Matie 18

Okuaal o nzuru y'odzeel o bakyɛ

(Mak 9.33-37; Luk 9.46-48)

1Me lio olɔ, ayio asyel tsotsoo a Yeso, bu afuul ndɛ ndiri: «Wu onduru bakyɛ onse Okwɛn o ywel nã?» 2Yeso oti muaan wu ɔ̃tsi-tsiri ngɔmɔ̃ mbel, bu asuul ndɛ kal-a-kal a bɔ. 3Ndɛ bu alieel ndiri: «Taa-taa bam, mɛ̃ eyɛɛn byɛ wɛn, okɛɛn byɛ k'eswɛɛl epfuũ me ndɔɔ yi ekal onge baan b'atsi-atsi wɛ, byɛ k'ekoo k'esam onse Okwɛn o ywel wɛ. 4Obɔ otsɛn bɛn, mbuul wu àkuaal nzuru onge muaan wu ɔ̃tsi-tsiri wu, àkal wu onduru bakyɛ onse Okwɛn o ywel. 5Okɛɛn mbuul oyɔɔ muaan wu ɔ̃tsi-tsiri wɛn onge wu me nkuũ a mɛ̃, ŋ'ayɔɔ myam. 6Kɛn okɛɛn mbuul osi kwɛn ngɔmɔ̃ onse ebebaan bvi ekiool mɛ̃ bvi ebva onse obi, onsoo akuru ndɛ nkɔɔn yi enɛn me nkii, atyal ndɛ ke nsɛn ãdza. 7Ãwua bibi m'ɔ̃kiri me ndɔɔ ãndɔɔ m'ãbal baal onse obi! Mɔ̃ k'ãkoo k'ãywɛn wɛ. Kɛn ãwua bibi me mbuul wu apoo mɔ̃! 8Okɛɛn kuɔɔl wuo kuul e yɛ ebal yɛ onse obi, tsiil elyam obvɛ, ta bvɛ pfɛɛ lala ye yɛ. Ke ngwel wɛ, eli ngesɛ me yɛ k'asam onse elaã ye kuɔɔl wuo ye kuul ɔ̃mbɔɔn, ye k'ekal yɛ ye mviil wuo ye mviɔɔl ɛ̃nge-mviaal bvool atyal yɛ onse mbaa yi ɔ̃bu. 9Okɛɛn dziil e yɛ hɛ̃ ebal yɛ onse obi, mbaal lɔ, ta lɔ pfɛɛ lala ye yɛ. Ke ngwel wɛ, eli ngesɛ me yɛ k'asam onse elaã ye dziil ngelemɔ̃ ye k'ekal yɛ ye mviil ãnge-mbuaal bvool atyal yɛ onse ywɛn e mbaa.»

Mboo a emɛɛmɛɛ̃ ki edziɔɔn bvool edzuul

( Luk 15.3-7)

10«Ekal y'onkyab kwɛn byɛ ebee ngɔmɔ̃ onse ebebaan bvi opfiɔɔl. Ke ngwel wɛ, mɛ̃ eyɛɛn byɛ wɛn, ke ywel, ãnzwel ã bɔ ãli lio lueel ke nkwel a Tal a mɛ̃ wa ke ywel. 11[Ke ngwel wɛ, Muaan a mbuul oyebvuul b'ádziɔɔn#18.11 Ndɔɔ yi, k'ákel yɔ onse ɛ̃nkaan mikyɛ mi tsɔɔn-tsɔɔn wɛ..]

12Byɛ etsam omã? Okɛɛn mbuul oli y'emɛmɛɛ̃ ɔ̃nkam (100), emɛmɛɛ̃ ngemɔ̃ edziɔɔn, ndɛ olɔ k'asiil emɛmɛɛ̃ ɛ̃kuun-bva ye bva (99) bvi esiil nkal a nkio, me ndɔɔ yi ayebii ngemɔ̃ ki edziɔɔn okyɛ wɛ? 13Taa-taa bam, mɛ̃ eyɛɛn byɛ wɛn, ŋ'emwɛn ndɛ kyɛ, esɛ ki eyoo ndɛ me ndɔɔ a kyɛ enduru ki eyoo ndɛ me ndɔɔ emɛmɛɛ̃ ɛ̃kuun-bva ye bva (99) bvɛn k'edziɔɔn wɛ. 14Emfa kiki, Tal a byɛ wa ke ywel k'adzii kwɛn ngɔmɔ̃ onse ebebaan bvi adziɔɔn wɛ.»

Obi y'odzeel o bakyɛ

15«Okɛɛn muaan-ngoo a yɛ osi yɛ obi, yi y'asuo ndɛ obi b'esi ndɛ, byam ange-buaal. Okɛɛn ndɛ oyoo yɛ, yɛ ŋe bveel ondoo o byɛ. 16Kɛn okɛɛn ndɛ k'ayoo yɛ wɛ, kɔɔl yi y'atal ndɛ ye mbuul ngɔmɔ̃ wuo baal buaal, onge b'ákel ndiri “ndɔɔ yueel asoo yɔ ke mbee a ɔ̃tsweel wu etsweel amwɛn buaal wuo atyel#Det 19.15.” 17Okɛɛn ndɛ obee k'ayoo bɔ, yɛɛn ndɔɔ oyɔ ol'Ebvɔɔn. Okɛɛn ndɛ obee k'ayoo Ebvɔɔn hɛ̃, oŋɔ̃ wal ndɛ onge mbuul wɛn k'ayɛɛ Nziã wɛ, wuo onge ɔ̃twal mpal. 18Taa-taa bam, mɛ̃ eyɛɛn byɛ wɛn, ndɔɔ yueel yi èkuru byɛ me nsie, àkuru yɔ hɛ̃ ke ywel. Ndɔɔ yueel yi ènyiɔɔn byɛ me nsie, ànyiɔɔn yɔ hɛ̃ ke ywel. 19Taa-taa bam, mɛ̃ bvool eyɛɛn byɛ wɛn, okɛɛn baal buaal onse byɛ abvool ãtsam me nsie me ndɔɔ yi asɔɔ eluɔ k'emã, Tal a mɛ̃ wa ke ywel àwa bɔ kyɛ. 20Ke ngwel wɛ, mboo yi ebvɔɔn baal buaal wuo atyel me nkuũ a mɛ̃, mɛ̃ ndi onse bɔ.»

Mboo a ɔ̃sal wu abee k'adzeel wumɔ̃

21Obobɔ, Piɛɛl osyel tsotsoo a Yeso, bu afuul ndɛ ndiri: «Mfam, okɛɛn ndoo a mɛ̃ osi mɛ̃ obi, mɛ̃ èdzeel ndɛ̃ nsa kwɛ? Mɛ̃ èdzeel ndɛ tiil nsa nsiaan?» 22Yeso obveel ndɛ bubu: «Mɛ̃ ke ndieel yɛ wɛn tiil nsa nsiaan wɛ, kɛn a mɛ̃ ndieel wɛn tiil nsa ɛ̃kuun-nsiaan (70) nsa nsiaan#18.22 Ke mboo yi, bakyɛ ndiri: «Nsa ɛ̃kuun nsiaan ye nsiaan (77) nsa nsiaan».. 23Obɔ otsɛn bɛn, Okwɛn o ywel oli m'emfa ki: Ɔ̃kwɛn ngɔmɔ̃ ádzii k'asiɔɔl nzi e ndɛ y'asal a ndɛ. 24Ŋ'ebɛɛn ndɛ yɔ osiɔɔl, ayi ndɛ y'ɔ̃sal ngɔmɔ̃ wu áli y'ebiin e ndɛ ki nzi yam yi bibi. 25Onge bɛn ɔ̃sal ondɛ k'áli y'eluɔ ki afuru wɛ, mfam a ndɛ otam kwɛn atiɔ ndɛ, ndɛ y'ɔ̃kal, ye baan, ye bvieel bvi éli a ndɛ, me ndɔɔ yi afuru ebiin e ndɛ. 26Ndɛ obel nzuru me nsie, obvi ãbuo ke nkwel a mfam, bu alieel ndɛ ndiri: “Mekuru mwiĩ me ndɔɔ a mɛ̃, mɛ̃ ekieel efuru ebiin e yɛ kyam kieel!” 27Mfam osio ndɛ nyiĩ yam bibi, ombaal ebiin e ndɛ, bu ayɔɔl ndɛ ayɛn. 28Ŋ'epal ɔ̃sal ondɛ, ndɛ omwɛɛn ye ngɔmɔ̃ onse anga-ndoo a ndɛ b'ɔ̃sal, wu áli y'ebiin e ndɛ ki nzi nsi-nsiri. Ndɛ obvuru ndɛ, obvi opɛn ke ngɔ-a-bwel y'ãyɛɛn m'ɔ̃nywã ndiri: “Furu ebiin e mɛ̃!” 29Nga-ndoo a ɔ̃sal obvi ãbuo ke mviil ɛ̃ ndɛ, bu abuɛɛn ndɛ ndiri: “Mekuru mwiĩ me ndɔɔ a mɛ̃, mɛ̃ ekieel efuru ebiin e yɛ!” 30Kɛn a ndɛ obee, bu ayeywɛɛn wumɔ̃ me bwal, tiil k'efuru ndɛ ebiin e ndɛ. 31Ŋ'emwɛn anga-ndoo b'ɔ̃sal emfa ki ebwel ãndɔɔ omɔ̃, bɔ aluul m'ãwua, bu ayeliaal mfam a bɔ mbueel m'ãbwel. 32Obobɔ, mfam otam ɔ̃sal ondɛ mbel ota, bu alieel ndɛ bubu: “Ɔ̃sal wu ɔ̃bi! Mɛ̃ mbaal ebiin e yɛ kyam kieel me ndɔɔ yɛn yɛ alɛɛn mɛ̃ me ndɔɔ a kyɛ. 33Yɛ hɛ̃ ale ke koo k'asio nga-ndoo a yɛ wu ɔ̃sal nyiĩ onge b'esio mɛ̃ yɛ nyiĩ wɛ?” 34Mfam a ndɛ oyi mpuru, bu awi ndɛ me mviɔɔl ɛ̃ baal b'atuaal baal mpal, tiil ye k'efuru ndɛ ebiin e ndɛ kieel. 35Okyɛ emfa ki ekieel esa Tal a mɛ̃ wa ke ywel byɛ, okɛɛn ngɔmɔ̃ ngɔmɔ̃ onse byɛ k'adzeel muaan-ngoo a ndɛ m'ɔ̃kwal ngɔmɔ̃ wɛ.»

Currently Selected:

Matie 18: ngz

Highlight

Copy

Compare