Mat 2
2
1Iesu rɨmait Petlehem lə tən Jutia lə nian taha nərəmɨrean taha Herot. Kəni ka, aitəlɨg ru, ninərɨk nɨvin karhinatin məhau min kamasɨpən ikpat marva Jerusalem,
2Mɨmani məma, “?Kova iərəm rɨmait In Iərəmɨra taha namin Isrel In rakamɨl iə? Mɨro-in-ka iɨmaip məhau tahan ikpat, kəni iakamarva məma sakanivivi In.”
3Nian iərəmɨra Herot ramɨro, nɨkin rakamho ɨpɨk, in ne namin pətɨm Jerusalem.
4Kəni ramaunin pətɨm nərəm asul kamarhuasɨgɨn nar kəm Ughin ne nətɨkun min taha nahuto. Nian kɨnarhuafugɨn ilar min, ramɨrhapɨk to ilar pətɨvɨn ikɨn Kristo tɨrait.
5Kəni ilar kamanipən ton, “Apa Petlehem lə tən Jutia, mɨro-in-ka iəni taha Ughin rɨmrai məklan mɨni məma,
6 #
Maeka 5:2
‘Mɨro ik, Petlehem lə tən Juta,
To nɨsatite-akɨnan lə nərəmɨra min taha Juta,
Mɨro-in-ka Iərəmɨra ker tɨriər lam
Iərəm tɨrɨpasɨg tahak nərəmim Isrel.’”
7Kəni ka Herot ramaunin auniuan ninərɨk min an taha məhau, mos nhinatinan to ilar məma məhau an ramɨruouɨn mɨt nhan.
8Kəni ramhalipən ilar lə Petlehem mɨni məma, “Arɨn maitkoin ɨvt kova an, kəni ne nian namaip nakarva maivsitoin kəm io, məma io mɨn sakvɨn mɨnivivi In.”
9Kɨnaitəlɨgin iərəmɨra kamariər marɨn. Kəni ka, airo ru, məhau an kamaip ikpat ramaupanin ilar mɨroatɨs rɨva mail ilɨs ikɨn kova rakamɨl ikɨn.
10Nian kamaip məhau, kamaigiən lə nagiənan asul.
11Kamarɨn ima lə nima mamaip kova, ilau Meri inɨn, mamaitite manivivi In. Kəni ka kamatita kərɨm thɨnilar mamarofən nar ɨvt ton. Kamarofən kol, ne senta ɨvt ker kɨvan ima lə nimeihuak, nətɨgɨn fragkinsens, ne pomat ɨvt ker nɨmrɨn ripɨr ɨpɨk, nətɨgɨn mir.
12Ne kamhuatɨkun to ilar lə nɨmɨlaitan ker məma tɨsaləlɨg-pənan mɨn to Herot. Kəni ka kamaləlɨg-pən lə tən thɨnilar lə suatu pɨsɨn.
Josef ne Meri kamialəs Iesu mamhaikɨm mamhalɨn Ijip
13Nian kɨnariəritha, airo ru, agɨlo ker taha Iərəmɨra rɨva to Josef lə nɨmɨlaitan ker mɨni məma, “Ərmig, mos kova ne inɨn maikɨm mhalɨn Ijip, mamairɨk ikɨn an mhairoatɨs io sɨpva mɨn mɨni, mɨro-in-ka Herot tɨratkoin kova məma tɨrhuapnin.”
14Kəni ramərmig mos kova ne inɨn lapɨn mhariər mhalɨn Ijip,
15 #
Hos 11:1
mamhairɨk ikɨn mɨroatɨs nɨmɨsan taha Herot, məma nakharan Iərəmɨra rɨnɨnitha lə nhulɨ iəni tahan tɨrva in nɨpəlakɨn, iərəm rɨmɨni məklan, “Iɨmaunin nərɨk məma tɨriər Ijip mɨva.”
Nəluakɨn min taha Herot kamarhuapnin kova min
16Kəni ka, nian Herot ramap məma ninərɨk min kamarəvhiatin in, niəmha ramɨtɨk ɨpɨk in, kəni ramhalipən nəluakɨn min mhuapnin kova min pətɨm iərman lə Petlehem ne ikɨn min, iərəm kamaripɨr lə nuw kiu mamatite, mɨ-in-ka-ne nian rɨnɨrhapɨk-itha lə ninərɨk min an.
17Loanian ka nakharan taha iəni Jeremaea rɨva in nɨpəlakɨn, iərəm rɨmɨni məklan,
18 #
Jer 31:15
“Kɨro nouian asul apa Rama,
Nərəmim kamaisak mamaisak əpomh,
Rejel ramasak to komin tahan,
To rɨsɨroan mɨn rəvɨt, mɨro-in-ka kɨnarɨka.”
Josef ne Meri kamialəs Iesu məmhariər Ijip mamhaləlɨg-pən Nasərət
19Nian Herot rɨnɨmɨsitha, airo ru, agɨlo ker taha Iərəmɨra rɨva lə nɨmɨlaitan ker to Josef lə tən Ijip,
20mɨni məma, “Ərmig, mos kova ne inɨn mhalɨn lə tən Isrel, mɨro-in-ka nərəm karolkeike məma takarhuapnin kova kɨnarɨmɨs.”
21Kəni ramərmig mos kova ne inɨn mamhalɨn lə tən Isrel.
22Mɨro nian ramɨro məma Akəleiəs rɨmərəmɨra lə tən Jutia mavinɨm lə rɨmɨn Herot, raməgɨn to nɨvɨnan ikɨn an. Ne nian kamɨniapu ton lə nɨmɨlaitan ker, ramiər mɨvɨn lə tən Kalɨli,
23 #
Mak 1:24; Luk 2:39; Jon 1:45 mɨvɨn mamarɨk lə nauanu nətɨgɨn Nasərət, məma nakharan iəni min taha Ughin kɨnanitha tɨrva in nɨpəlakɨn, iərəm kɨmani məklan, “Tɨpɨni məma in iərəm Nasərət.”
Jon iərəmim taha nauiatil ramavsitoin nakharan ɨvt ikɨn rəpia məpia ikɨn
(Mak 1:1-8; Luk 3:1-18; Jon 1:19-28)
Currently Selected:
Mat 2: Lenakel NT
Highlight
Share
Copy
Want to have your highlights saved across all your devices? Sign up or sign in
(c) 2023 Covenanter Press - Presbyterian Reformed Church of Australia
