LUCAS 21
21
Goon ne wguu wnabyudprob
(Mr. 12:41-44)
1Chene zu Jesus lenxeydoo Dëdyuzh, wlis lo Ne wii Ne menrik ne rguu goon ledne ruu goon. 2No wii ke Ne te wnabyudprob, wguu men txup medwin ne kober nga. 3Lex re Ne:
―Nligue yna noo lo de ne nondee goon ne wguu wnabyudprobree ke goon ne wguu yra mén, 4porke yra mén wguu men ne che wrukaa nya men, per le wnaaree mase lo xgyeleprob men, wguu men logne nzenendxee men ne rdeendxee men lo xelyaaz men.
Re Jesus ne sluzh xeydoo Dëdyuzh
(Mt. 24:1-2; Mr. 13:1-2)
5Wzelo txup tson xpén Jesus ruu men xdiiz xeydoo Dëdyuzh por yra gyezhaandxee ne nyeepo no le por yra ne rasan mén chen gakxnëzro. Lex re Jesus lo men:
6―Sdxiin dxe ne luzh yra neree ne rwii de yra de, ni te gye gyandet led ste gye, yrandxoo luzh.
Beey ne tsuu chene le gyëzlyu che wyob nitlo
(Mt. 24:3-28; Mr. 13:3-23)
7Lex wnabdiiz men lo Jesus, re men:
―Maxter, ¿pa or gak yra negwa? ¿Pezee gak beey ne tsuu chene le we che wyob gak?
8Orguin re Ne:
―Gugap kwent, ydeedet de si ykade mén de. Porke schiid ndal mén ne ykade, yna men: “Noo nak Crist”; o yna men: “Che wyob chiid Crist.” Per ylaleedxdet de men. 9No chene gon de diiz ne le dilroo nuu u ne le gyelentoz nuu, ydxedet de; porke zenga nak ne rap degne gak primerdee, per let laadet ne nitlogue gyëzlyu nga.
10No re Ne:
―Te nacion til yrup ste nacion, te gobyeren til yrup ste gobyeren. 11No kesentyent ndxeeb yni lyu, no tsuu gbiin, tsuu gyelgyiz nesree nesrotee, le gyeybaa gaknyoo ne kesentyent ndxeeb rnaa, no ndalre beey ne tsuu.
12’Per antes ne gak yra neree, ykanal mén de, ynëëz men de tsano men de lenydoo chen ykagyii men de, ysee men de chegyiib, no tsano men de lo rrey no le lo gobernador por ne nak de xpén noo. 13Nga nak ne gak gu de xdiiz noo lo men. 14Per tsadetgue lextoo de gan pe gue de lo men. 15Porke noo yseleedx diiz ne gue de no yseleedx noo gyelenyenii lo de; ni te mén ne rlaandet kwii de gundet gan ytxuug lo diiz guin, ni gundet men gan gue men ne nlideto. 16Per axtegue xegwzan de, axtegue bech de, axtegue xparyent de, axtegue xmig de ydekwent men de, no sket men de gwrol de, 17no kwinyaan yrandxee mén de por ne rzëët de xdiiz noo. 18Per axtegue ni te gyitsxtoo de gakdet perdid. 19Belne ysalzaandet de xdiiz noo, zap de gyelembán ne nunk luzhdet.
20’Chene kwii de ne le soldad ndxin noze kbii gyëz-Jerusalén, cheguin gaknan de ne le dxe ne luzho che wdxiin. 21Cheguin men ne nuu Judea rap men degne yzhoon men gya men gyeey den; men ne nuu Jerusalén rap men degne yruu men nga; men ne zu den ybereedetre men gya men gyëz. 22Porke dxe guin nak ne yzakzi Dëdyuzh mén chen gak kumplir yra ne zëëd lo xgyiich Ne. 23¡Prob yra wnaa ne nakzhiin chene ydxiin dxe guin! ¡Prob yra wnaa ne rap mëëd ne roo dud! Porke kesentyent tsuu gyelenles gyëzlyu no kesentyent sakzi yra mén ne nuu gyëzree. 24Nuu men guet kon spad, nuu men gweey mén men tsunyoow men yra nacion; yra men ne nak menzit chiid men ynebééy men Jerusalén axtegue ne yzaa dxe ne wsu Dëdyuzh.
Ne yberee Men ne wdxiid wak Mén
(Mt. 24:29-35; 42-44; Mr. 13:24-37)
25’Cheguin tsuu beey lo ngbiz, no le lo mëëw, no le lo mël ne ndxiib gyeybaa; le gyëzlyu axtegue nandet mén pe ylaa men, ydxe men por tant ndxeeb tsube nisdoo no por tant ndxeeb rgyito. 26Nozguestee ne ylebleedx men yra ne gak gyëzlyu, axtegue ykeben men por tant gyelerdxeeb; porke axtegue ne nuu gyeybaa yni. 27Cheguin kwii men Men ne wdxiid wak Mén zëëd men lad bëw ydebxpoder men no ydebxgyelenzoon men. 28Chene selo gak yra neree, ndíp guguu lextoo de, gulisgya lo de, porke che wyob yláá de.
29No re Ne lo men yra men:
―Gukwii zegnak yag-ig o kwaskyertee ste yag. 30Chene rwii de ne le we che rreen, ryenengue de ne le mëëw ne rak neey che zëdyob. 31Zenga ke chene kwii de ne le yra neree che kayak, syenengue de ne le ne rkyeen Dëdyuzh che zëdyob.
32’Nligue yna noo lo de yra de ne antes ne guet yra mén ne nuu naaree, gak yra neree. 33Gyeybaa no le gyëzlyu snitlo we, per le xdiiz noo tesudet ne gako.
34’Gugap kwent, ydeedet de si gun ne mal gan lo de, zegnak gyelguu, zegnak ne za zeebtee lextoo de yra ne nuu gyëzlyuree, chen chene ydxiin dxe guin, yganodet de neree 35zegne rga maa lo tramp, porke zenga gako por yrandxee mén ne nuu ydendxee gyëzlyu. 36List gugak yra de, yzaandxee dxe gunab lo Dëdyuzh, chen gun de gan yláá de lo yra ne gak no chen gun de gan ybig de lo Men ne wdxiid wak Mén.
37Yedxe rneluu Jesus mén lenxeydoo Dëdyuzh, le gyëël ra Ne rzëën Ne gyeey ne la Olivos. 38No rsilgue rdxiin yrandxee mén lenydoo chen gon men ne rzëët Ne.
Currently Selected:
LUCAS 21: zpi
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.