मती 15

बबा-ताताकु रआ रीति-रिवाज

(मरकुस 7:1–13)

1जेरुसलेम रेनकु थोड़ेः एकेन फरीसीकु जोटोः धरम पोथी सि-सिखवकु रआ बचन सि-सिखावकु मुसिञ ईसु ठँवरे वेज्‌लेनाकु, 2जोटोः नोंका कथा लआकु, “अमः रेनकु चेलाकु चितान तआ पुरखाकु रआ रीति-रिवाज तोड़ाव यतेअकु? हुँकू बेगर अती अबुङ ते मंडी जोमेअकु?”

3ईसु हुँकू उतारावा लअय, “आपे अपन रीति-रिवाज रआ चलते परमेसर रआ हुकुम चितान तआपे तोड़ाव यतेआ? 4#उठलु 20:12; नियम 5:16; उठलु 21:17; लेबी 20:9चितानतआचि परमेसर कथा तड्अय ‘आपे अपन अया-बबा रआ इजात दोहोयपे’ जोटोः ‘अगर जे होड़ एंगा-अपा रआ निंदायय हुँनि होड़ गोजे चही।’ 5बकिन आपे कथायपे चि अगर ओके अपन अया-बबा कथावा, अमः तआ जे इञः एतेन फयदा ञमोः रआ इदानआँ होना ‘परमेसर तआ भेंट राकब् केदाइञ,’ 6दो हुँनि अपन अया-बबाते तआ चितानहों एरोय एम बुजालेए। नोंका आपे रेनकु बबा-तता रआ रीति-रिवाज चलते परमेसर रआ बचन टलव केदापे। 7ओय कपटी होड़कु, जसायाह नोंका कथाकेते आपे रआ बारे रे ठीक ही अगामजानी लअय।

8 # जसा 29:13 “‘नुकु होड़ अहा ते दो इञः रआ इजात तिञाकु,

बकिन नुकु रआ मन इञः एतेन संगीञ रेए।

9नुकु बेकार इञः रआ अराधनायकु,

चितानतआचि मनवाँ रआ रीति-बिधि धरम सिछा हके मेनकेते सिखाव कुआकू!’”

छुतो अवला दुखमा

(मरकुस 7:14–23)

10ईसु हिना तयोम होड़कु अनेज् रआ ठँवरे राअ् केते कथावा लिड्कुअय, “आपे गोटे इञः रआ दुखमा अयुमेपे जोटोः समझाव ओपे! 11चि जे अहा एतेन भीतरी बोलोयोओ होना ते होड़कु ककु छुतोआ, बकिन जे अहा एतेन उडुङ ङोआ हिनाते होड़कु छुतोअकु।”

12तब चेलाकु वेज् कनते हुँनि कथावा लीदियाकु, “तना अमः ठुवा यतेअम चि फरीसीकु अमः रआ दुखमा अयुम केते ठोकोर जोम लआकु?”

13ईसु उतारा लअय, “जे काट इञः सिरमा रेनि बबा काय बिड् तड्आ होना हों रचा गेअय,” 14#लुका 6:39“हुँकू इकाएर सेनवाकुपे, हुँकू अँधरा तआ होरा बतलाव अवला हके। बकिन हुँकू खुद अँधराअकु। अगर मियड् अन्धरा एटाः-ई अन्धरा तआ होरा बतलाव वाइ दो हुकिन बनार डोडहा रे ञुरोअकिन।”

15नोआँ अयुम केते पतरस कथालअय, “नोआँ हुडिञ गाम आले समझावले।”

16ईसु उतारा लअय, “तना आपे नहाः हमाः हों न समझ इदानपेआ? 17तना नोआँ कपे समझाव ओना जे अहा एतेन होड़ो रे बोलोयोओ, जोटोः होना पोटा रे अड़गु योओ हेनते बहेरेए पड़ा एतेन उडुङोओ। 18#मती 12:34बकिन जे अहा एतेन उडुङोओ, होना मन एतेन वेजोआ। हेनेना ते होड़कु छुतोअकु। 19चितानतआचि बुरा बिचार, गो-गोज्, एटाः लंञी-मरदना ओतोङ, बे-लाज काम, लोकड़े, अनसप गोवाही एम जोटोः निंदा मन रआ भीतार एतेन उडुङोओ। 20नोआँ गोटा दुखमा ते होड़कु छुत एंडायोओकु, बकिन बेगर अती अबुङ ते मंडी जोमोः रे होड़कु ककु छुतोआ।”

कनानी लंञी रआ सारीयोः

(मरकुस 7:24–30)

21ईसु होंडे एतेन उडुङ कनते सुर जोटोः सयदा रआ परदेस रे सेनोः लेनय। 22होना परदेस रेनि मियड् कनानी लंञी वेज्‌लेनय जोटोः हकाव-हकाव ते कथालअय, “ओय परभु, दाऊद रेनि होपोन, इञः तेङ रे मया वाइञमी। इञः रेनि कुड़ी होपोनिञ मुवाँ आतमा अगम सताव यतियय।”

23ईसु हुँनि तआ चितान उतारा हों काय रुवाड़ बुजा लआ, तब हुँनि रेनकु चेला वेज् कनते हुँनि एतेन गोहराव कोते कथा लआकु, “मुनी अबुन रआ तयोम-तयोम घोल यादय, मुनी बिदाइमी!”

24ईसु उतारा लअय, “इञः सिरीप इस्राएल रेनकु होड़ अड् लेनकु भीडीकु तआ बिदा तदिञा।”

25हिमेन रे हुँनि लंञी ठँवरे वेज् कनते इकड़ुम कोते कथालअय, “ओय परभु, इञः मदाइत तिञमी!”

26ईसु उतारा लअय, “सेंगोज्‌कु रआ रुटी इदी केते सेताकु ओवा बढ़ियाँ ना लागे।”

27हुँनि कथालअय, “आँ, परभु, सेकरो रे मलीक रआ मचिया ओतेत रे ञुरलेना सखड़ी सेता हों जोमेअय।”

28फिन ईसु उतारा लअय, “ओय लंञी, अमः रआ सारीयोः सेंड़ा आ। जे अमः रआ हिछा इदानआँ होना पुराकोः।” जोटोः हेनेन बेरा रे हुँनि रेनि कुड़ी होपोन ते नपाय यानय।

रसमसा जंडिरा लेनकु नपाय लेना

29ईसु होंडे एतेन सेन कोते गलील रआ सेंड़ा डहा ठँवरे सोदोरलेनय। हुँनि मियड् पहार रे राकब् कनते दुड़ूः यानय। 30भीड़ के भीड़ हुँनि ठँव रे लंगड़ाकु, लुल्हाकु, अन्धराकु, कोंदाकु, बहिराकु अगु लिड्कुआकु, जोटोः रकमे-रकम जंडिरा लेनकु हुँनि जँगा ठँवरे मंडाव लिड्कुअकु जोटोः ईसु हुँकू नपाय लिड्कुअय। 31कोंदा लेनकु दुखमा यते दोहोलेनाकु, जोटोः लुलहा लेनकु नपायोन दोहोलेनाकु, लंगड़ाकु सेनयाते दोहोलेनाकु, जोटोः अन्धराकु ञे-ञेलयन दोहोलेनाकु, होड़ नोआँ ञेल केते अगम तजूक यनाकु। हुँकू इस्राएल रेनि परमेसर रआ बड़ाइ लआकु।

ईसु चार हजार होड़कुइ खियाव लआ

(मरकुस 8:1–10)

32ईसु अनेज् चेलाकु राअ् केते कथालअय, “इञः तआ नुकु होड़ ञेल केते सोग वेजो गोना नुकु पे रोज एतेन इञः तुली इदानकुआ जोटोः नुकु एडे जो-जोम तआ चितानहों कोनाआँ। नुकु रंगिज् ते बिदाकु तआ इञः कइञ चहावओ, कहीं नोंका अलो होयावकोः चि होरा रे ही थकाव कोतेकु दोहोकोः।”

33चेलाकु हुँनि कथावा लीदियाकु, “नोआँ सुनसान ठँवरे आले नुमेन एकेन होड़ तआ रुटी ओका एतेन ञम केएले चि नुमेन सेंड़ा भीड़ ले खियाव किकुआ?”

34ईसु हुँकू सोधव लअय, “आपे एडे उकेड् गोट रुटी इदानआँ?”

हुँकू कथा लआकु, “सात गोट रुटी जोटोः कटीज् एकेन हुडिञ हाकुकु।”

35तब ईसु ओत रे दुड़ुगोः तआ होड़कु हुकुमवा लिड्कुअय। 36जोटोः हुँनि सात गोट रुटी जोटोः हकु-कु अँगाव केते धनियाबाद लअय, जोटोः होना केचाः-केचाः ते जोटोः हाकु टुकरा-टुकराते चेलाकुइ ओवाया लआ। जोटोः चेलाकु होड़कु तआ हटिङवा लिड्कुआ। 37गोटे जोम बी यनाकु जोटोः बंचाव लेना टुकरा मे से सात गोटङ खचली रे पेरेज् केते चेलाकु अलगाव लआकु। 38जो-जोमकु मे से लंञी जोटोः सेंगोज् बाय केते सीरिफ मरदनाकु चार हजार दोहोलेनाकु। 39तब ईसु होड़कु बिदाई लिड्कुअय जोटोः हुँनि डोंगा रे राकब् कनते मगदान देस रआ सीमान रे सेनलेनय।

Currently Selected:

मती 15: BIX

Highlight

Copy

Compare