Matie 14

Epfu e Dzaã Batis

(Mak 6.14-29; Luk 9.7-9)

1Me lio olɔ, Elode Antipas wu áli mfam k'etswi e nsie ki Ngalile oyoo nsia a Yeso. 2Ndɛ olieel asal a ndɛ ndiri: «Ondɛ Dzaã Batis! Ndɛ ŋ'asiool onse b'ákwi, obɔ otsɛn b'eli ndɛ ye waan li asa emvieel.» 3Elode oyɛɛn obobɔ, me ndɔɔ yɛn ndɛ átam k'ásiin Dzaã, ákuru ndɛ, bvool álɔ ndɛ bwal. Éli me ndɔɔ a Elodiade, wu ɔ̃kal a muaan-ngoo a ndɛ Filipe. 4Me ndɔɔ yɛn Dzaã álieel ndɛ wu Elode ndiri: «Yɛ ke koo k'abaal ndɛ wɛ.» 5Obobɔ, Elode ákebii k'abam ndɛ, kɛn a ndɛ ákebal baal, me ndɔɔ yɛn bɔ ákewal Dzaã onge ɔ̃liaal-ɛ̃kiɛɛn a Nziã. 6Me tsoo li ákebɛɛl pfuun li áburu Elode, muaan a Elodiade wu ɔ̃kaal ákekɛn ke nkwel a baal b'éti ndɛ wu Elode mbel. Ndɛ ási Elode esɛ kyam bibi. 7M'emfa okyɛ Elode olab ndɛ ɔ̃kyel ndiri: «Mɛ̃ èwa yɛ ki èbii yɛ.» 8Ngoo bu awi ndɛ ãtsam m'ayɛɛn ndiri: «Wa mɛ̃ ɔ̃tswɛ a Dzaã Batis nkal a saan ŋã!» 9Ɔ̃kwɛn Elode ãwua bu ãbɔɔ. Kɛn onge bɛn ndɛ álab ɔ̃kyel ke nkwel a baal b'éti ndɛ mbel, ndɛ otam k'awa ndɛ ndɛ. 10Ndɛ bu atam k'ayetsiil Dzaã Ɔ̃tswɛ onse bwal. 11Ayi y'ɔ̃tswɛ a Dzaã nkal a saan, awi nsam a ɔ̃kaal ndɛ, ndɛ bu abiri ndɛ ola ngoo. 12Ayio a Dzaã ayewal ebiĩ e ndɛ, bu adziool kyɛ. Ke mbee oŋɔ̃, bɔ ayewa Yeso nsia oyɔ.

Yeso oliil baal amiil ataan (5.000)

(Mak 6.30-44; Luk 9.10-17; Dzã 6.1-14)

13Ŋ'eyoo Yeso nsia oyɔ, ndɛ owel ebɛɛ, ombal oŋɔ̃, odzuru nzuru oyɛn me pyɛ k'ɔ̃baan wa kɛɛ-kɛɛ. Kɛn a ŋ'eyoo baal nsia yi eyɛn ndɛ, bɔ afi m'ãbviil mã nku-a-nku, bu anɔɔn a ndɛ me nsie. 14Ŋ'epal Yeso onse ebɛɛ, ndɛ omwɛn embuul, ndɛ nyiĩ a bɔ ebɔɔ, bvool oboo anga-ãluu b'áli onse bɔ. 15Ŋ'eyii ekwal bviil, ayio asyel tsotsoo a Yeso, bu alieel ndɛ ndiri: «Ŋã eli ɔ̃baan wa kɛɛ-kɛɛ, tal hɛ̃ emeeyel. Bveel baal ba, kwɛn bɔ ayi onse ãla me ndɔɔ yi ayesuun bvi-odza.» 16Kɛn a Yeso obveel bɔ bubu: «Bɔ k'ali ye kɔɔ li ayi okɔ wɛ, ewa bɔ bvi-odza byam!» 17Bɔ bu abveel ndɛ ndiri: «Bee ŋã eli kɛn a y'amampa ataan y'answi buaal.» 18Yeso olieel bɔ ndiri: «Eya mɛ̃ ye bɔ ŋã.» 19Ndɛ bu atam baal k'abva nsɛn nkal a bviĩ. Ndɛ owel amampa ange-ataan y'answi ange-buaal, oseel mviil ke ywel, otuɛɛn Nziã me ndɔɔ a bɔ. Ndɛ otsiil amampa, owi ayio, ayio bu akab baal bɔ. 20Baal bueel adzi ayool. Bɔ abiri etswel-etswel bvi esiil. Bvɛ eluul etsaka kuun ye bviaal (12). 21Baal b'ádzi áli abɔɔl nku-a-nku amiil ataan (5.000), oŋɔ̃ ŋɛn k'atsiɔ akaal ye baan b'atsi-atsi wɛ.

Yeso odzuu nkal ãdza

(Mak 6.45-52; Dzã 6.15-21)

22Ke mbee oŋɔ̃, Yeso otam ayio a ndɛ k'asam onse ebɛɛ, kwɛn bɔ atsɔɔn ongwel a baã. Kwɛn ŋɛn ndyam abebveel embuul e baal. 23Ŋ'eman ndɛ bɔ obveel, ndɛ oyɛn nkal nkio me ndɔɔ yi abuɛɛn me pyɛ. Tsia obvi ndɛ oŋɔ̃ ndyam sii. 24Ŋ'esa oŋɔ̃, ebɛɛ al'eyii muaan-lala y'ekwel. Kyɛ ékedzwaan y'epoo, ke ngwel wɛ mfel ákebveel kyɛ mbee. 25Ŋ'eyii etsa bviil, Yeso oyii aya ol'ayio, adzuu nkal ãdza. 26Ŋ'emwɛn ayio ndɛ adzuu nkal ãdza, esi bɔ buɔ bo bibi, bvool bɔ ayɛɛn ndiri: «Eli ɔ̃kwii!» Me buɔ obɔ, bɔ abvi ɛ̃sɔɔl okuaal. 27Kɛn a alili oŋɔ̃, Yeso olieel bɔ bubu: «Ekal ye mpɛn! Eli mɛ̃, ebee buɔ oyoo!» 28Piɛɛl obveel ndɛ ndiri: «Mfam, okɛɛn bam eli yɛ, tam mɛ̃ kwɛn mɛ̃ ngya ola yɛ, nkal ãdza.» 29Yeso obveel ndɛ ndiri: «Ya!» Piɛɛl opal onse ebɛɛ, bu abvi odzuu nkal a ãdza m'oyi ola Yeso. 30Kɛn a ŋ'emwɛn ndɛ k'epob mfel ye mpuru, ndɛ buɔ obɔɔ. Ndɛ oyii adziin, bu abiool ndiri: «Mfam, bvuul mɛ̃!» 31Ɛ̃kiri-anka oŋɔ̃, Yeso onaan kuɔɔl, osiin ndɛ, bu alieel ndɛ ndiri: «Mbuul wu okiool otsi-tsiri, ki esi yɛ enkyam emã?» 32Bɔ bu asam onse ebɛɛ. Ke mbee oŋɔ̃, mfel ofi. 33B'áli onse ebɛɛ ayebva ãbuo ke nkwel a Yeso, bvool ayɛɛn ndiri: «Ngwanyã, yɛ li Muaan a Nziã!»

Yeso oboo baal ke Ngenadzalet

34Ŋ'eman bɔ nzal otsiil, bɔ atɔ etswi e nsie ki Dzenedzalet. 35Baal b'etswi okyɛ ayeyɛɛ ndiri ondɛ Yeso. Bɔ atsal nsia a oya o ndɛ m'ãla mbueel m'ãku-a-nku oŋɔ̃. Obobɔ, ayi ndɛ ye baal bueel ba y'ãluu. 36Bɔ aluɔɔn ndɛ kwɛn ndɛ awa bɔ nkuul yi anywɛn onkyam me nswɛ a ekɔ e ndɛ. Baal bueel b'anywɛn me yɔ abvuul.

Currently Selected:

Matie 14: ngz

Highlight

Copy

Compare