Matie 22

Mboo a pfuun li bal

(Luk 14.15-24)

1Yeso oyɛɛn bvool y'embuul m'ãmboo. Ndɛ olieel ndiri: 2«Okwɛn o ywel oli onge ɔ̃kwɛn ngɔmɔ̃ wu obɛɛl pfuun li bal e muaan a ndɛ wu bɔɔl. 3Ndɛ oyuɔɔl asal a ndɛ ayeta baal b'ati mbel ke pfuun mbel. Kɛn a bɔ k'adzii k'aya wɛ. 4Ndɛ oyuɔɔl asal akyam, y'ãyɛɛn m'ɔ̃nywã ndiri: “Eyeyɛɛn b'ati mbel ke pfuun wɛn: Mɛ̃ emeeyɛɛl bvi-odza. Mɛ̃ emeetam k'abam angwɛmbɛ y'anyam a mɛ̃ ba ye mbaal. Mbueel amaayɛɛl, eya pfuun!” 5Kɛn a b'áti mbel ke pfuun k'asiɔɔl mbel yi áti bɔ wɛ, ayɛn li bam. Wɛn oyɛn ãnguun mã ndyam, wɛn oyeta obɔɔ̃ bo ndyam. 6Kɛn a b'asiil asiin asal obɔ, atueel mpal, bu abam. 7Obobɔ, ɔ̃kwɛn mpuru eyi, ndɛ otam ambwel-mbwel a ndɛ k'ayebweel baal obɔ b'abam asal a ndɛ, bvool k'ayetsoo bviil e bɔ mbaa. 8Ndɛ bu alieel asal a ndɛ ndiri: “Bvi-odza e bal amaayɛɛl. Kɛn a b'ati mbel k'abvaan m'odza o bvɛ wɛ. 9Oŋɔ̃ eyi k'ãmboo m'ebvɔɔn ɛ̃siɔɔn, eliaal baal bueel b'èmwɛn byɛ ayedza ke pfuun.” 10Asal ayɛn m'ɛ̃siɔɔn, abvool baal bueel b'emwɛn bɔ okɔ, abi y'abvɛ. Etswi e nzɔ e pfuun bu eluul me b'ati mbel. 11Ɔ̃kwɛn osam me ndɔɔ yi atal b'ati mbel. Ndɛ omwɛn mbuul ngɔmɔ̃ wɛn k'alaal ekɔ e bal wɛ. 12Ndɛ ofuul mbuul ondɛ ndiri: “Ndoo a mɛ̃, yɛ ŋã bwɛn-a-bwɛn sam ekɔ e bal pyɛ?” Kɛn a ndɛ k'abɔɔ yi abveel wɛ. 13Ɔ̃kwɛn bu alieel asal ndiri: “Ekuru ndɛ mviɔɔl ye mviil, etyal ndɛ onse empeel li onkwel-a-nzi. Oyɔ mboo yi ekieel ekal y'elel y'odza o miin.” 14Ke ngwel wɛ, b'ati mbel ali bibi, kɛn a b'asueel ali atsi-tsiri.»

Mpal yi ɔ̃kwɛn Sedzaal

(Mak 12.13-17; Luk 20.20-26)

15Obobɔ, Afalisaye ayekuru mfoo me ndɔɔ yi abii elyal ki asiin Yeso m'ãyɛɛn ã ndyam. 16Bɔ ayuɔɔl ndɛ ayio a bɔ ke kwɛ ye baal ba nkel yi Elode ayefuul ndɛ ndiri: «Ɔ̃tee, bee eyɛɛ kwɛn yɛ abeliaal otaa-taa bvool abeyiool baal nkuul a Nziã onse otaa-taa bueel. Yɛ ke li ye buɔ o mbuul wɛ, ke ngwel wɛ yɛ ke li y'ɔ̃bɛɛ wɛ. 17Oŋɔ̃ meliaal bee bam b'etsam yɛ me ndɔɔ yi: Awi baal nkuul yi afuru mpaa yi ɔ̃kwɛn Sedzaal, wuo k'awi yɔ wɛ?» 18Kɛn a Yeso wu ayɛɛ ãtsam ã bɔ m'ãbi, obveel bɔ bubu: «Baal a pfuru! Ki eywiin byɛ mɛ̃ bɛɛ emã? 19Esuo mɛ̃ nzi yi abefuru mpal.» Bɔ asuo ndɛ nzi yi ãbvieel ngamɔ̃. 20Ndɛ ofuul bɔ ndiri: «Nkal a nzi yi eli y'osu o mbuul ye nkuũ a ndɛ. Ke mbuul ondɛ nã?» 21Bɔ abveel ndiri: «Mbuul ondɛ Sedzaal.» Yeso bu alieel bɔ ndiri: «Eluɔ bvi Sedzaal, ewa Sedzaal, bvi Nziã, ewa Nziã.» 22Ŋ'eyoo bɔ ɔ̃mveel ondɛ, esi bɔ ɛ̃kam bibi. Bɔ asiil ndɛ, bu asiin nkuul ayɛn.

Ɔ̃mfuul me ndɔɔ osiool o b'ákwi-ákwi

(Mak 12.18-27; Luk 20.27-40)

23Tsoo alili, asaduseyɛ̃ ayi ola Yeso. Bɔ baal bɛn k'abekiool wɛ kwɛn b'ákwi akieel asiool. Bɔ afuul Yeso bubu: 24«Ɔ̃tee, Moyize álieel ndiri: “Ŋɛn bɔɔl okwi k'asiil muaan wɛ, muaan-ngoo a ndɛ àwal ɔ̃pfiil, kwɛn bɔ abuo ɔ̃pfu esii e baal#Det 25.5-6.” 25Ŋ'esa oŋɔ̃, onse bee baan b'abɔɔl áli nsiaan. Muaan wu ɛ̃kwel obaal ɔ̃kal, okwi. Onge bɛn ndɛ k'abɔɔ muaan y'ɔ̃kal ondɛ wɛ, ndɛ osiil ɔ̃pfiil me muaan-ngoo. 26Esi kɛn a obobɔ, me muaan wa buaal, ye wu atyel tiil wa nsiaan. 27Ke mbee a bɔ bueel, ɔ̃kaal ondɛ hɛ̃ okwi. 28Ke ŋ'ekieel esiool b'ákwi-ákwi, ndɛ àkal ɔ̃kal nã onse baan-ngoo ange-nsiaan? Ke ngwel wɛ, bɔ bueel ábaal ndɛ!» 29Yeso obveel bɔ ndiri: «Byɛ k'eli y'ɔ̃dzoo wɛ, me ndɔɔ yɛn byɛ k'eyɛɛ m'ákel onse Ɔ̃nkaan a Nziã wɛ, byɛ hɛ̃ k'eyɛɛ waan e ndɛ wɛ. 30Ke ngwel wɛ, ŋ'ekieel esiool baal, akaal y'abɔɔl k'àbaal bakyɛ wɛ. Kɛn a bɔ akieel akal onge ãnzwel ke ywel. 31Me b'otal osiool o b'ákwi-ákwi, byɛ kɛn etsiɔ b'élieel Nziã byɛ wɛ? Ndɛ mpii álieel ndiri: 32“Mɛ̃, mɛ̃ ndi Nziã a Abalayam, Nziã a Isak, Nziã a Dzakab#Opa 3.6,15.”» Yeso olweel bubu: «Nziã k'ali Nziã a b'ákwi-ákwi wɛ, ndɛ oli Nziã a baal b'amwiĩ-mwiĩ.» 33Embuul e baal ki ékeyoo ndɛ ékekam bibi me m'ékeyiool ndɛ.

Ngel yi enduru mãkyɛ

(Mak 12.28-34; Luk 10.25-28)

34Afalisaye ayoo ndiri Yeso okuru asaduseyɛ̃ ɛ̃nywã. Bɔ bu abvɔɔn. 35Ngɔmɔ̃ onse bɔ áli ɔ̃yiool-ãngel. Me ndɔɔ yi akie Yeso, ndɛ oyefuul ndɛ ndiri: 36«Ɔ̃tee, onse ãngel mam mbueel, ngel yi enduru mãkyɛ yɛn?»

37Yeso obveel ndiri: «“Yɛ àdzii Mfam Nziã a yɛ m'ɔ̃kwal a yɛ ndyam wueel, m'omwiĩ o yɛ bam bueel, m'ãtsam ã yɛ mam mbueel#Det 6.5.” 38Oyɔ ngel yi enduru mãkyɛ bvool yi nkiin. 39Tal yi mbuaal yi efɛɛn onge oyɔ: “Yɛ àdzii ngaburu-mbuul onge b'edzii yɛ nzuru a yam#Lev 19.18.” 40Ngel a Moyize yam yueel y'ãtee m'aliaal-ɛ̃kiɛɛn a Nziã mam mbueel ãli onse ãngel ãnge-mbuaal omɔ̃.»

Mãsia ye David

(Mak 12.35-37; Luk 20.41-44)

41Afalisaye ábvɔɔn mboo mɔ̃, Yeso bu afuul bɔ ɔ̃mfuul wu: 42«B'etsam byɛ omã me Mãsia? Ndɛ Muaan a nã ali?» Bɔ abveel ndiri: «Mãsia oli muaan a David.» 43Yeso olieel bɔ ndiri: «K'otsɛn omã bɛn David, ŋ'éluul ndɛ m'Ɔ̃fel áti ndɛ me “Mfam”? Ke ngwel wɛ, David álieel ndiri:

44“Mfam oyɛɛn ye Mfam a mɛ̃ bubu:

Y'abva nsɛn ke kuɔɔl e mɛ̃ ki elam,

tiil ye k'esuul mɛ̃ ataal a yɛ ke nsɛn a ntaã e yɛ#Ãnz 110.1.”»

45«Okɛɛn David oti Mãsia me “Mfam”, emfa emã kyɛn Mãsia bvool akal muaan a David?» 46Mbuul si ngɔmɔ̃ onse Afalisaye k'ákoo k'abveel Yeso ndɔɔ wɛ. Obobɔ, bɛɛn tsoo olɔ, mbuul si ngɔmɔ̃ wu ákie bvool k'afuul ndɛ ɛ̃mfuul k'áli wɛ.

Currently Selected:

Matie 22: ngz

Highlight

Copy

Compare