मती 16

ईसु एतेन सिरमा रआ चिन कोय

(मरकुस 8:11–13; लुका 12:54–56)

1 # मती 12:38; लुका 11:16 फरीसीकु जोटोः सदुकीकु ईसु रआ ठँवरे वेज्‌लेनाकु, हुँकू हुँनि परखावी तआ कथा लआकु, आले तआ सिरमा रआ ओका हों चिन एरञेलेमी। 2ईसु उतारा लअय, “अयुबोः जुवार कथायपे चि ‘तीहिञ रआ मोसम अछाआ चितानतआचि आकास गोला ञेलोगोना’ 3जोटोः बोंगा तुरोः बेरा आपे कथायपे ‘तीहिञ धुका दाअ् वेजोआ चितानतआचि अगास गोला जोटोः धुंधलाआ।’ आपे अगर आकास रआ लछन चिनहा यापे, दो बेरा रआ लछन चितान तआ एरोपे चिनहा लेए? 4#मती 12:39; लुका 11:29नोआँ पीढ़ी रेनकु पापी जोटोः बे-लाज काम कराव अवला चिन ञमेअकु, बकिन जोना रआ चिन बाय केते हुँकू तआ जोटोः चितान चिन एरो ञमलेना।” तब ईसु हुँकू बायअटु केते होंडे एतेन सेनोः लेनय।

फरीसीकु जोटोः सदुकीकु रआ सिछा

(मरकुस 8:14–21)

5ईसु रेनकु चेलाकु सेंड़ा डहा होनहोंर सेन लेनाकु, बकिन हुँकू रुटी इदी तआ रिड़िङ केदाकु। 6#लुका 12:1ईसु हुँकू कथावा लिड्कुअय, “चड़चित दोहोनपे! फरीसीकु जोटोः सदुकीकु रआ खमीर एतेन बंचावओपे।”

7दो हुँकू अकु-अकु दुखमा लेनाकु, “अबुन रुटी कबुन अगु तड्आ हिना तआ ईसु नोंका कथा यतेअय।”

8नोआँ ठुवा केते ईसु हुँकू कथावा लअय, “ओय दरपुरा सारीयोःकु, अबुन एडे रुटी कोनाआँ नोंका आपे चितान तआपे सोचाव याते? 9#मती 14:17–21तना आपे तीहिञ हमाः कपे समझाव ओना? चि पाँच हजार होड़कु पाँच गोट रुटी ते खियाव दोहोलआ जोटोः होना कपे पहम यतेआ? तब आपे उकेन खचली पेरेज् दोहोलआपे? 10#मती 15:34–38जोटोः तना कपे पहामेआ चि सात गोट रुटी ते चार हजार होड़कु खियाव लआ तब आपे उकेड् खचली पेरेज् दोहोलआपे? 11आपे चितानतआ कपे समझावओ चि इञः रुटी रआ बारे रे कइञ कथा लआ बकिन फरीसीकु जोटोः सदुकीकु रआ #16:11 खमीर खमीर - रुटी एर ओवे अवला जीनिसखमीर एतेन सतरक दोहोनपे।”

12तब चेलाकु समझाव यनाकु चि ईसु रुटी रआ खमीर एतेन कोवन बकिन फरीसीकु जोटोः सदुकीकु रआ सिछा एतेन सतरक दोहोन तआ कथालअय।

ईसु ही मसी हके

(मरकुस 8:27–30; लुका 9:18–21)

13ईसु कयसरिया फिलिपी रआ पहटा रे सोदोर कनते अनेज् चेलाकु सोधव लअय, “होड़कु चितानकु कथाया, चि मनवाँ होपोन ओके हके?”

14 # मती 14:1,2; मर 6:14,15; लुका 9:7,8 हुँकू उतारा लआकु, “थोड़ेः एकेन होड़ जोहन बतिसमा एमी हके मिनगिआकु,” जोटोः “थोड़ेः एकेन होड़ एलियाह हके जोटोः थोड़ेः एकेन एटाः होड़कु कथाया जिरमयाह मनेकी परमेसर पड़ा एतेन दुखमाय अवला मे से मिहोंड़ ओकेकुन।”

15तब ईसु हुँकू कथावा लअय, “जोटोः आपे चितानपे मेनवाइञा चि इञः ओके हके?”

16 # जोह 6:68,69 तब सिमोन पतरस कथा रुवड़वा लअय, “अमः मसी हके, अमः जीवेड् परमेसर रेनि होपोन हके।”

17तब ईसु हुँनि उतारावा केते कथालअय, “जोना होपोन सिमोन! अमः धन्य इदानमिआँ, चितानतआचि जील जोटोः मयाम कोवन, बकिन इञः रेनि सिरमा बबा अमः एडे दिसतार तड्अय। 18इञः अमःइञ कथावायना चि अमः पतरस हके। इञः नोआँ सेरेङ रे अपन मंडली बनावेअइञ जोटोः पताल लोक रआ सकती हुँनि एडे एरो प्रबल लेना। 19#मती 18:18; जोह 20:23इञः अमः तआ सिरमा राइज रआ चभी ओवा यतमीअइञ ताकि जे चिताना हों धरती रेम तोलेआ, होना सिरमा रे तोलेअय, जोटोः जे आपे धरती रे राड़ायापे हुँनि तआ सिरमा रे हों जीजेआ।”

20फिन ईसु अनेज् चेलाकु तआ कड़ा चेतावनी एम लअय चि हुँकू ओके एडे हों नोआँ अलोकु कथाके चि हेनेनी मसी हके।

गोजोः जोटोः जिवेड्-बिरीदोः रआ पहिल आगमजानी

(मरकुस 8:31–33; लुका 9:22)

21होना बेरा एतेन ईसु अनेज् चेलाकुइ समझाव यन दोहोलेना, “हुँनि जेरुसलेम सेन जरुरीआ। होंडे जहुदी नेताकु, मुध पुरोहितकु जोटोः परमेसर रआ बचन सि-सिखावकु रआ अती एतेन अगम दुख सहावे जोटोः गोजेञकु। फिन पे रोज रे जीवेड् बिरीदोः जरुरीआ।”

22तब पतरस एटाः रे ईसु इदी केते हुँनि डपटाव केते कथावा लिदियय, “ओय परभु परमेसर!” अमः तेङ रे दयाके। नोंका “अमः तेङ रे कहियो एरो होयावलेना।”

23तब ईसु तयोम पड़ाते घुमराव कनते पतरस कथावा लअय, “ओय सयतान! ञीरेमी, अमः इञः रआ होरा रे ठोकोर रआ कारन पड़ी योनम। अमः परमेसर रआ दुखमा रे कोवन बकिन होड़कु रआ दुखमा रे मन लगावेअम।”

ईसु रआ तयोम सेने रआ माने

(मती 8:34—9:1; लुका 9:23–27)

24 # मती 10:38; लुका 14:27 ईसु अनेज् चेलाकुइ कथावा लआ, “जे इञः रआ तयोम रे वेजोः तआ अरावओय, हुँनि अपन अप हवाँव केते अखरी हमाः खंद रे कुरुस गोअ कोते इञः तयोम रे वेजोः। 25#मती 10:39; लुका 17:33; जोह 12:25चितानतआचि जे अपन जीवि बंचाववे अरावओय, हुँनि होनाय अदेआ बकिन जे ओके हों इञः चलते अपन जीवि अदेअय हुँनि ञमेअय 26अगर होड़ गोटा दुनियाँ ञमें जोटोः अपन जीवि गवाँव एंडाय दो हुँनि तआ चितान फयदा? चहे मनवाँ अपन जीवि रआ बदला रे चितानय एमा? 27#मती 25:31; सिरिञ 62:12; रोमी 2:6चितानतआचि मनवाँ होपोन अनेज् सिरमा दुत तुली बबा रआ बड़ाइ रे वेजोअय। जोटोः हुँनि गोटे होड़ तआ हुँकू रआ काम रआ मोताबिक कमायनी ओवा कुआय। 28इञः आपे सुधा सनारी कथायतेअइञ, जे नोंडे थोड़ेः एकेन इदानकुआ जबरे एरोकु गोज् लेना तब रे मनवाँ होपोन रआ अपन राइज रे वेजोः एरोकु ञेल लेए।”

Currently Selected:

मती 16: BIX

Highlight

Copy

Compare