Matie 20

Mboo a asal b'onse nguun a bvine

1«Ke ngwel wɛ, etal emfa ki eli Okwɛn o ywel: Mfam a nzɔ ngɔmɔ̃ opal epal-epal kwɔɔl me ndɔɔ yi ayebii baal b'ayesal onse nguun a ndɛ yi bvine. 2Ndɛ ye bɔ akuru kwɛn furu li ɔ̃sal a bɔ me tsoo eli li nzi yi ãbvieel ngamɔ̃. Ndɛ bu ayuɔɔl bɔ onse nguun a bvine a ndɛ. 3Ndɛ bvool opal m'epal sua lio li bva, omwɛn baal akyam b'akɛɛn ke taan. 4Ndɛ olieel bɔ ndiri: “Byɛ hɛ̃, eyi onse nguun a mɛ̃ yi bvine, mɛ̃ èwa byɛ furu li ekoo.” 5Bɔ bu ayɛn okɔ. Ndɛ bvool opal ŋ'eyii sua tal dzu bvool me lio ãtyel ŋ'emeebɔɔn tal, bu asi bubu. 6Ndɛ bvool opal sua lio li ãtaan ŋ'emebɔɔn tal, bu amwɛn baal akyam b'atɛɛn ke taan. Ndɛ olieel bɔ ndiri: “Ndɔɔ mã yi etɛɛn byɛ ŋã ki esa pyɛ pipi wu ɔ̃tsiin?” 7Bɔ abveel ndɛ ndiri: “Me ndɔɔ yɛn mbuul wu owel bee k'ɔ̃sal pyɛ.” Ndɛ olieel bɔ bubu: “Oŋɔ̃ byɛ hɛ̃ eyi onse nguun a mɛ̃ ye bvine.”»

8«Ŋ'etɔ ãnkunkwal, nga-nguun a bvine olieel mbuul wu atal ɛ̃sal ɛ̃ ndɛ ndiri: “Ta asal mbel, wa bɔ furu e bɔ. Bɛɛn me b'ãmbee, sɛɛl me b'ɛ̃kwel.” 9Baal b'ewel ndɛ sua lio li ãtaan ŋ'emeebɔɔn tal, ayi, abɔɔ furu li nzi yi bvieel ngamɔ̃ me mbuul bwɛn a mbuul. 10Ŋ'etɔ ɔ̃nkaal wa baal b'ɛ̃kwel, bɔ ayii atsam ndiri bɔ al'abɔɔ nzi yi enduru. Kɛn a bɔ hɛ̃ abɔɔ kɛn a furu li nzi yi bvieel ngamɔ̃ me mbuul bwɛn a mbuul. 11Ŋ'ebɔɔ bɔ lɔ, bɔ ayoo nkyee ye nga-nguun, 12bu alieel ndiri: “Baal b'ayi ãmbee ba, asal kɛn a me lio ngemɔ̃, yɛ furu bɔ emfa ngemɔ̃ ye bee b'esal eyool a mwiĩ pipi wu ɔ̃tsiin, ɛ̃furu ɛ̃fi!” 13Ndɛ obveel ngɔmɔ̃ onse bɔ bubu: “Ndoo a mɛ̃, mɛ̃ ke nsi yɛ obi wɛ. Bia-yɛ k'ekuru wɛn furu li ɔ̃sal a yɛ eli li nzi yi ãbvieel ngamɔ̃ wɛ? 14Wal furu e yɛ, yi li yam. Myam mbuul wu nzii k'ewa wu obɛɛn ɔ̃sal ãmbee furu lili li mfuru mɛ̃ yɛ. 15Mɛ̃ ke nkoo k'esa be nzi mɛ̃ me nzi e myam wɛ? Wuo, yɛ akwa mɛ̃ nsɔɔ me ndɔɔ yɛn mɛ̃ ndi mbuul wa ngesɛ?” 16Obɔbɔ, ba nkwel akieel akal ba mbee, ba mbee akieel akal ba nkwel.»

Yeso oyɛɛn li nsa tyel me ndɔɔ okwa y'osiool o ndɛ

(Mak 10.32-34; Luk 18.31-34)

17Ŋ'ékeyi Yeso Yelusalem, ndɛ obiri ayio kuun ye buaal me pyɛ, olieel bɔ me nkuul a nkuul ndiri: 18«Etal, bia-byɛ ŋ'eyi Yelusalem, okɔ àtiɔ Muaan a mbuul me mviɔɔl mi amfam b'angaa-a-Nziã y'ayiool b'ãngel. Bɔ àwa ndɛ etumbu ki epfu. 19Bɔ àtiɔ ndɛ me mviɔɔl ɛ̃ baal bɛn k'ayɛɛ Nziã wɛ, kwɛn bɔ asɔɔl ndɛ, abɛɛl ndɛ, bvool abɛɛl ndɛ m'enkulusu. Me tsoo li ãtyel, ndɛ àsiool.»

Ngoo a Dzak bwɛn a Dzaã osɔɔ ndɔɔ ngamɔ̃ ola Yeso

(Mak 10.35-45)

20Obobɔ, ngoo a baan a Dzebede oyi tsotsoo a Yeso ye baan a ndɛ b'abɔɔl, obvi ãbuo ke nkwel a ndɛ, me ndɔɔ yi asɔɔ ndɔɔ ngamɔ̃ ola ndɛ. 21Yeso bu afuul ndɛ bubu: «Ki edzii yɛ mã?» Ndɛ obveel ndɛ ndiri: «Kiool kwɛn, onse Okwɛn o yɛ, baan a mɛ̃ ange-buaal ba abva nsɛn, wɛn me nkuɔɔl e yɛ ki elam, wɛn me ki ekal.» 22Yeso obveel ndiri: «Byɛ k'eyɛɛ ki esɔɔ byɛ wɛ. Byɛ ol'ekoo k'enywã mbiɔ yi eyenywã mɛ̃?» Bɔ abveel ndɛ ndiri: «Bee ol'ekoo.» 23Yeso olieel bɔ bubu: «Byɛ ekieel enywã mbiɔ a mɛ̃. Kɛn a me b'otal obva o nsɛn me kuɔɔl e mɛ̃ ki elam wuo ki ekal, wu atsiil ndɔɔ oyɔ ke mɛ̃ wɛ, ãmboo omɔ̃ ãli mã baal b'éyɛɛl Tal a mɛ̃ bɔ mɔ̃.»

24Ŋ'eyoo ayio kuun b'asiil ãndɔɔ omɔ̃, bɔ ayoo nkyee ye baan-ngoo ange-buaal. 25Obobɔ, Yeso oti bɔ mbel, bu alieel bɔ bubu: «Byɛ eyɛɛ wɛn, b'ebewal baal onge amfam b'ɛ̃kiri atuaal baal a bɔ mpal, baal b'anɛn hɛ̃ abenyam ɛ̃kiri ɛ̃ bɔ m'onyam. 26Kɛn a yɔɔl kwɛn ebee obobɔ okal onse byɛ. Mbuul wu odzii k'anduru bakyɛ onse byɛ, àkal ɔ̃sal a byɛ. 27Bvool mbuul wu odzii k'akal wu ɛ̃kwel onse byɛ, àkal ɔ̃nkyal a byɛ. 28Obɔ otsɛn bɛn, Muaan a mbuul k'ayi me ndɔɔ yɛn baal asal me ndɔɔ a ndɛ wɛ, ndɛ oyi me ndɔɔ yi asal me ndɔɔ a baal bvool me ndɔɔ yi awa elaã e ndɛ onge ɔ̃bvɛn wu afuru, me ndɔɔ yi abvuul ɔ̃bɔbɔ a baal.»

Yeso obvuul ɛ̃nkwa-mviil mviaal ke Dzeliko

(Mak 10.46-52; Luk 18.35-43)

29Ŋ'epal Yeso y'ayio a ndɛ onse Dzeliko, embuul ki bibi eluɛɛn a ndɛ. 30Baal b'ɛ̃nkwa-mviil buaal abvi nsɛn me pyɛ e nkuul. Bɔ ayoo ndiri Yeso abwel, bu abvi obiool ndiri: «Muaan a David, Mfam, sio bee nyiĩ!» 31Embuul ebvi bɔ opɛɛn ndiri: «Esuul nkyal!» Kɛn a bɔ bvool abiool bam kokɔ ndiri: «Mfam, Muaan a David, sio bee nyiĩ!» 32Yeso otɛɛn bvool oti bɔ mbel, bu afuul bɔ ndiri: «Ndɔɔ mã yi edzii byɛ kwɛn mɛ̃ nsa byɛ?» 33Bɔ abveel ndɛ ndiri: «Mfam, yɔɔl kwɛn mviil ã bee ãdzweel nzuru!» 34Yeso nyiĩ a bɔ ebɔɔ, ndɛ bu anywɛn me mviil ã bɔ, ɛ̃nkiri-a-nka oŋɔ̃, bɔ abɛɛn omwɛn bvool. Bɔ bu aluɛɛn a ndɛ.

Currently Selected:

Matie 20: ngz

Highlight

Copy

Compare