Matie 21

Osam o Yeso Yelusalem

(Mak 1.1-11; Luk 19.28-40; Dzã 12.12-19)

1Yeso y'ayio a ndɛ atɔ tsotsoo a Yelusalem, sua ola bo Betefadze, nku-a-ku a nkio a ɛ̃ti mi Olibve. Ndɛ bu atam ayio buaal. 2Ndɛ olieel bɔ ndiri: «Eyi onse ola b'otaal ke nkwel a byɛ ba, byɛ èmwɛn ane wu ɔ̃kal wu atsɔɔn me swɛ, ye muaan wu ɔ̃lam tsotsoo a ndɛ, enyiɔɔn bɔ, eya mɛ̃ ye bɔ. 3Okɛɛn mbuul ofuul byɛ ɔ̃mfuul, byɛ ebveel ndɛ wɛn: “Mfam oli ye kɔɔ e bɔ.” Alili oŋɔ̃, ndɛ àyɔɔl bɔ aya.» 4Ãndɔɔ ãbwel obobɔ, kwɛn asa ndɔɔ yi élieel ɔ̃liaal-ɛ̃kiɛɛn a Nziã ndiri:

5«Eliaal nsam a ɔ̃kaal wa Siɔ̃ wɛn:

Tal, Ɔ̃kwɛn a yɛ aya ola yɛ,

ndɛ oluul m'efyɛ, onɔɔn nkal ane wu ɔ̃kal,

nkal a muaan a ane wu ɔ̃lam, muaan a nyam wu ɔ̃mbiri ãpfuũ#Dzã 9.9.»

6Ayio ayesa b'etam Yeso bɔ osa. 7Bɔ abiri ane wu ɔ̃kal ye muaan wu ɔ̃lam. Bɔ ayel ekɔ e bɔ nkal a bɔ, Yeso bu abvi nsɛn ke ywel a bɔ. 8Embuul e baal ki bibi eyel ekɔ e bɔ nkal a nkuul. Bakyɛ atsiil epuun bvi ɛ̃ti, bu ayel bvɛ nkal a nkuul. 9Embuul ki ékeyi ke nkwel a Yeso ye ki ékeya ke mbee a ndɛ bu ebvi obiool ndiri:

«Odzana#21.9 Odzana M'ɔ̃nywa wu Ebele ŋ'aliaal ndiri: «Y'awuaal a bee!» me Muaan a David!

Yɔɔl kwɛn wu aya me nkuũ a Mfam akal y'ondɔɔl o kuɔɔl!

Odzana ke ywel li enduru ɔ̃ndel!#Ãnz 118.25-26 »

10Ŋ'esam Yeso onse Yelusalem, ekiin ebvi onse bviil lam lueel. Baal abvi ofuul ndiri: «K'ondɛ mbuul nã?» 11Embuul ékebveel ndiri: «Eli Yeso wu ɔ̃liaal-ɛ̃kiɛɛn a Nziã wa bviil li Nadzalet ke Ngalile.»

Yeso otswɛɛl atiɔ onse Nzɔ a Nziã

(Mak 11.15-19; Luk 19.45-48; Dzã 2.13-22)

12Yeso osam onse Nzɔ a Nziã, bu abvi baal bueel b'áketiɔ ye b'ákesuun eluɔ onse yɔ otswɛɛl. Ndɛ obal amisa a b'ákeswɛɛl nzi y'ãkiri ã b'áketiɔ ãkuun. 13Ndɛ olieel bɔ ndiri: «Onse ɔ̃nkaan wa ngel, ákel bubu:

“Nzɔ a mɛ̃, àta yɔ me nzɔ a ãbuɛɛn”.

Kɛn a byɛ, byɛ emeekaal yɔ eyii mboo yi edziɔɔn baal a pfuul!#Edz 56.7; Dze 7.11»

14Ɛ̃nkwa-mviil ye baal b'adzuu tetɔɔ̃ asyel tsotsoo a Yeso onse Nzɔ a Nziã, ndɛ bu oboo bɔ. 15Kɛn amfam b'angaa-a-Nziã, y'ayiool b'ãngel ayoo nkyee bibi ŋ'emwɛn bɔ ãndɔɔ m'ɛ̃kam m'ékesa ndɛ, ye ŋ'emwɛn bɔ baan b'ákebiool onse Nzɔ a Nziã ndiri: «Odzana me Muaan a David!» 16Bɔ alieel Yeso ndiri: «Yɛ ayoo m'eyɛɛn baan ba?» Ndɛ obveel bɔ ndiri: «Hɛɛ̃! Byɛ lɔɔ-okal kɛn etsiɔ ãyɛɛn mã wɛ ndiri: “M'ɔ̃nywã a baan b'atsi-atsi ye wa b'anywã ãbiaal, yɛ bɔɔ lweel#Ãnz 8.3”?» 17Ke mbee oŋɔ̃, ndɛ osiil bɔ, opal onse bviil, oyɛn Betani, bu alaal okɔ.

Ɔ̃ti a fig wu oywɛn a nsia

(Mak 11.12-14,20-24)

18M'epal, ŋ'eyii ebvool ndɛ bviil, ndɛ nzal ewel. 19Ndɛ omwɛn ɔ̃ti a fig nku-a-nku a nkuul. Ndɛ osyel tsotsoo a ndɛ, omwɛn kɛn a ãsɔɔ ãtu. Ndɛ bu alieel ɔ̃ti ondɛ bubu: «Yɛ kieel k'abeburu esia lam wɛ!» Ɛ̃kiri-a-nka oŋɔ̃, ɔ̃ti okɛɛ. 20Ŋ'emwɛn ayio obobɔ, bɔ akam bibi. Bɔ afuul Yeso ndiri: «Ɔ̃ti a fig wu okɛɛ kɛn ɛ̃kiri-a-nka ŋã, bwɛn a bwɛn?» 21Yeso obveel bɔ ndiri: «Taa-taa bam, m'eyɛɛn byɛ wɛn, ŋɛn byɛ eli y'okiool, bvool k'esi enkyam wɛ, byɛ k'esa kɛn a be nsi mɛ̃ m'ɔ̃ti a fig wu wɛ. Kɛn a ŋɛn byɛ hɛ̃ eyɛɛn nkio yi wɛn: “Mbal oŋɔ̃ y'atyal nzuru onse ãdza m'ɔ̃ngwa”, ãndɔɔ ãbwel obobɔ. 22Ãndɔɔ mbueel m'èbii byɛ m'ãbuɛɛn y'okiool, byɛ èbɔɔ mɔ̃.»

Omfam o Yeso kwɛn ofi?

(Mak 11.27-33; Luk 20.1-8)

23Yeso bvool oyɛn onse Nzɔ a Nziã. Me lio li éketee ndɛ, amfam b'angaa-a-Nziã y'akuul-kuul ayefuul ndɛ bubu: «Omfam b'ebesa yɛ ãndɔɔ mã bɛn? Wu owi yɛ omfam obɔ nã?» 24Yeso obveel bɔ bubu: «Mɛ̃, mɛ̃ hɛ̃ èfuul byɛ ɔ̃mfuul ndyam ngɔmɔ̃. Byɛ ebveel mɛ̃ ndɛ, mɛ̃ èyɛɛn byɛ omfam b'ebesa mɛ̃ ãndɔɔ mã. 25Wu áyuɔɔl Dzaã me ndɔɔ yi awa baal opongo nã: Nziã wuo baal?» Bɔ bu abvi otsuun bam-a-bam ndiri: «Bia-byɛ ebveel ndɛ wɛn: “Wu áyuɔɔl ndɛ Nziã”, ndɛ mpii ol'ofuul bia-byɛ ndiri: “Ke byɛ ébee ndɛ okiool emã?” 26Kɛn a ŋɛn bia-byɛ ebveel ndɛ wɛn: “Wu áyuɔɔl ndɛ baal”, oŋɔ̃ bia-byɛ ekal y'onkyab me ndɔɔ embuul! Ke ngwel wɛ bɔ bueel abekiool ndiri Dzaã áli ɔ̃liaal-ɛ̃kiɛɛn a Nziã.» 27Obobɔ, bɔ abveel Yeso ndiri: «Bee k'eyɛɛ wɛ.» Yeso bu abveel bɔ ndiri: «Mɛ̃, mɛ̃ hɛ̃ k'èyɛɛn byɛ omfam b'ebesa mɛ̃ ãndɔɔ mã wɛ.»

Mboo a baan buaal

28Yeso olweel bubu: «Byɛ etsam omã me ndɔɔ yi: Mbuul ngɔmɔ̃ áli ye baan b'abɔɔl buaal. Ndɛ olieel muaan wu ɛ̃kwel ndiri: “Muaan a mɛ̃, yi y'asal nonɔ̃ onse nguun a bvine.” 29Muaan obveel ndɛ ndiri: “Mɛ̃ ke nzii wɛ.” Kɛn a ke mbee oŋɔ̃, ndɛ oswɛɛl ãtsam, bu ayɛn. 30Tal olieel muaan wa buaal ndɔɔ yiyi. Muaan obveel bubu: “Hɛɛ̃, mɛ̃ èyi taal.” Kɛn a ndɛ k'ayɛn wɛ. 31Onse bɔ ange-buaal, muaan wu osi b'edzii tal nã?» Bɔ abveel ndiri: «Eli muaan wu ɛ̃kwel.» Obobɔ, Yeso olieel bɔ bubu: «Taa-taa bam, mɛ̃ eyɛɛn byɛ wɛn, atwal-mpal y'akaal-nga-esio asam Okwɛn o Nziã nkwel a byɛ. 32Ke ngwel wɛ, Dzaã oyi ola byɛ me ndɔɔ yi asuo byɛ nkuul yi dzu, byɛ k'ekiool ndɛ wɛ. Kɛn atwal-mpal y'akaal-anga-abɔɔl akiool ndɛ. Onkyam ŋ'emwɛn byɛ obobɔ, byɛ k'eswɛɛl ãtsam ã byɛ, me ndɔɔ yi ekiool ndɛ wɛ.»

Mboo a asal a bvine b'abi-abi

(Mak 12.1-12; Luk 20.9-19)

33«Eyoo mboo yinkyɛ. Éli ye mfam a nzɔ ngɔmɔ̃ wu ákwɛn nguun a bvine. Ndɛ odzii yɔ ekɔɔ, otsam ywɛn onse yɔ me ndɔɔ yi akɛɛl nsia, bvool otuu nzɔ yi nkal a ywel yi ekal ɔ̃nkiaal. Ndɛ osiil yɔ me mviɔɔl mi asal, bu ayɛn dzwɛ. 34Ŋ'eyii koo lio li aka nsia, ndɛ oyuɔɔl ankyal a ndɛ ol'asal ba ke nguun, kwɛn bɔ awa boo e bvine li ndɛ. 35Kɛn asal asiin ankyal obɔ, abɛɛl wumɔ̃, abam wukyɛ, wumɔ̃ bvool bɔ atyel ãnkɔɔn. 36Ndɛ oyuɔɔl bvool ankyal akyam b'anduru b'ɛ̃kwel m'olɔɔ. Asal asi obɔ hɛ̃ emfa kiki. 37K'osɛɛl, ndɛ oyuɔɔl bɔ muaan a ndyam, y'ãtsam mã: “Bɔ ol'awel muaan a myam ye bvɛɛ.” 38Kɛn a ŋ'etaal asal muaan, bɔ abvi bam-a-bam oyɛɛn ndiri: “Etal wu akieel awal ɔ̃swal! Eya ebam ndɛ, kwɛn ɔ̃swal akal wa bia-byam!” 39Obobɔ, bɔ asiin ndɛ, apaal ndɛ onse nguun a bvine, bu abam ndɛ. 40Ke ŋ'èya nga-nguun a bvine, ndɛ asal obɔ bwɛn asa?» 41Amfam b'angaa-a-Nziã abveel Yeso ndiri: «Ndɛ àtam k'abam asal b'abi obɔ, nyiĩ pyɛ. Ndɛ àbuun nguun a ndɛ a bvine m'asal akyam, bɛn me lio li aka nsia, awa boo e bvine li ndɛ.»

42Yeso bu alieel bɔ ndiri: «Byɛ lɔɔ-okal kɛn etsiɔ m'ákel onse ɔ̃nkaan a Nziã mã wɛ:

“Nkɔɔn yi éti atuu pfɛɛ,

eyii nkɔɔn yi nkiin yi nzɔ.

Ndɔɔ oyɔ efi ola Mfam,

eli ndɔɔ yi ɛ̃kam ke mviil ã bia-byɛ#Ãnz 118.22-23!”»

43Yeso olweel bubu: «Obɔ otsɛn bɛn, mɛ̃ eyɛɛn byɛ wɛn, akieel ambaal Okwɛn o Nziã me mviɔɔl ɛ̃ byɛ, àwa bɔ me yam e baal ekyam li ekieel eburu nsia e bɔ. [44Mbuul wu àbva nkal a nkɔɔn oyɔ, àkiɔɔl. Yɔ ebva nkal a mbuul, yɔ èkyɛɛl ndɛ#21.44 Ndɔɔ yi k'ákel yɔ onse ɛ̃nkaan mikyɛ mi tsɔɔn-tsɔɔn wɛ..]»

45Ŋ'eyoo amfam b'angaa-a-Nziã y'Afalisaye ãmboo omɔ̃, bɔ abɔɔ otsɛn kwɛn Yeso ákeyɛɛn ãndɔɔ omɔ̃ me bɔ. 46Obobɔ, bɔ aboobii ãyal m'asiin ndɛ, kɛn a bɔ ayoo buɔ o baal, me ndɔɔ yɛn baal ákewal ndɛ onge ɔ̃liaal-ɛ̃kiɛɛn a Nziã.

Currently Selected:

Matie 21: ngz

Highlight

Copy

Compare