Matie 19

Okwa o bal

(Mak 10.1-12)

1Ŋ'eman Yeso ãndɔɔ omɔ̃ oliaal, ndɛ ombal nsie yi Ngalile, bu ayɛn ke nsie ki Yude yi ongwel a nzal yi Dzolodɛ̃. 2Embuul ki bibi eluɛɛn a ndɛ, oŋɔ̃ ndɛ oboo anga-ãluu. 3Afalisaye ke kwɛ asyel tsotsoo a ndɛ me ndɔɔ yi aywiin ndɛ bɛɛ m'ɔ̃mfuul wu: «Awi bɔɔl nkuul yi abee ɔ̃kal m'elyal kyam k'emã?» 4Yeso obveel bɔ bubu: «Byɛ k'etsiɔ m'ákel mã wɛ: “K'obɛɛn Nziã wu ábuo ɔ̃kiri ási mbuul bɔɔl y'ɔ̃kaal wɛ#Obɛ 1.27?” 5Nziã bvool álieel bubu: “Obɔ otsɛn bɛn, bɔɔl akieel ambal ola tal ye ngoo a ndɛ, me ndɔɔ yi akuru nzuru m'ɔ̃kal a ndɛ, obobɔ bɔ ange-buaal akieel akal nzuru ngamɔ̃#Obɛ 2.24. 6M'emfa okyɛ, bɔ k'àbekal baal buaal wɛ, ayii kɛn a mbuul ngɔmɔ̃.” Oŋɔ̃ yɔɔl kwɛn b'ebvool Nziã, mbuul abee bɔ otsal!» 7Afalisaye afuul ndɛ ndiri: «K'otsɛn omã b'éwi Moyize ngel yɛn bɔɔl m'obee b'ɔ̃kal, obvie owi ndɛ ɔ̃nkaan wu okwa o bal?» 8Ndɛ obveel bɔ bubu: «Okɛɛn Moyize áwi byɛ nkuul yi ebee akal me ndɔɔ ɛ̃tswɛ mpɛn ɛ̃ byɛ. K'obɛɛn, k'éli obobɔ wɛ. 9Kɛn a mɛ̃ eyɛɛn byɛ wɛn, mbuul wu obee ɔ̃kal, okɛɛn ke me ndɔɔ abɔɔl wɛ, bvool oyebaal ɔ̃kal ɔ̃kyam, ŋ'adzuu y'anga-ɔ̃kal.»

10Ayio alieel ndɛ ndiri: «K'okɛɛn emfa ki ekal ɔ̃lam ke nkwel a ɔ̃kal kyɛ okyɛ, onsoo abee obaal.» 11Ndɛ obveel bɔ bubu: «Baal bueel k'abɔɔ oyɛɛn obɔ otsɛn wɛ, b'abɔɔ bɔ otsɛn kɛn a b'ewi Nziã mpwee oyɔ. 12Ke ngwel wɛ, eli y'ãndɔɔ bibi m'ãsa kwɛn baal k'abebaal wɛ: Bɛn me ndɔɔ yɛn bɔ ɛ̃nguo ɛ̃́kwi fa mwiĩ a ngoo, bɛn me ndɔɔ yɛn ámbaal bɔ obɔɔl, bɛn bvool me ndɔɔ Okwɛn o ywel. Yɔɔl kwɛn wu okoo k'akwaal otsɛn, akwaal otsɛn!»

Yeso ye baan

(Mak 10.13-16; Luk 18.15-17)

13Ke mbee oŋɔ̃, abiri baan ola Yeso, kwɛn ndɛ andɔɔl bɔ mviɔɔl bvool abuɛɛn me bɔ. Kɛn ayio ayiaan baal obɔ. 14Obobɔ, Yeso oyɛɛn ndiri: «Eyɔɔl baan, ebee bɔ nkuul okii yi aya ola mɛ̃. Ke ngwel wɛ, Okwɛn o ywel oli bo baal b'ali onge bɔ.» 15Ndɛ ondɔɔl bɔ mviɔɔl, bu ambal oŋɔ̃.

Nsam a bɔɔl yi ɔ̃pfel

(Mak 10.17-31; Luk 18.18-30)

16Enseel oŋɔ̃, bɔɔl ngɔmɔ̃ osyel tsotsoo a Yeso, bu afuul ndɛ ndiri: «Ɔ̃tee, yi esa mɛ̃ yi mvɛ mã, kwɛn mɛ̃ mbɔɔ elaã li ɔ̃bu nkal ɔ̃bu?» 17Yeso obveel ndɛ ndiri: «Ndɔɔ mã yi efuul yɛ mɛ̃ ɔ̃mfuul me b'otal ndɔɔ yi mvɛ? Mbuul wu ɔ̃bvɛ kɛn a ngɔmɔ̃. Okɛɛn yɛ dzii k'asam onse elaã, kiaal ãngel.» 18Ndɛ ofuul Yeso ndiri: «Ãngel mɛn?» Yeso obveel ndɛ bubu: «Oyɛɛ ke bam mbuul wɛ. Oyɛɛ ke dzuu y'ɔ̃kal wuo y'ɔ̃lam a mbuul wɛ. Oyɛɛ ke buru mbuul ãndɔɔ wɛ. Oyɛɛ ke turu eluɔ e mbuul wɛ. 19Lweel tal ye ngoo a yɛ, bvool dzii ngaburu-mbuul onge b'edzii yɛ nzuru a yam.» 20Nsam a bɔɔl elieel Yeso ndiri: «Mɛ̃ nkieel ãngel omɔ̃ mbueel. Ki eywɛn me mɛ̃ bvool emã?» 21Yeso olieel ndɛ bubu: «Okɛɛn yɛ dzii k'akal mbuul wu ɔ̃koo, yi, tiɔ opfel o yɛ bueel, kab aywal nzi oyɔ. Obobɔ, yɛ àbɔɔ opfel ke ywel. Ke mbee oŋɔ̃, ya, bvool luɛɛn a mɛ̃!» 22Ŋ'eyoo nsam a bɔɔl obobɔ, ndɛ oyɛn y'ãwua mbueel. Ke ngwel wɛ, ndɛ áli y'obɔɔ bibi. 23Yeso olieel ayio a ndɛ bubu: «Taa-taa bam, mɛ̃ eyɛɛn byɛ wɛn, eli ye fool kwɛn ɔ̃pfel asam Okwɛn o ywel. 24Mɛ̃ bvool eyɛɛn byɛ wɛn, eli ye fool kwɛn nyam wu ɔ̃mbiri ãpfuũ wu ata me swamo abwel onse pfee e nyuɔ̃. Kɛn osam b'ɔ̃pfel Okwɛn o Nziã, oyɔ ndɔɔ yi enduru fool yam.» 25Ŋ'eyoo ayio obobɔ, bɔ akam bam bibi, bu ayɛɛn ndiri: «Ke m'emfa okyɛ, wɛn ol'obvuul nã?» 26Yeso otal bɔ, bu alieel bɔ bubu: «Ãndɔɔ mɛn baal k'akoo k'asa wɛ, Nziã okoo k'asa mɔ̃ mbueel.» 27Piɛɛl ayebvuru oyɛɛn, olieel Yeso ndiri: «Meyoo, bee bam esiil eluɔ bvieel me ndɔɔ yi eluɛɛn a yɛ. Kieel bwɛn ekal me ndɔɔ a bee?» 28Ndɛ obveel bɔ ndiri: «Taa-taa bam, mɛ̃ eyɛɛn byɛ b'eluɛɛn a mɛ̃ wɛn, ŋ'ekieel ebva Muaan a mbuul nsɛn nkal a kiri e ndɛ li lweel onse ɔ̃kiri wu ɔ̃nyiɔɔn, byɛ hɛ̃ ekieel ebva nsɛn nkal ãkiri kuun ye mbuaal me ndɔɔ yi etsiil ãndɔɔ m'ãyam ãnge-kuun ye mbuaal m'Isalayel. 29Bvool mbuul wueel wɛn me ndɔɔ a nkuũ a mɛ̃ osiil ãnzɔ, baan-ngoo b'abɔɔl ye b'akaal, tal, ngoo, baan wuo ãnguun, akieel abɔɔ eluɔ obvɛ nsa ɔ̃nkam (100), y'elaã li ɔ̃bu nkal ɔ̃bu. 30Baal bibi ba nkwel akieel akal ba mbee, bvool baal bibi ba mbee akieel akal ba nkwel.»

Currently Selected:

Matie 19: ngz

Highlight

Copy

Compare