YouVersion Logo
Search Icon

LUCAS 4

4
Wlaa Bzelo Jesus preb
(Mt. 4:1-11; Mr. 1:12-13)
1Kesentyent waknonen Espíritu Sant Jesus, lex wano Espíritu Sant Ne denbidx or ne wberee Ne ne wa Ne rugyow-Jordán. 2Txuplal gbiz wkaa Ne denbidx, lex wlaa Bzelo Ne preb gan pe slaa Ne dol. Bet wudet Ne ydeblo ne wkaa Ne nga, zhich guin wlen wlaanen Ne. 3Lex re Bzelo lo Ne:
―Belne nli XPee Dëdyuzh nak de, gukyeen gye gwa gako gyëtxtil.
4Wke Jesus, re Ne:
―Lo xgyiich Dëdyuzh re: “Let noncheedet por gyëtxtil ybán mén, sinke no ke por yrandxee xdiiz Dëdyuzh.”
5Zhich guin wano Bzelo Ne te xtoo gyeey ne kesentyent gya, lex tebrrategue wluu Bzelo yrandxee gyëz ne nak lo gyëzlyu lo Ne. 6Re Bzelo:
―Noo yniiz poder lo de no le yrandxee ne nuu lo gyëzlyu, porke xen noo nako, no zak ydee noo we lo men ne rlaantee noo ydee noo we. 7Belne suzhib de lo noo saknon de noo, yrandxee neree gak xen de.
8Per wke Ne re Ne lo Bzelo:
―Lo xgyiich Dëdyuzh re: “Nonchee XDëdyuzh de gusaknon, no nonchee ne rkyeen Ne gulaa.”
9Zhich guin wano Bzelo Ne Jerusalén, wlep Bzelo Ne xtoo xeydoo Dëdyuzh ledne mazre gyadee, re Bzelo lo Ne:
―Belne nli XPee Dëdyuzh nak de, gutsas nee, gugyab lyu; 10porke lo xgyiich Dëdyuzh re:
Dëdyuzh yxaal xangel chen gapkwent xangel Ne de.
11Ylisgya xangel Ne de kon nya xangel Ne
chen tsakadet gye nii de.
12Wke Ne re Ne:
―Laake re ke lo xgyiich Dëdyuzh: “Ylaadet de preb XDëdyuzh de.”
13Chene che wzëldetre pezee ylaa Bzelo Ne preb, wbetxee Bzelo lo Ne te tyemp.
Le Jesus wzelo wlaa xdxiin
(Mt. 4:12-17; Mr. 1:14-15)
14Wberee ke Jesus lo lyu ne la Galilea, kesentyent waknonen Espíritu Sant Ne, no ydendxee nes guin ruu mén xdiiz Ne. 15Ra Ne lenxeydoo men ydendxee nes guin, raneluu Ne men; yrandxee men rzaknon Ne.
Wa Jesus Nazaret
(Mt. 13:53-58; Mr. 6:1-6)
16Wa Jesus Nazaret ledne wroo Ne. Lex dxe ne rne men-Israel, wdee Ne lenydoo zegnak xkoxtumber Ne, lex wzuli Ne chen gool Ne lo xgyiich Dëdyuzh. 17Wdee men liber ne wkaa profet-Isaías lo Ne. Chene wxal Ne lo liber guin, wzël te ledne re:
18Laa XEspíritu Dëdyuzh raknonen noo,
porke laa Ne wye noo por ne yzëët noo xdiznzoon Ne lo yra menprob.
Wxaal Ne noo chen yzëët noo lo yra men ne nunyoow gan pezee yláá men,
no chen ylaa noo ne gyenii bzalo menngwlëë,
no chen yselaa noo yra men ne baanske rzak,
19no wxaal Ne noo chen yzëët noo lo mén ne le iz ne re Dëdyuzh ne yláá men che wdxiin.
20Lex wtsëë Jesus lo liber guin wdee No lo men ne run yudar lenydoo, wluzh nga wzob Ne. Yrandxee men ne nuu lenydoo rzakyaanen lo Ne. 21Wzelo Ne wnii Ne lo men, re Ne:
―Yra ne zëëd lo xgyiich Dëdyuzh ne won de orree, laa we nee kayak nedxeree.
22Yrandxee mén re ne wen yra ne rnii Ne, no kesentyent rzee rzak men por yra diznzoon ne rnii Ne. Lex rnabdizlsaa men, re men:
―¿Pe let laadet xpee Xeb nee?
23Orguin re Jesus lo men yra men:
―Nanwen noo ne sna de lo noo, diiz ne re: “Doctor, gulaa de rmed laake de”, no sna de lo noo: “Ne won noo wlaa de gyëz-Capernaum, gulaa we no nee ledne nak laz de.”
24No re Ne lo men:
―Nligue yna noo lo de yra de ne ni te profet rwiwendet mén men laake laz men. 25No yna noo lo de, chene wuu profet-Elías, kesentyent ndal wnabyud wuu Israel, chene wyabdet gyo tson izgwrol, ydendxee gyëzlyu wuu gbiin, 26per wxaaldet Dëdyuzh Elías ni te lo wnabyud ne nuu Israel, sinke le Dëdyuzh wxaal men lo te wnabyud ne nuu Sarepta ne nak nes Sidón. 27No ndal ke men ne rzak gyiz ne la lepra wuu Israel chene wuu profet-Eliseo, per ni te men wneseyakden Eliseo, sinke le Eliseo wneseyaken nonchee Naamán men-Siria.
28Chene won yra men ne ndxin lenydoo ne re Ne zenga, kesentyent wlayaa men. 29Orguin wzuli men yra men, wboo men Ne lenlgyëz guin; wano men Ne xtoo gyeey ne nak gyëz guin, chen ydexee men Ne axtegue nga. 30Per wdee Ne gwrooltee lad men yra men syague Ne.
Wneseyaken Jesus te mgyeey ne nuu menzab lextoo
(Mr. 1:21-28)
31Zhich guin wa Jesus Capernaum te gyëz ne nak lo lyu ne la Galilea. Nga wkaneluu Ne mén dxe ne rne men-Israel. 32Wzee wzak men por yra ne rneluu Ne, porke rnii Ne zegnak te men ne rnebééy.
33Lenydoo ledne kaneluu Ne, zob te mgyeey ne nuu menzab lextoo. Wzelo menzab rderëz menzab, re menzab:
34―Zeka noo; ¿penak rdee de lad noo Jesus men-Nazaret? ¿Pe zëëd de yluzh de noo? Rnebeey noo de no nan noo ne nakdet de mendol, XPee Dëdyuzh nak de.
35Lex wakndux Jesus lo menzab, re Ne:
―¡Gusoow ruu de! ¡Guruu lextoo ménree!
Orguin wtxoon menzab mén guin lyu nes lo yra mén, wruu menzab lextoo men, bet wzakdet men. 36Yrandxee mén wzee wzak, lex rnabdizlsaa men, re men:
―¿Pezee nakleg xdiiz ménree bes ne rnebééy men lo menzab no ne rap men poder rnii men lo menzab no rruu menzab lextoo mén?
37Ydendxee nes guin ruu mén xdiiz Ne.
Wneseyaken Jesus xnasweguer Simon-Bëd
(Mt. 8:14-15; Mr. 1:29-31)
38Chene wruu Jesus lenydoo, wa Ne ruxyuu Simon. Le xnasweguer Simon nex kesentyent rlen men xlaa, lex wnab mén lo Jesus ne yneseyaken Jesus men. 39Orguin wlitlo Ne ledne nex men, wakndux Ne lo xlaa, wruugue xlaa led men. Orgueguin waxee men wdee men ne wu Ne yra Ne xpén Ne.
Wneseyaken Jesus ndal mengyiz
(Mt. 8:16-17; Mr. 1:32-34)
40Le chene waaz ngbiz, wa yrandxee mén ne rap mengyiz ne rzak noze wren wren gyelgyiz wano xpengyiz men lo Jesus. Lex wxob nya Ne led men te te men, wneseyaken Ne men yrandxee men. 41No ndal ke mengyiz guin rruu menzab lextoo, noze rderëz menzab, re menzab:
―Laa de nak XPee Dëdyuzh.
Per wakndux Jesus lo menzab, wdeedet Ne si nnii menzab porke nan Ne ne che nan menzab ne laa Ne nak Crist.
Le Jesus rzëët xdiiz Dëdyuzh lo men-Galilea
(Mr. 1:35-39)
42Ne wyenii lyu, wruu Jesus lenlgyëz guin wa Ne te ledne yëtet mén. Per waye mén Ne, lex chene wdxiin men lo Ne, wlaan men nsoow men Ne chen nyadet Ne, 43per re Ne lo men:
―Rap noo degne yzëët noo xdiznzoon Dëdyuzh lo ste gyëz no le zegne rkyeen Ne, porke por neguin wxaal Ne noo.
44Zenga wkaa Jesus wkazëët Ne xdiiz Dëdyuzh lo mén yrandxee lenydoo ne zob lo lyu ne la Galilea.

Currently Selected:

LUCAS 4: zpi

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy