Matie 15

Yeso bwɛn onkɔɔ

(Mak 7.1-23)

1Obobɔ, Afalisaye y'ayiool b'ãngel afi Yelusalem ayebɔɔ Yeso, bu afuul ndɛ ndiri: 2«Otsɛn omã b'ebesiaan ayio a yɛ onkɔɔ b'ankiɔɔn a bia-byɛ? Ke ngwel wɛ, bɔ aboodza, k'abesuɔɔl mviɔɔl wɛ.» 3Yeso obveel bɔ bubu: «Ke byɛ, otsɛn omã b'ebefel byɛ ãngel ã Nziã me ndɔɔ yi elweel onkɔɔ o byam? 4Ke ngwel wɛ, Nziã áyɛɛn ndiri: “Lweel tal a yɛ ye ngoo a yɛ”, bvool ndiri: “Mbuul wu ayɛɛn obi-obi me tal wuo me ngoo a ndɛ, àwa ndɛ etumbu ki epfu.” 5Kɛn a byɛ, byɛ ebeyiool baal ndiri mbuul okoo k'aliaal tal wuo ngoo a ndɛ ndiri: “Mɛ̃ al'olɔ mbɔɔ eluɔ ki ewa yɛ m'owuaal o yɛ. Kɛn a kyɛ ki ewa mɛ̃ Nziã kab.” 6M'emfa okyɛ, byɛ ŋ'embaal Endɔɔ e Nziã bvɛɛ, elweel onkɔɔ o byam. 7Byɛ baal a pfuru eli! Edzayi áli y'ɔ̃dzoo wu élieel ndɛ ãndɔɔ m'ã́fi ola Nziã me ndɔɔ a byɛ, ndiri:

8“Baal ba, abelweel mɛ̃ kɛn a m'ɔ̃nwã,

kɛn ɛ̃kwal ɛ̃ bɔ ɛ̃li lala ye mɛ̃.

9Obuɛɛn b'ebuɛɛn bɔ mɛ̃ k'oli y'otsɛn wɛ, ke ngwel wɛ

ãndɔɔ m'ebeyiool bɔ ãli kɛn ãngel m'ébuo baal.”»

Ãndɔɔ m'ãsuul mbuul ye mbiin

(Mak 7.14-23)

10Ke mbee oŋɔ̃, Yeso oti embuul e baal mbel, bu ayɛɛn ndiri: «Eyoo mɛ̃ bvool ekwaal otsɛn o ndɔɔ yi. 11Ki esuul mbuul ye mbiin ke nkwel a Nziã, ke ki esam onse ɔ̃nywã a ndɛ wɛ. Ki esuul mbuul ye mbiin ke nkwel a Nziã, ki epal onse ɔ̃nywã a ndɛ.» 12Obobɔ, ayio asyel tsotsoo a Yeso, bu afuul ndɛ bubu: «Yɛ yɛɛ kwɛn ãyɛɛn omɔ̃ ãbiil Afalisaye ɛ̃kwal?» 13Yeso obveel bɔ ndiri: «Ɔ̃ti ndyam wueel wɛn ke wu ekwɛn Tal a mɛ̃ wa ke ywel wɛ̃, akieel ayeb ndɛ. 14Eyɔɔl bɔ: Bɔ ali ɛ̃nkwa-mviil mi ɛ̃biri ɛ̃nkwa-mviil. Ŋɛn ɔ̃nkwa mviil obiri ɔ̃nkwa-mviil, bɔ ange-buaal àbva onse ywɛn.» 15Piɛɛl ayebvuru oyɛɛn, olieel Yeso bubu: «Wa bee otsɛn o mboo oyɔ.» 16Yeso olieel bɔ ndiri: «Onkyam byɛ hɛ̃, ŋɛn kɛn k'eli y'ãyal wɛ? 17Byɛ k'ebɔɔ otsɛn wɛ? Eluɔ kieel ki esam onse ɔ̃nywã a mbuul eyi onse ɔ̃la a ndɛ, Ke mbee oŋɔ̃ ani kyɛ ke nkiin. 18Kɛn a ki epal onse ɔ̃nywã a mbuul, ki efa onse ɔ̃kwal. Kyɛ okyɛ ki esuul mbuul ye mbiin ke nkwel a Nziã. 19Ke ngwel wɛ, ɔ̃kwal a mbuul, mboo yi ebefa ãndɔɔ mã bu: Ãtsam m'ãbi-ãbi m'ãtam mbuul k'abam baal, odzuu y'ɔ̃kal wuo y'ɔ̃lam a mbuul, osa b'ãndɔɔ m'esio, oturu o pfuul, oburu o ngaa-ndoo mbuul ãndɔɔ, y'osiaan. 20Omɔ̃ ãndɔɔ m'ãbesuul mbuul ye mbiin ke nkwel a Nziã. Ki ebesuul mbuul ye mbiin ke nkwel a Nziã, ke me ndɔɔ yɛn ndɛ odzi k'asuɔɔl mviɔɔl wɛ wɛ.»

Okiool b'ɔ̃kaal wa Kanaan

(Mak 7.24-30)

21Yeso ombal oŋɔ̃, bu ayɛn ke nsie yi éli bviil li Tiil ye li Sidɔ̃. 22Ɔ̃kaal ngɔmɔ̃ wu-ɔ̃fi Kanaan wu akal ke nsie oyɔ obvi obiool ndiri: «Mfam, Muaan a David, sio mɛ̃ nyiĩ! Ɔ̃fel wu ɔ̃bi-ɔ̃bi abetuaal muaan a mɛ̃ wu ɔ̃kaal mpal yam bibi.» 23Kɛn a Yeso k'abveel ndɛ ndɔɔ si ngamɔ̃ wɛ. Ayio a ndɛ asyel tsotsoo a ndɛ me ndɔɔ yi aliaal ndɛ bubu: «Tswɛɛl ndɛ, ke ngwel wɛ ndɛ abekuaal ɛ̃sɔɔl ke mbee a bia-byɛ.» 24Yeso obveel bɔ bubu: «Áyuɔɔl mɛ̃ kɛn ol'emɛ̃mɛɛ̃ bvi nzɔ a Isalayel bvi édziɔɔn.» 25Kɛn ɔ̃kaal ondɛ oyebva ãbuo ke nkwel a Yeso y'ãyɛɛn m'ɔ̃nywã ndiri: «Mfam, wuaal a mɛ̃!» 26Yeso obveel ndɛ bubu: «K'eli ngesɛ wɛ k'awal bvi-odza e baan, atyal bvɛ ola baan b'amva.» 27Ɔ̃kaal obveel Yeso bubu: «Mfam, yɛɛ y'ɔ̃dzoo. Ke baan b'amva mpii abedza ãmpiɛɛl m'eluɔ m'ãtswal ke nsɛn amisa b'amfam a bɔ.» 28Obobɔ, Yeso olieel ndɛ bubu: «Ee ngu, Okiool o yɛ oli b'onɛn! Yɔɔl kwɛn Nziã asa yɛ b'edzii yɛ!» Kɛn a me lio alili, muaan a ndɛ obvuul.

Yeso oboo anga-ãluu bibi

(Mak 7.31)

29Yeso ombal oŋɔ̃, oyɛn nku-a-nku a baã li Ngalile. Ndɛ owueel nkio, bu abvi nsɛn oŋɔ̃. 30Embuul e baal eyi ola ndɛ. Bɔ ayi ye baal b'adzuu tetɔɔ̃, y'ɛ̃nkwa-mviil, y'akɛn, ye b'áli y'elyam, y'anga-ãluu akyam bibi. Asuul bɔ ke mviil ɛ̃ ndɛ, ndɛ bu aboo bɔ. 31Baal akam bibi ŋ'emwɛn bɔ ankɛn ayɛɛn, b'áli y'elyam abvuul, b'adzuu tetɔɔ̃ adzuu, ɛ̃nkwa-mviil amwɛn. Bɔ alweel Nziã a Isalayel.

Yeso bvool oliil ɔ̃bɔbɔ a baal

(Mak 8.1-10)

32Yeso oti ayio a ndɛ mbel, bu alieel bɔ bubu: «Mɛ̃ ndi ye nyiĩ me ndɔɔ a baal ba, ke ngwel wɛ eyii ãtsoo ãtyel m'eli bɔ ye mɛ̃, mɛn bɔ ki adza pyɛ. Mɛ̃ ke nzii k'ebveel bɔ me nzal wɛ, owɛɛl bɔ ayebva leel me nkuul.» 33Ayio afuul ndɛ bubu: «Nkal ɔ̃baan wa kɛɛ-kɛɛ wu, amampa abo-bool b'eliil ɔ̃bɔbɔ a baal wu, kwɛn eyebɔɔ?» 34Yeso ofuul bɔ bubu: «Byɛ amampa kwɛ eli a bɔ?» Bɔ abveel bubu: «Nsiaan, y'ebe-baan bvi answi ke kwɛ.» 35Obobɔ, Yeso otam baal ndiri abva nsɛn me nsie. 36Ndɛ owel amampa ange-nsiaan y'answi, obveel Nziã ãtuɛɛn me ndɔɔ a bɔ, otsiil amampa, owi ayio a ndɛ, bɔ bu akab baal bueel bɔ. 37Baal bueel adzi ayool. Obobɔ, abiri etswel bvi esiil. Bvɛ eluul etsaka nsiaan. 38Baal b'ádzi áli nku-a-kuu amiil anã (4.000), oŋɔ̃ ŋɛn k'atsiɔ akaal ye baan b'atsi-atsi wɛ. 39Ke mbee a ŋ'ebveel Yeso baal, ndɛ osam onse ãsua, bu ayɛn ke nsie yi Mangadã.

Currently Selected:

Matie 15: ngz

Highlight

Copy

Compare