San Juan 7
7
Beṉ'ka' nak beṉ' bish' golj Jesúza' bi wyajḻe'gake' c̱he'
1Ka wde dga, Jesúza' wde' doxen gana' mbani Galileana'. Ḻa' bi goklallee shaje' gana' mbani Judeana' daa cheeni beṉ' wṉabia' c̱he beṉ' Israelka' witgake'ne'. 2Na' ka ba zoa gaḻ' lṉi c̱he ranshdo'ka' daa chon beṉ' Israelka' yog' yiz, 3beṉ'ka' nak beṉ' bish' golj Jesúza' che'gake'ne':
―Bi yigaaṉo' nizə, san wyaj Judeana' kwenc̱he beṉ'ka' ba non li' txen ile'gakile' yeḻ' wakka' chono'. 4Ḻa' beena' cheeni seyi c̱he', aga chkwashee diika' chone'. Bachgali chono' yeḻ' wakki, jentegan lao yog'ḻoḻ beṉ'.
5Ḻa' ni beṉ' bisheekan' bi wyajḻe'gake' c̱he'. 6Na'ch che' Jesúza' ḻegake':
―Biṉ' illin lla illin gor gon' daa llia bia' gon'. San le', bat'tez wak shajle. 7Beṉ' yell-lioki bibi de dii gonan ka gakzbangakile' le', san nadaan chakzbangakile' daa chepgakee malan' chongake'. 8Ḻi shaj le' lṉina'. San nad' bi saa, ḻa' biṉ' illin lla illin gor gak c̱ha' daa llia bia'.
9Biyoll golle' ḻegake' ka' na' bigaaṉe' Galileana' zi xtit.
Wyaj Jesúza' lṉina'
10Na' ka wde wza' beṉ' bisheeka', ḻekzka' wzee wyaje' lṉina' do ngash'z. 11Na' beṉ'ka' chṉabia' beṉ' Israelka' chiyiljgake'ne' lo lṉina', che' ljwellgake':
―¿Garaṉzi beena', lla?
12Na' ladj beṉ'ka' lle' lṉina', beṉ' zan choe'gake' xtill' Jesúza'. Baḻe' che': “Nake' beṉ' wen.” Na' zi baḻe' che': “Bi nake' beṉ' wen, ḻa' chdaze' chziyee beṉ'.”
13Per ni to kono biyaxji we' xtill' Jesúza' ka nḻa'z daa chllebgake' beṉ'ka' chṉabia' beṉ' Israelka'.
14Na' ba zej shoṉ tap lla chak lṉina' ka bllin Jesúza' gana' zoa yoodo'na' na' wzoloe' chli' chsedile' beṉ'. 15Na' chibani beṉ' Israelka', na' che' ljwelle':
―¿Nakra chak chli' chsedi beeni beṉ', len aga bi nsede'?
16Na' che' Jesúza' ḻegake':
―Diika' chli' chsedid' aga nakan dii chyiljlall'z', san beena' bseḻ' nad', ḻen' bli' bsedile' nad' diiki. 17Nottez beṉ' cheenile' gone' ka cheeni Chioza', wakbe'ile' shi daa chli' chsedid' nakan c̱he Chios wa shi nakan dii chyiljlall'z'. 18Beena' tobia'loze' cho'e xtillee, balaaṉ c̱he kwinzen' chyilje', san beena' chyilje' sho' beena' bseḻ' ḻe' balaaṉ, ḻen' cho'e dill' ḻi, na' aga bi dill' wxiye' cho'e.
19’Dii Moiséza' beṉe' le' ley c̱he Chioza', na' ni tole bi chonle ka nllian bia' gonle. ¿Bic̱he cheenzile witle nad'?
20Na'ch beṉ'ka' lle' na' che'gake'ne':
―Dii x̱iwaan yoo no' ka'. ¿Noran cheeni wit li'?
21Na' che' Jesúza' ḻegake':
―Tochga yeḻ' waka' ba ble'ile ben' llana' chombaaṉcho na' yog'le chibanile. 22Dii ḻi dii Moiséza' bene' byen yog'tele nakle beṉ' byo chiyaḻ' sho'le seṉ daa le circuncisión, ḻa'kzi aga ḻen' wzololene'n, san dii x̱ozxto'leka'ten. Daan chgoole bi' byodo'ka' seṉna' ḻa'kzi nakan lla chombaaṉcho. 23Na' shi choe'le latj sho' bi' byodo'ka' seṉ daa le circuncisión lo llana' chombaaṉcho kwenc̱he gak ka na leya' daa bzej dii Moiséza', ¿bic̱he chllaazle nad' daa biyon' to beṉ' llana' chombaaṉcho? 24Bi wc̱hogḻizle c̱he beṉ' shi bi chle'ile chone', san cheenin iṉezile nakyeṉ'an nakan kwenc̱he we'le dill' kon ka nakan.
Jesúza' wne' zee gana' zoa Chioza'
25Na'ch baḻ beṉ' Jerusalénka' nagake':
―¿Aaga beenin cheengakile' witgake', lla? 26Ḻi wwia ka cho'e dill' ladj lkwe' beṉ', na' ni to kono bi che'. ¿Anti ba chajḻe'lzə beṉ' wṉabia'ka' nan dii ḻi beeni nake' Crístona', beena' wseḻ' Chioza' iṉabi'e, lla? 27Cho' ṉezicho ga beṉ' beeni. San kat' yid beena' nak Crístona', ni to kono iṉezi galə za' beena'.
28Jesúza' chli' chsedile' beṉ'ka' yoodo'na', na' ka benile' daa wna beṉ'ka' c̱he', na' wṉie' zillj chi'e:
―Chakzile nombia'le nad' na' ṉezile ga beṉ' nad'. Aga zaa tolazz', san zoa beena' bseḻ' nad', beena' chon kon ka chc̱hebe' gone'. Na' le' bi nombia'lene', 29san nad' nombi'ane', ḻa' gana' zoen' wzaa, na' ḻen' bseḻee nad'.
30Na'ch baḻe' goklall'gake' gox̱'gake'ne', per ni toe' bi bex̱' ḻe', ḻa' biṉ' illin lla illin gor gak c̱he' daa llia bia'. 31Na' beṉ' zan wyajḻe'gake' c̱he', na' wnagake':
―Kat' yid beena' nak Crístona', beena' wseḻ' Chioza' iṉabi'e, ¿awli'techle' yeḻ' wak aga ka daa chli' beeni, lla?
Goklall'gake' gox̱'gake' Jesúza'
32Na' fariseoka' bengakile' dillaa daa choe' beṉ'ka' c̱he Jesúza'. Na' ḻegake' len bx̱ozka' chṉabia' bseḻ'gake' beṉ'ka' chap yoodo'na' kwenc̱he lljex̱'gake' Jesúza'. 33Na' Jesúza' golle':
―Aga sshach soalen' le', na'ch yiyaa gana' zoa beena' bseḻ' nad'. 34Na' yiyiljle nad' per aga willelile nad' daa bi gak yidle gana' lljazoa'.
35Na'ch beṉ' Israelka' che' ljwellgake':
―¿Garan yiyaj beeni na' bich yillelichone', lla? ¿Anti gana' lle' beṉ' wlall c̱hechoka', beṉ'ka' lle' lall beṉ' zit'kan' shaje' kwenc̱he lljasedile' beṉ' griegoka', lla? 36¿Beran zejin daa ne': “Yiyiljle nad', per aga willelile nad' daa bi gak yidle gana' lljazoa'”?
Espíritu c̱he Chioza' nake' ka nis yaa nis ban
37Na' llana' zeelo gok lṉina', llana' nak lla choo lla xen, wzolla' Jesúza' na' wṉie' zillj, chi'e:
―Shi nole chbiḻi, ḻi da yeejle nisa' daa goṉ' le'. 38Na' gak kon ka na Cho'a Xtill' Chioza' gana' nan beena' gonḻilallee nad', gak ḻoo yic̱hjlall'do'ena' ka ga chaltit nis yaa nis ban.
39Na' daa wna Jesúza' ka', zejin soa Espíritu c̱he Chioza' ḻoo yic̱hjlall'do' beena' gonḻilall' ḻe'. Ḻa' ka gora' biṉ' yidsoa Espírituna' ḻoo yic̱hjlall'do' beṉ' daa biṉ' sho' Jesúza' balaaṉna' daa llia bia' sho'e kat' yiyepe' gana' zoa Chioza'.
Gok beṉ'ka' c̱hop shoṉ kwenlə
40Na' baḻ beṉ'ka' bengakile' daa wna Jesúza' na' wnagake':
―Dii ḻi beeni nake' beena' llia bia' yid kwenc̱he c̱hix̱ji'e daa che' Chioza'ne'.
41Na' zi baḻe' che'gake':
―Beenikzan' Crístona', beena' chbezcho wseḻ' Chioza' iṉabi'e.
Na' zi baḻe' che'gake':
―¿Achakile ladj beṉ' Galileaka' ichej beena' wseḻ' Chioza' iṉabi'e? 42Cho'a xtill' Chioza' nan lo dia c̱he dii Davina' galj beena' nak Crístona', na' gake' beṉ' yell Belén ka dii Davina'.
43Ka' gok, gokgake' c̱hop shoṉ kwenlə ni c̱he Jesúza'. 44Baḻe' goklall'gake' gox̱'gake'ne', per ni toe' bi biyaxji.
Beṉ'ka' wṉabia' beṉ' Israelka' bi wyajḻe'gake' c̱he Jesúza'
45Na'ch beṉ'ka' chap yoodo'na' billingake' gana' zoa fariseoka' len bx̱ozka' chṉabia'. Na'ch che'gake' ḻegake':
―¿Bic̱he bi bc̱he'lene'?
46Na' beṉ'ka' chap yoodo'na' che'gake':
―Ni to konoṉ' we' dill' ka dillaa choe' beena'.
47Na'ch che' fariseoka':
―¿Aḻekzka' lenle ba wxiyee? 48Ni to beṉ' wṉabia' c̱hechoka', ni neto' fariseo bi chajḻe'nto' c̱he'. 49Per beṉ'ki bi nombia'gake' leya', ba wlliayi'gake'.
50Na' farisewa' le Nicodemo, beena' wyaj lao Jesúza' waḻ-lə, chi'e ḻegake':
51―Ley c̱hechona' nan aga wak wc̱hoglocho c̱he to beṉ' iṉacho chone' mal shi biṉ' wzenagcho dillaa wi'e kwenc̱he iṉezicho bin chone'. ¿Anti aga kan' nakan?
52Na'ch che'gake'ne':
―¿Aḻekzka' beṉ' Galilea li'? Bsed kwenc̱he iṉezilo' ni to beṉ' chyix̱jee daa che' Chioza'ne' biṉ' ichej gana' mbani Galileana'.
53Na'ch billeshgake' ziyaj lill c̱he c̱hegake'.
Currently Selected:
San Juan 7: zad
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.