Ilinguumamti 1
1
Yasuuꞌa teebiri beeti tafamiya
1Tiyoofilus, aniib ooktaab wꞌawwaliinaay kastooh Yasuuꞌa idꞌiyeet toonaawwa, allamiyaneet toonaawwa dehook aktib. 2Baruuh teebri reewiyaneeb ookiik Eeshuuk Imugaddasaayee waasaab iiktiyeeb ilinguumama sooya. 3Yasuuꞌa lhamiya, malya iyaayt harꞌii, tooyatii idhhaneet toona gwida salalaayee sooya. Fadhig tamuun imbꞌi tiiktiit midda ilinguumamaayee dehaay lawiyaayt Ukwaasanaayt tehadꞌaayi dehaay hadiidiya. 4Door gaal baruuh masi bareeyooh geeb tamee bak waseeya: “Algudusee baagiigaana. Laakiin Baabu waadiyaayaneeb oomiyaaw hagitna. Beet toona suur sooyan hookna. 5Yuuhanna yamee imis hookna. Laakiin shalik imbꞌeeyeeb baraakna Eeshuuk Imugaddasaayee ituumis tiyadna.” idi.
6Aflaay Ilinguumama bariiyooh geeb iifiinihoob, Yasuuꞌaab raatiyaan, “Wꞌankwanaay, oontꞌa baruuk Israaꞌiil tehadꞌaayi dehaay igir tindiya?” idiin.
7Yasuuꞌa bareeyooh dehaay, “Baraak baliit taana ikatiineeb idaman tari timidda kanaantooh kitehariwna. Laakiin ubaaba uubhaat tehadꞌaayeetiisooh dꞌiyaabi. 8Laakiin Aashuuk Imugaddasa kehookna yꞌeenihoob, akrir timeerna. Alguduseebwa, kastooh Yahuudaaywa, Saamiraaywa, toobuuti agiya hadiitwa aree anii badehi tikatiina.” idi.
9Yasuuꞌa een ibhali idiit harꞌii, baraah shibbee akay ibꞌaluukiib gaalhoob hooy kwidhiya. Bareeh shaawti ibꞌaluuk rhisaab kiiki.
10Baruuh teebri reewee, baraah iishbibna. Gaalhoob malu da eera halaka akway idaraagoohna gadee rhiyaan. 11Baraah “Jaliili da, naanhooy tooy tingadiina, teebri tishabibna han? Uun Yasuuꞌa teebri beeti yakamiyaab uukna, toon tehayꞌa haay giigee rhitaaneet haay itꞌigir indi.” idiin.
Matiyaas Yahuudaay mhiin daaya
12Ilinguumama Oorba Saytuun ittiyoodiib ukanbuulii Algudus beeti yꞌagarna. Uurba Saytuun gaal kiiloomitir Algudusee sangi. 13Tumadiina iktimnihoob, oogaw hooy iifiineeb beeti reewiyaan. Beentooy iifiin aree: Siimoon Bitruswa, Yuuhannaabwa, Yaaguubwa, Andaraawooswa, Fiilibuswa, Toomaaswa, Baartulamaawooswa, Mattaabwa, Yaaguub Alfaaꞌiyooswa, Siimoon wꞌashꞌara atoosmaabwa, Yahuudaab Yaaguubi oorwa iiktiin. 14Baraah kassaah hiddaab siileeliin, mꞌat gwaditwa Yasuuꞌiit tuundi Maryamwa geeb immararaayna, isanaayaah han geeb iifiin.
15Beenhoob sheebwa tagwuugw yꞌiin dehay Ukwaasana aamaniin gaal mhiin immararaayna. Bitrus ingadaayt oodehay bhaliisamiya.
16-17Baruuh “Isanaayaan, suur Aashuuk Imugaddasa unabi Daawidi miidalaabii Yahuudaay bhaliib isridna. Aree Aashuuk Imugaddasa idiineet tuuna tiki. Yahuuda hineeb gaalu aree geeboon shagaamiya. Laakiin Yasuuꞌi abuuk yhariw oodehay mitiyaaya.
18Yahuuda imhallaga toomaagti jillaay ittiyeewaayeeb haash haay idlib iyhi. Malya baruuh ifiiree dhibiyaayt ukalawa ibtak, imanaayaah kassaah whaashi kehii ifafna. 19Beet toona imaasiw Alguduseeb uudehay, been oomhiin Akaldama iisimna. Yꞌaraami bhaliyeeb Akaldama, ‘Booyi haash’ miyaadi.
20Tuun tehabayaati kitaabiib kataabtu,
‘Ugawuuh harar baꞌiikti!
Gaal han hooy biikwariyeeb baꞌiikti!’ indi.
Masi aree ‘Tusuurkinaayeeti mhiinooh weer baꞌiikti.’ indi.
21Shaawti Wꞌankwana Yasuuꞌa ibitkeen ikwiirihoob geeboon iifiin eendee ibakii gaal waasni, 22baruuh Yuuhannaab hooy itoomaaseet tumiddaatii, teebri beeti hoon yakamiyaneeb oombꞌi ookiik waasamiini. Uun baruuh ibakii Yasuuꞌiit tooyati yakti kehii badehiib ikati.” idi.
23Aflaay baraah malu da isimna, Yuusif Baarsaabbaas “Yuustuus” atoosmaabwa Matiyaaswa isimna. 24Malya baraah kassaah siileeliyaana, “Wꞌankwanaay! Baruuk kasseeh oodehayi ginꞌaayeeb teefeet toona tikteena. Een eenda imalooyeeb baruuk waasaab tikatiyeeb rhisaa hoon. 25Ulinguumama Yahuudaay mhiin akeetiit shagaamiini. Yahuuda oomhiin wꞌastehaliiniyooh ibaayt hoon giigiya.” idiin. 26Malya baraah gurꞌaat igidna. Beet tugurꞌa Matiyaasii dehaay dhibta. Shaawti baruuh ilinguumamaayeeb tamna malyaab iki.
Currently Selected:
Ilinguumamti 1: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
