JUAN 2
2
Gyelmilaguer ne wlaa Jesus lo te dooy
1Ne wyon gbiz wuu te dooy gyëz-Caná ne nak lo lyu ne la Galilea no xnaa Jesus zu lo dooy guin, 2no lo Jesus re mén guin ne ylaa dooy ne tsa Jesus dooy yra Jesus xpén Jesus. 3Chene le bin wbidx, re xnaa Jesus lo Jesus:
―Wbidx xbin men.
4Wke Jesus, re Jesus:
―Wnaae, ¿penak na de zegwa lo noo? Gardet ydxiin or ne ylaa noo ne ryal ylaa noo.
5Per re xnaa Jesus lo yra men ne rlaa dxiin nga:
―Gulaa yra ne yna Jesus lo de.
6Nga zu xuup gyus gye ne rdaa nis ne raa nya yra men-Israel no ne raa nii men, zegnak xkoxtumber men. Te te gyus guin rdaa we zeg tebgwyuu liter nis. 7Lex re Jesus lo men ne rlaa dxiin nga:
―Gusezaa nis yra gyusree.
Orguin wsezadoo meno. 8Zhich guin re Jesus lo men:
―Orrenaa gukoo we tebruu we, gutsadee we lo mén ne zudíp lo dooy.
Lex wano meno. 9Chene le mén guin ne zudíp lo dooy wzeeno, le we che wak bin, no ni nandet men pa wzaa we. Nonchee men ne rlaa dxiin nga nano, porke laa men waxii nis. Orguin wbëz mén guin ne zudíp lo dooy men ne kayak xdooy, 10lex re men lo men:
―Yrandxee mén, primer rgyiiz men bin ne mazre wendee; chene che kesentyent woo mén bin ne mazre wendee, lex rgyiiz men bin ne nguudxdee. Per le laa de wgutsoow de bin ne mazre wendee, axtegue orree wboo do.
11Laa primer gyelmilaguer ne wlaa Jesus nee, gyëz-Caná ne nak lo lyu ne la Galilea wlaa No. Zenga wbonyoo Ne xgyelenzoon Ne, ne le yra xpén Ne wlaleedxre Ne.
12Wluzh wak neree, za Ne Capernaum yra Ne bech Ne, no le yra xpén Ne, no le xnaa Ne. Nga wkaa Ne yra Ne men txup tson gbiz.
Wnexoon Jesus yra mén ne ndxin rtoo ruxeydoo Dëdyuzh
(Mt. 21:12-13; Mr. 11:15-18; Lc. 19:45-46)
13Chene che wyob pask lni ne rlaa men-Israel, za Jesus Jerusalén. 14Wdxiin Ne ruxeydoo Dëdyuzh, le yra mén ne katoo yuz, mén ne katoo mëkzhiil, mén ne katoo mëër, ndxin nga rtoo yra maa guin, no zob ke mén ne rtsaa medzit. 15Ne wii Ne ne ndxin yra mén guin nga, wzhexkwaa Ne tebla duu, lex kon duu guin wboo Ne men nga yra men xyuz men no le xpëkzhiil men, no wtxëëts Ne yrandxee xmed mén ne rtsaa medzit, no wnekantaa Ne yra xmezh men, 16le lo yra mén ne rtoo mëër re Ne:
―¡Gukoo neree nee! ¡Ylaadet de xyuu Xuz noo zegnak lgyeey!
17Orguin wnileedx yra xpén Jesus ne ka lo xgyiich Dëdyuzh ledne re: “Tant rlaan noo ganchi noo xyuu de, rlayaa noo ne rzaknondet méno.”
18Lex re men-Israel lo Ne:
―Gulaa te gyelmilaguer kwii noo chen gyen ne rap de derech ne rlaa de neree.
19Wke Ne re Ne:
―Gulitla ydooree, tsonegue gbiz ylep ke noo we ste.
20Lex re men:
―Txuplalno-xuup iz wkalep mén ydooree. ¿Le laa de naa ne ylepo tsonegue gbiz?
21Per let xkwentet ydoo wzëët Ne ne re Ne zenga, sinke led ke Ne wzëët Ne. 22Por neguin, chene le Ne wban, wnileedx yra xpén Ne diiz guin ne re Ne, wlaleedx men yra diiz ne zëëd lo xgyiich Dëdyuzh no le yra diiz ne re Ne.
Nan Jesus gan kox nuu lextoo yrandxee mén
23Ne ka Jesus Jerusalén lo lni pask, ndalyaa mén wlaleedx Ne ne wii men yra gyelmilaguer ne rlaa Ne. 24Per wlaleedxdet Ne men, porke nanwen Ne gan kox nuu lextoo men yrandxee men. 25Rut wkyiinden Ne ne nzëët gan pezee nak mén porke nanwen Ne gan kox nuu lextoo te te mén.
Currently Selected:
JUAN 2: zpi
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.