YouVersion Logo
Search Icon

JUAN 8

8
Wnaa ne wgano ste mgyeey
1Le Jesus za gyey-Olivos. 2Ne wra gyëël rsil, wa Jesus lenxeydoo Dëdyuzh ste. Ndalyaa mén wdop lo Ne, lex wzob Ne wneluu Ne men. 3Orguin wdxiin maxter ley yra men men ne nak farisew, wdxinno men te wnaa ne wgano ste mgyeey, wzu men men gwrooltee lad yra men ne ndxin nga, 4lex re men lo Ne:
―Maxter, wga wnaaree lo noo or ne kano men ste mgyeey. 5Lo ley ne wdee Dëdyuzh lo Moises zëëd ne kon gye guet wnaa ne nak zeree. Laa de naa, ¿pe yna de?
6Re men neree lo Ne chen gan pe gue Ne, chen tsël gan pezee ykagyii men Ne. Orguin wzobndeslo Ne wzelo Ne rkaa Ne leter lyu kon xkwen Ne. 7Per kom rnabdiizre men lo Ne, lex wzobtebli ke Ne re Ne lo men yra men:
―Men ne neeydet ni te dol, men guin primer kyits gye led men.
8Lex wzobndeslo ke Ne ste kakaa ke Ne leter lyu. 9Ne won yra men guin ne wdxinno wnaa guin ne re Ne zenga, wka men nëz tegue tegue men sya, mengol nak ne primer wzelo wruu axtegue ne wra men sya; wyan Ne noze yrup Ne wnaa guin ne wzu men gwrooltee lad mén. 10Lex wzobtebli Ne ste. Kom wii Ne ne rutre yët, nonchee wnaa guin zu, re Ne lo men:
―Wnaae, ¿gozh yra mén ne wdxiid wdxidzu de nee? ¿Ni te men wyezhdet nkyits gye led de ye?
11Wke wnaa guin, re men:
―Ni te men Decheye.
Lex re Ne lo men:
―Ni noo bet ylaadet noo de. Orrenaa gugya, yedetre de dol.
Jesus nak bnii por mengyëzlyu
12Lex wnii Jesus lo yra mén ste, re Ne:
―Noo nak bnii por mengyëzlyu; men ne chidnal noo, saadet men lo nkeb, sinke lo bnii ne rguu gyelembán saa men.
13Lex re men ne nak farisew lo Ne:
―Laake de rzëët xkwent de; nlidet negwa ne rzëët de.
14Wke Ne re Ne:
―Ne rzëët noo nli we, nyaalzhe noo ke rzëët xkwent noo. Porke nan noo gan pazh wruu noo no nan noo gan pazh tsa noo; per le laa de yra de nandet de gan pazh wruu noo, ni nandet de gan pazh tsa noo. 15Laa de yra de rlaa de gyelextis noze zegne nak de ne nak de noze mengyëzlyu, per le noo rut lo rlaadet noo gyelextis. 16Per belne ylaa noo gyelextis, xnëz ylaa noo we, porke let tesdet noo ylaa we, sinke yrup noo Dëdyuzh Xuz noo ne wxaal noo zëëd noo ylaa we. 17Lo xley de yra de zëëd ne chene nuu txup testig ne tese rnii, nli ne rnii men. 18Noo ke nak te men ne rzëët xkwent noo, le ste men nak Xuz noo ne wxaal noo zëëd noo.
19Lex re men:
―¿Gozh xuz de naa?
Wke Jesus, re Ne:
―Laa de yra de rnebeeydet de noo, ni rnebeeydet de Xuz noo; belne nako ne rnebeey de noo, rnebeey ke de Xuz noo.
20Yra diizree re Jesus lo mén or ne kaneluu Ne men lenxeydoo Dëdyuzh nes ledne zu yra ne rguu mén goon. Per rut wbigdet nnëëz Ne, porke gardet ydxiin xor Ne ne yzuun Ne.
Le Jesus rzëët ne sya Jesus
21Wberee Jesus re Ne ste:
―Noo sya noo, skaye de noo yra de, per zetno de xdol de, no gakdet tsa de ledne gya noo.
22Orguin re men-Israel:
―¿Peguin sket men men laake men, por neguin na men ne gakdet tsa be ledne gya men?
23Lex re Ne lo men:
―Laa de yra de mengyëzlyuree nak de, per le noo mengyeybaa nak noo; laa de mengyëzlyu nak de, per le noo nakdet noo mengyëzlyu. 24Por neguin na noo lo de: “Zetno de xdol de.” Porke belne rlaleedxdet de ne noo nak men ne nak noo, zetno de xdol de.
25Lex wnabdiiz men lo Ne, re men:
―¿Txu nak de, bes?
Wke Ne re Ne:
―Che na noo we lo de axtegue chekwlo. 26Ndalre ne rap noo ne yna noo lo de chen yzëët noo yra ne rlaa de, per noo nonchee ne ron noo rnii Xuz noo ne wxaal noo, neguin nak ne rzëët noo lo mengyëzlyu porke Xuz noo ne wxaal noo nli rnii me.
27Per wdeedet men kwent ne Dëdyuzh nga wzëët Jesus ne re Jesus zenga. 28Por neguin re Ne:
―Chene che wlaa de Men ne wdxiid wak Mén zegne rlaantee de, cheguin gaknan de ne noo nak men ne nak noo no ne bet rlaadet noo noze xkwent noo, sinke le noo rzëët nonchee ne wneluu Xuz noo lo noo. 29Porke Xuz noo ne wxaal noo zëëd noo nak ne raknonen noo; rboleedxdet me noo porke syemper rlaa noo ne rtseleedx me.
30Ne re Jesus zenga, ndalyaa mén wlaleedx Ne.
Mén ne nak merpee xpén Dëdyuzh
31Lex re Jesus lo men-Israel ne che wlaleedx Ne:
―Belne ysalzaandet de xdiiz noo ne rzëët noo lo de, merpee xpén noo gak de, 32no zaknan de gonezhe nak ne nli no por ne nli guin nak ne yláá de.
33Wke men re men:
―Noo yra noo xnëz Abraham zëëd noo, rut lo nakdet noo mén ne che wdoo. ¿Penak na de ne yláá noo?
34Lex re Ne lo men:
―Nligue yna noo lo de, ne yrandxee mén ne rlaa dol che wdoo men lo dol. 35Te mén ne che wdoo ngabdet men lad zhiin familye ne wka men, per le zhiin familye guin lo familye guin ngab ne. 36Por neguin belne rselaa XPee Dëdyuzh de, laa de gak men ne nlipee wláá. 37Che nan noo ne xnëz Abraham zëëd de yra de, per rlaan de yket de noo, porke rlaleedxdet de ne rzëët noo. 38Noo ne wneluu Xuz noo lo noo rzëët noo, zenga ke laa de ne rzëët xuz de neguin rlaa de.
39Wke men re men:
―Abraham nak xuz noo.
Lex re Jesus lo men:
―Belne nli zhiin Abraham nak de, slaa de ne wlaa Abraham. 40Per lel rlaan de yket de noo por ne rzëët noo diznli ne wneluu Dëdyuzh lo noo. ¡Nunk wlaadet Abraham zegwa! 41Per le laa de ne rlaa ke xuz de rlaa de.
Lex re men:
―Noo yra noo yëten noo ste xuz noo; tebegue xuz noo rap noo, laa me nga nak Dëdyuzh.
42Lex re Jesus lo men:
―Belne nli Dëdyuzh nak xuz de, syaan de noo, porke lo Dëdyuzh wruu noo ne zëëd noo; zëëdet noo noze xkwent noo, sinke laa Ne wxaal noo. 43Rdeedet de kwent xdiiz noo porke rlaandet de ykagyedyag de ne rzëët noo. 44Bzelo nak xuz de, ne rlaan men ylaa de, neguin nak ne rlaan de ylaa de. Desde ne waa gyëzlyu rlaa Bzelo gyii. Axtegue rlaandet men diznli, porke nunk rniidet men diznli. Chene rkade men, rbonyoo men ne nak men; porke men ne rkade nak men no laa men nak xuz gyelerkade. 45Per le noo kom diznli rnii noo, rlaleedxdet de noo. 46¿Txu laa de yra de yzëët belne nuu dol wlaa noo? No belne nli rnii noo, ¿penak rlaleedxdet de noo cheguin? 47Mén ne nak xpén Dëdyuzh, rkagyedyag men xdiiz Ne. Per le laa de yra de nakdet de xpén Ne, por neguin rkagyedyagdet de xdiiz Ne.
Cheguel nuu Crist chene le Abraham wuu
48Lex re yra men-Israel lo Jesus:
―Nli ke rnii noo gon ne men-Samaria nak de no ne menzab nuu lextoo de.
49Wke Ne re Ne:
―Noo ni te menzab yëtet lextoo noo, sinke le noo rzaknon Xuz noo, per le laa de yra de rzaknondet de noo. 50Noo ryedet noo gan pezee saknon mén noo, mase nuu te Men ne rlaan ne saknon mén noo, laa Men nga nak ne rlaa gyelextis. 51Nligue yna noo ne men ne rlaa ne rzëët noo, nunk guetet men.
52Lex wke men-Israel, re men:
―Orree si che nan noo ne menzab nuu lextoo de. Abraham no le yra profet wet men, le laa de naa, na ne men ne rlaa ne rzëët de, nunk guetet men. 53¿Peguin mazre nondee de ke lo Abraham xpenkwlal noo? Si wet men no wet ke yra profet. Le laa de naa, ¿txuzhleg rzaa lextoo de nak de?
54Wke Jesus, re Ne:
―Belne noo ke rlep xeblaan noo, bet nondet ne rnii noo por noo. Per men ne rlep xeblaan noo nak Xuz noo, ne na ke de yra de ne nak XDëdyuzh de. 55Per laa de rnebeeydet de me. Noo si rnebeey noo me, no belne yna noo ne rnebeeydet noo me, noze rkade noo zeg rlaa ke de. Per noo nli rnebeey noo me, no rlaa noo ne rzëët me. 56Abraham xpenkwlal be, kesentyent rzhiilen men ne kwii men dxe ne chiid noo, no chene wii meno, mazre ntozdee wzhiilen men.
57Lex re men-Israel lo Jesus:
―Ni txupchii iz gardet gap de, ¿pezee ne yna de ne wii de Abraham?
58Wke Jesus, re Ne:
―Nligue yna noo lo de ne axtegue antes ne tsuu Abraham, che nuu noo.
59Orguin wgoob men gye ngugye men Ne; per wootsgue Ne lad men, lex wdesu Ne noze lad men yra men, wruu Ne lenxeydoo Dëdyuzh sya Ne.

Currently Selected:

JUAN 8: zpi

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy