ चही। 28चितानतआचि मनवाँ होपोन अनेज् एर सेवा-सुसार तआ काय वेज् दोहोलेना, बकिन हुँनि से-सेवा रे जोटोः अगम छडावकु रआ दाम रुप रे अपन जीवि एम तआ वेज् दोहोलेनय।”

बरिया अन्धराकीन ञे-ञेल लेना

(मरकुस 10:46–52; लुका 18:35–43)

29जब हुँकू जरीहो सहार एतेन उडुङोन दोहोलेनाकु दो होड़ भीड़ ईसु रआ तयोम सेन यते दोहोलेनकु। 30संडक डुरी रे बरिया अन्धराकीन दुड़ूः दोहोलेनाकिन। जब हुकिन अयुम लआकिन ईसु हेनेनकिन ठँवते परोमोन दोहोनय, दो हुकिन जोड़-जोड़ते घोल केते हकाव लआकिन, “ओय परभु, दाऊद रेनि बंसज, अलिङ तआ मया वालिंङ मी!”

31होड़कु हुकिन मटियावोः तआ डपटाव लिड्किनाकु बकिन जोटोः बेसते घोल केते हकाव लआकिन, “ओय परभु! दाऊद रेनि बंसज अलिङ तआ मया योमी!”

32ईसु तींगु कनते हुकिन राअ् लिड्किनय जोटोः कथालअय, “अबन चितानबन चहावओना, इञः अबन तआ चितानाइञ चिलकाआ?”

33हुकिन उतारा लआकिन, “ओय परभु, अलिङ चहावोः तनालिङ चि मेड् नपायकोः!”

34ईसु हुकिन तेङ रे सोगव लेनय; हुँनि हुकिन रआ मेड् छुवाँव लअय, जोटोः तुरात हुकिन ञे-ञेल नकिन, हुकिन ईसु रआ तयोम सेन लआकिन।

Currently Selected:

मती 20: BIX

Highlight

Copy

Compare