Matie 16

Yeso y'amfam b'Ayuda

(Mak 8.11-13; Luk 12.54-56)

1Afalisaye y'asaduseyɛ̃ asyel tsotsoo a Yeso. Me ndɔɔ yi akie ndɛ, bɔ asɔɔ ndɛ emvieel ki esuo kwɛn ndɛ ofi ola Nziã. 2Yeso obveel bɔ ndiri: «M'ãnkunkwal, byɛ ebeyɛɛn wɛn: “Ɔ̃suu, lio èkal ngesɛ, ke ngwel wɛ ywel ebie.” 3M'epal-epal, byɛ ebeyɛɛn wɛn: “Nonɔ̃ ŋã, mvel àndwɔɔ, ke ngwel wɛ ywel emeepiin.” Obobɔ, byɛ eyɛɛ k'etal emfa ki eli ywel, kɛn a byɛ k'ekoo k'eyɛɛ otsɛn b'ãndɔɔ m'ãtal ãlio mã meba wɛ! 4Baal ba lio li ali baal b'abi-abi, bvool k'akuru nzuru me Nziã wɛ. Bɔ abii emvieel, k'eli y'emvieel ekyam ki asuo bɔ wɛ, emvieel ki asuo bɔ kɛn a ki Yonas.» Ke mbee oŋɔ̃, Yeso osiil bɔ, bu ayɛn.

Lebviil li Afalisaye y'asaduseyɛ̃

(Mak 8.14-21)

5Ŋ'ékebwel ayio ongwel a baã, bɔ adzɛɛn k'abiri amampa. 6Yeso olieel bɔ ndiri: «Esa ãyal bvool ekal y'onkyab me lebviil li Afalisaye ye li Asaduseyɛ̃!». 7Ayio abvi otsam bvool abvi oyɛɛn bam-a-bam bubu: «Ki eyɛɛn ndɛ obobɔ, me ndɔɔ yɛn bia-byɛ k'ebiri amampa wɛ.» 8Yeso oyɛɛ ãtsam ã bɔ, bu alieel bɔ ndiri: «Otsɛn omã b'etsam byɛ bvool eyɛɛn wɛn, byɛ k'ebiri amampa wɛ? Baal b'okiool otsi-tsiri! 9Byɛ k'ekwaal otsɛn kɛn wɛ! Eyeel ndɔɔ a amampa ataan b'ákab baal amiil ataan (5.000). Me tsoo olɔ, byɛ etsaka kwɛ ébiri? 10Eyeel ndɔɔ a amampa nsiaan b'ákab baal amiil anã (4.000). Me tsoo olɔ, byɛ etsaka kwɛ ébiri? 11Emfa emã kyɛn byɛ k'ekwaal otsɛn wɛ wɛn, mɛ̃ ke ndɔɔ amampa ngyɛɛn wɛ, ŋe ndieel mɛ̃ byɛ wɛn: Esa ãyal bvool ekal y'onkyab me lebviil li Afalisaye y'asaduseyɛ̃?»

12Obobɔ, ayio abɔɔ otsɛn ndiri, Yeso k'alieel bɔ k'akal y'onkyab me lebviil li ebiin amampa wɛ, me ndɔɔ ãndɔɔ m'ebeyiool Afalisaye y'asaduseyɛ̃.

Piɛɛl olieel ndiri Yeso Mãsia

(Mak 8.27-30; Luk 9.18-21)

13Yeso otɔ nsie yi Tsedzale wa Filipe. Ndɛ ofuul ayio a ndɛ bubu: «Baal omã abeyɛɛn me ndɔɔ a Muaan a mbuul?» 14Bɔ abveel ndiri: «Bɛn ndiri yɛ Dzaã Batis, bɛn ndiri yɛ Eli. Bɛn bvool ndiri yɛ Yelemi wuo ngɔmɔ̃ onse aliaal-ɛ̃kiɛɛn a Nziã.» 15Yeso bu afuul bɔ ndiri: «Obobɔ, ke byɛ, byɛ eyɛɛn wɛn mɛ̃ nã ndi?» 16Simɔ̃ Piɛɛl obveel ndiri: «Yɛ, yɛ li Mãsia, Muaan a Nziã wa mwiĩ!» 17Yeso bu alieel ndɛ ndiri: «Simɔ̃, muaan a Yonas, yɛ li y'esɛ bibi. Ke ngwel wɛ, wu oyɛɛl yɛ ndɔɔ oyɔ ke mbuul wɛ, wu oyɛɛl yɛ yɔ kɛn a Tal a mɛ̃ wa ke ywel. 18Obobɔ, mɛ̃ eyɛɛn yɛ wɛn, yɛ li Piɛɛl, ke ywel a nkɔɔn yi, mɛ̃ ètuu Ebvɔɔn e mɛ̃. Edzoo bvi ola o b'ákwi-ákwi k'ekoo k'ebvel lɔ mpɛn wɛ. 19Mɛ̃ èwa yɛ ɛ̃wɔɔl mi Okwɛn o ywel. Ndɔɔ yi èkuru yɛ me nsie, ke ywel hɛ̃ àkuru yɔ. Ndɔɔ yi ènyiɔɔn yɛ me nsie, ke ywel hɛ̃ ànyiɔɔn yɔ.» 20Yeso bu awi ayio ãnkunkwa ndiri abee mbuul si ngɔmɔ̃ oliaal ndiri ndɛ Mãsia.

Yeso olieel ndiri ndɛ àkwa bvool àsiool

(Mak 8.31-34; Luk 9.22)

21Fa lio olɔ, Yeso obɛɛn ayio a ndɛ osuo ndiri ebvaan ndɛ ayi Yelusalem, amwɛn fool lam boo-boo li ètuaal akuul-kuul, y'amfam b'angaa-a-Nziã, y'ayiool b'ãngel ndɛ. Bɔ àbam ndɛ, kɛn a ndɛ àsiool me tsoo li ãtyel. 22Piɛɛl odzuru ndɛ me pyɛ, bu abvi ndɛ mbyel owa ndiri: «Yɔɔl Nziã akiaal yɛ, Mfam! Ãndɔɔ omɔ̃ k'ã̀ya me yɛ wɛ!» 23Kɛn a Yeso okɔɔl, bu alieel ndɛ ndiri: «Yi lala ye mɛ̃, Ɔ̃pfu! Yɛ mɛ̃ kio alɔ, ke ngwel wɛ ãtsam ã yɛ ke mã Nziã wɛ, m'ombuul.»

Emfa ki aluɛɛn a Yeso

(Mak 8.34–9.1; Luk 9.23-27)

24Ke mbee oŋɔ̃, Yeso olieel ayio a ndɛ bubu: «Okɛɛn mbuul odzii k'aluɛɛn a mɛ̃, ebvaan ndɛ abee omwiĩ o ndyam bvool obesiɔɔl. Ndɛ abiri enkulusu e ndɛ, bvool aluɛɛn a mɛ̃. 25Ke ngwel wɛ, mbuul wu odzii k'abvuul omwiĩ o ndɛ, wu àywɛn a bɔ. Kɛn a mbuul wu àywɛn omwiĩ o ndɛ me ndɔɔ a mɛ̃, wu àbɔɔ bɔ. 26Ŋɛn mbuul obɔɔ opfel b'ɔ̃kiri a nsie ndyam wueel, bvel e mã li ebɔɔ ndɛ, okɛɛn ndɛ oywɛn a omwiĩ o ndɛ? Wuo eluɔ emã kyɛn mbuul okoo k'awa ke mboo a omwiĩ o ndɛ? 27Ke ngwel wɛ, Muaan a mbuul àyeya onse omfam o Tal a ndɛ, y'ãnzwel ã ndɛ. Obobɔ, ndɛ akieel afuru mbuul bwɛn a mbuul m'emfa ki ɛ̃sal ɛ̃ ndɛ. 28Taa-taa bam, mɛ̃ eyɛɛn byɛ wɛn, baal bakyɛ onse ŋã k'àmwɛn epfu wɛ, ye k'emwɛn bɔ Muaan a mbuul aya onse okwɛn o ndɛ.»

Currently Selected:

Matie 16: ngz

Highlight

Copy

Compare