मती 14

बतिसमा एमी जोहन रआ गोजे

(मरकुस 6:14–29; लुका 9:7–8)

1होनाघनी राजा हेरोद ईसु रआ बारे चरचा अयुम दोहोलअय। 2दो हुँनि अनेज् धँगड़कुइ कथावा लआ, “नुई बतिसमा एमी जोहन हके, जे गोज् कनते जीवेड्-बिरीड् तनय। हिना तआ हुँनि रे सकती रआ काम दिसतारोओ।”

3 # लुका 3:19,20 चितानतआचि हेरोद राजा जोहन एर सब् केते जेहेल ओड़ाः रे एर सीञ लिदियय हुँनि हिनाते नोंका लअय चितानतआचि हेरोदेस अनेज् कोड़ा बोयहा फिलिपुस रेनि लंञी हेरोदियस सुधा बियाह दोहोनय। 4#लेबी 18:16; 20:21चितानतआचि जोहन हुँनि कथावा दोहोलअय, “अपन बोकोते रेनि लंञी बियाही उचित न लगे!” 5हेरोदेस जोहन गोज् एंडाय तआ अराव दोहोनय, बकिन होड़कुइ बोरोवायन दोहोना, चितानतआचि होड़कु हुँनि परमेसर पड़ा एतेन दुखमाय अवला होड़ कथायाते दोहोनाकु।

6हेरोद रआ जनम दिन रआ घनी रे हेरोदियस रेनि कुड़ी होपोन गोतियाकु रआ तला रे रुचुः लेनय जोटोः हेरोदेस एरखुस लिदियय, 7हिना तआ हुँनि किरया जोम केते बचन एम लअय, “चि हुँनि जे चितानहों कोए होना ओवायय!” 8हुँनि रेनि एंगाते पहिल रे सिखाव दोहोलिदियय हिनाते हुँनि कथालअय, “नहाः ही इञः तआ जोहन बतिसमा एमी रआ बोहोः थाड़ी रे दन!”

9राजा हेरोद दुखित लेनय, बकिन अनेज् रआ किरया जोटोः गोतियाकु रआ चलते हुँनि हुकुम एम लअय, चि हुँनि रआ बोहोः ओवाय। 10हेनते हेरोद होड़कु बिदा केते जेहेल ओड़ाः रे जोहन रआ बोहोः एर खंडा लअय। 11हुँनि रआ बोहोः अगु लआकु जोटोः हुँनि कुड़ी तआ थाड़ी रे ओवा लिदियाकु जोटोः होना इदी केते एंगाते ठँवरे सेनलेनय। 12जोहन रेनकु चेलाकु अयुम कोते वेज्‌नाकु हेनते होना मुरदा इदी केते मरघट रे हार लआकु जोटोः सेन कनते ईसु खभारवा लआकु।

पाँच हजार मरदनाकु खियाव लअय

(मरकुस 6:30–44; लुका 9:10–17)

13ईसु नोआँ दुखमा अयुम केते होंडे एतेन ओचोः यानय, जोटोः डोंगा रे देज् कनते सुनसन ठँव रे सेनोः यानय। जब होड़कु ठुवा लआकु दो हुँकू सहार-सहार एतेन उडुङ कनते पयदल हुँनि तयोम सेन लेनाकु। 14ईसु डोंगा एतेन अड़गु लेनय दो होड़कु रआ अगम भीड़ ञेल लिड्कुअय। हुँनि हुँकू ञेल केते सोगव लेनय जोटोः हुँकू रआ जंडिरा एतेन नपाय लिड्कुअय।

15जब ञोता योन दोहोलेना दो चेलाकु हुँनि ठँवरे वेज् कोते कथा लआकु, “नोआँ ठाँव सुनसन इदानआँ जोटोः बेरा अगम कुबेर यना, होड़कु बिदाकुमी, ताकि हुँकू डीही रे सेन कोते अकु तआ जो-जोमा किरिञेअकु।”

16ईसु कथा रुवाड़ लअय, “मुकू ओका तेहों सेनोः रआ दरकार कोनाआँ। आपे ही मुकू तआ जो-जोम तआ ओवाकुपे!”

17चेलाकु हुँनि कथावा लिदियाकु, “पाँच गोट रुटी जोटोः बरिया हकु,” छोड़ाय आले एडे चितानहों कोनाआँ।

18ईसु कथालअय, “मोना नोंडे इञः ठँवरे अगुइपे।” 19तब हुँनि होड़कु बीर तेञ रे दुड़ुःगोः तआ हुकुम ओवा केते होना पाँच रुटी जोटोः बरिया हकु अँगाव लअय, हुँनि सिरमा पड़ा संगील केते धनियाबाद लअय। जोटोः रुटी केचाः-केचाः ते चेलाकुइ ओवाया लअय जोटोः चेलाकु होड़कु तआ ओवा लिड्कुआ। 20गोटे जोम लआकु जोटोः बी यनाकु, जोटोः थोड़ेः एकेन हकु मे से चेलाकु बराह खचली पेरेज् केतेकु अलगाव लआ 21जोम लेनकु मे से लंञीकु जोटोः सेंगोज्‌कु बाय केते लगे भगे पाँच हजार मरदनाकु दोहोलेना।

ईसु दाअ् रआ तेङ रे सेनलअय

(मरकुस 6:46–52; जोहन 6:15–21)

22ईसु होड़कु बिदा केड् तयोम तुरात अनेज् एतेन पहिल चेलाकु डोंगा रे देजोः तअय अचुलिड्कुआ, चि हुँनि एतेन होनहोंरकु सेनोः। 23ईसु हुँकू बिदा केते सुनसन ठाँवरे बिनतीयोः तआ पहार तेङ रे सेनोः लेनय। अयुबोः घनी हुँनि होंडे एसकार ते दोहोलेनय; 24होनाघनी डहा रआ तला रे डोंगा ओत एतेन ढेर संगिञ रे दोहोलेना होना होय ते डगमगाव हिलहो दोहोलेना, चितानतआचि होय अकु पड़ाते तपेजोन दोहोलेना।

25भीनसरा ईसु सेंड़ा डहा दाअ् तेङ ते सेन कोते चेलाकु पड़ाते सोदोरलेनय। 26चेलाकु हुँनि सेंड़ा डहा दाअ् रे से-सेन ञेल लिदियाकु दो घबराव लेनाकु जोटोः “नुई दो भूत हके मेनकेते कथा बिरीड्लेनाकु!” हुँकू बोर ते घोल बिरीड्लेनाकु।

27ईसु हुँकू सुधा झटहेले दुखमा लेनय जोटोः कथालअय, “डीढेपे! इञः हके! अलोपे बोर।”

28पतरस उतारा लअय, “ओय परभु, अगर अमः हके, दो इञः अमः ठँवरे दाअ् ते सेन केते वेजोः तआ हुकुम ओवाइञमी।”

29ईसु कथालअय, “एला वेजोःमी!”

पतरस डोंगा एतेन अड़गु लेनय जोटोः दाअ् तेङ ते सेन केते ईसु पड़ा सेनलअय। 30बकिन हुँनि होय ञेल केते बोरो यानय। जोटोः बुरागोन दोहोनय दो हकाव लअय, “ओय परभु, इञः बंचावेञमी!”

31ईसु तुरात हुँनि अती रे सब् केते संभड़ाव लिदियय जोटोः हुँनि कथावा लिदियय, “ओय दरपुरा सारीयोः-ई, अमः चितान तआ सक लअम?”

32जब हुकिन डोंगा रे देज् लेनाकिन। दो होय ठमकाव यना। 33तब जे डोंगा रे दोहोलेनाकु हुँकू ईसु इकड़ुम कोते कथावा लिदियाकु जोटोः कथा लआकु, “अमः सचमुच परमेसर होपोन हके।”

ईसु काइएक जंडिरा लिनकु नपाय लअय

(मरकुस 6:53–56)

34हुँकू होनहोंर परोम कनते गनेसरत देस रे सोदोरनकु। 35होंडे रेनकु होड़ ईसु थीतव लिदियाकु जोटोः होना पहटा रआ अस पस ते नुई रआ खभाइर गोटाते फयलावयना। जोटोः गोटे जंडिरा लेनकु, हुँनि ठँवरे अगु लिड्कुअकु। 36जोटोः ईसु एतेन गोहराव लेनाकु चि हुँनि अनेज् रआ गेंदराः रआ अँचड़ा ही इकाएर छुवाँववा, जोटोः जे अँचड़ाकु छुवाँव लआ हुँकू नपाय लेनाकु।

Currently Selected:

मती 14: BIX

Highlight

Copy

Compare