Matie 17

Yeso oswɛɛl emfa

(Mak 9.2-13; Luk 9.28-36)

1Ke mbee ãtsoo ãsɛɛn, Yeso owel Piɛɛl, ye Dzak bwɛn a Dzaã wu muaan-ngoo a ndɛ wu Dzak, ndɛ oyɛn ye bɔ me pyɛ nkal a nkio yi nda. 2Okɔ, ndɛ oswɛɛl emfa ke mviil ã bɔ: Osu o ndɛ obvi onyɛɛn onge tal, ekɔ e ndɛ hɛ̃ eyii bvam afuu-afuu onge mwiĩ. 3Pfa, ayio ange-atyel amwɛn Moyize y'Eli ambwɔɔ ye ndɛ! 4Piɛɛl olieel ndɛ bubu: «Mfam, eli ngesɛ kwɛn bia-byɛ ekal ŋã! Okɛɛn ye dzii, mɛ̃ ètuu asɛɛ atyel ŋã: Ngɔmɔ̃ wa yɛ, ngɔmɔ̃ wa Moyize, ngɔmɔ̃ wu Eli.» 5Me lio li ékeyɛɛn ndɛ, epɛn ngemɔ̃ ki ékenyɛɛn eyefoo bɔ. Nkii ngamɔ̃ fa onse epɛn, bu eyɛɛn ndiri: «Wu bu Muaan a mɛ̃ wu ɔ̃tio, wu ndi mɛ̃ y'esɛ me ndɛ: Eyoo ndɛ!» 6Ŋ'eyoo ayio nkii oyɔ, buɔ bo bibi obɔɔ bɔ, bɔ bu abvi ãbuo mbwii me nsie. 7Yeso osyel tsotsoo a bɔ, obiɛɛn bɔ, bu alieel bɔ bubu: «Etɛɛn, ebee buɔ oyoo!» 8Bɔ aseel mviil, k'amwɛn mbuul ɔ̃kyam wɛ, wu emwɛn bɔ kɛn a Yeso ndyam. 9Ŋ'eyii esool bɔ nkal a nkio, Yeso owi bɔ ãnkunkwa ndiri: «Byɛ mbuul si ngɔmɔ̃ m'emwɛn byɛ oliaal wɛ, tiil ye k'esiool Muaan a mbuul onse b'ákwi-ákwi.»

10Ayio bu afuul Yeso ndiri: «Otsɛn omã b'ebeyɛɛn ayiool b'ãngel ndiri ŋ'ɛ̃kwel kɛn ebvaan Eli aya?» 11Ndɛ obveel bɔ bubu: «Ngwanyã, Eli àya me ndɔɔ yi ayefaal ãndɔɔ mbueel. 12Kɛn a mɛ̃ eyɛɛn byɛ wɛn, ndɛ amaaya, kɛn a bɔ k'ayɛɛ ndɛ wɛ, bu ási ndɛ onge b'édzii bɔ. Emfa kiki, bɔ àtuaal Muaan a mbuul mpal.» 13Ayio bu abɔɔ otsɛn ndiri ndɛ akeyɛɛn bɔ me Dzaã Batis.

Yeso obvuul muaan ngɔmɔ̃ wu ákekwa esiɔ̃

(Mak 9.14-29; Luk 9.37-43)

14Ŋ'etɔ bɔ tsotsoo embuul e baal, bɔɔl ngɔmɔ̃ oyebva ãbuo ke nkwel a Yeso. 15Ndɛ olieel Yeso ndiri: «Mfam, me sio mɛ̃ muaan wu bɔɔl wu nyiĩ! Ke ngwel wɛ, ndɛ abekwa esiɔ̃ bvool abemwɛn fool lam bibi. Ãlio bibi, ndɛ abebva onse mbaa y'onse ãdza. 16Mɛ̃ mbiri ndɛ ola ayio a yɛ, kɛn a bɔ aboo ndɛ okwɛɛn.» 17Yeso bu ayɛɛn ndiri: «Byɛ eli yam e baal b'abi bvool eywɛn a okiool! Mɛ̃ èkal ye byɛ tiil mpwanki? Mɛ̃ ekuru ɔ̃kwal wu ekal ye byɛ tiil lio emã? Eya mɛ̃ ye ndɛ ŋã!» 18Yeso ongal ɔ̃fel wu ɔ̃bi-ɔ̃bi, ndɛ bu apal onse muaan. Kɛn a me lio olɔ, muaan ondɛ obvuul. 19Obobɔ, ayio asyel tsotsoo a Yeso, bu afuul ndɛ me pyɛ ndiri: «Otsɛn omã bɛn bee ekwɛɛn k'etwsɛɛl ɔ̃fel ondɛ bee-myam?» 20Yeso obveel bɔ bubu: «Me ndɔɔ yɛn byɛ okiool oli otsi-tsiri. Taa-taa bam, mɛ̃ eyɛɛn byɛ wɛn, okɛɛn byɛ eli y'okiool bɛn onge esia li mutaade, byɛ ekoo k'eyɛɛn nkio yi wɛn: “Mbal ŋã, yi ku”, yɔ èmbal. Ndɔɔ yi èkwɛɛn byɛ osa k'èkal wɛ. 21[Ɔ̃fel wa bubu abepal kɛn a m'ebuɛɛn y'ãbuɛɛn mã me nzal#17.21 Ndɔɔ yi, k'ákel yɔ onse ɛ̃kaan mikyɛ mi tsɔɔn-tsɔɔn wɛ..»]

Yeso bvool olieel ndiri ndɛ àkwa

(Mak 9.30-32; Luk 9.43-45)

22Tsoo ngelemɔ̃, ayio ábvɔɔn mboo mɔ̃ ke Ngalile. Yeso olieel bɔ bubu: «Àtiɔ Muaan a mbuul me mviɔɔl ɛ̃ baal. 23Bɔ àbam ndɛ, kɛn a ndɛ àsiool me tsoo li ãtyel.» Ayio ãwua bu ãbɔɔ bɔ mam bibi.

Yeso ye mpal e Nzɔ a Nziã

24Ŋ'etɔ Yeso y'ayio a ndɛ ke Kapelanahum, baal b'awal mpal e Nzɔ a Nziã ayefuul Piɛɛl ndiri: «Mfam a byɛ ŋ'abefuru mpal e Nzɔ a Nziã?» 25Ndɛ obveel bɔ ndiri: «Hɛɛ̃!» Ŋ'esam ndɛ onse nzɔ, Yeso abvuru oyɛɛn nkwel, ofuul ndɛ bubu: «Simɔ̃, yɛ tsam bwɛn? B'afuru mpal wuo nzi ol'akwɛn b'ɔ̃kiri anã? Baan a bɔ wuo anzii?» 26Piɛɛl obveel ndiri: «Anzii.» Obobɔ, Yeso olieel ndɛ bubu: «Okɛɛn obobɔ, ŋɛn baan a bɔ k'afuru yɔ wɛ. 27Kɛn a me ndɔɔ yɛn ebee bɔ ɛ̃kwal obiil, yi nzal, tyal ndab m'ãdza. Nswi wu ɛ̃kwel wu èdzuru yɛ, dzweel ɔ̃nywã a ndɛ, yɛ àmwɛn nzi yi ãbvieel. Wal yɔ, wa bɔ me ndɔɔ a bia-yɛ.»

Currently Selected:

Matie 17: ngz

Highlight

Copy

Compare