Namba 19
19
Ol asis blong red kao
1-2Nao Hae God i givim ol rul blong hem long Moses mo Hae Pris Eron blong tufala i go talemaot long ol laen* blong Isrel.* Hem i talem se, “Bambae yufala i mas tekem wan red kao we i no gat wan samting i rong long bodi blong hem, mo we yufala i no yusum yet blong wok, 3nao bambae yufala i kam givim long pris ya Eleasara. Nao hem i mas tekem i gowe long ples ya we ol haos tapolen blong yufala i stap long hem, i go afsaed, mo long fes blong pris ya, wan man i mas kilim buluk ya i ded. 4Nao pris i mas tekem smol blad blong buluk ya, mo i mas lukluk i kam stret long ples ya we Haos Tapolen blong mi i stap long hem, mo hem i mas pusum fingga blong hem i go long blad ya, i mas sakem seven taem i kam long saed ya we hem i lukluk i kam long hem. 5Nao long fes blong pris ya, wan long yufala bambae i mas bonem buluk ya long faea. Man ya i mas bonem olgeta haf blong buluk ya wetem skin blong hem, mo mit blong hem, mo blad blong hem, mo ol gat blong hem. 6Pris ya i mas tekem wan pis wud blong tri ya sida,* mo wan han blong smol tri ya hisop,* mo wan smol rop we i red, nao i mas sakem trifala tu i go long faea. 7Biaen, hem i mas wasem ol klos blong hem, mo i mas swim, nao bambae hem i save kam insaed long ples ya bakegen we ol haos tapolen blong yufala i stap long hem. Be long fes blong mi, bambae hem i no klin yet gogo kasem we san i godaon. 8Mo man we i bonem buluk ya, hem tu i mas wasem klos blong hem, mo i mas swim. Be long fes blong mi, hem tu bambae i no klin yet gogo kasem we san i godaon. 9#Hib 9.13Nao wan man we i klin long fes blong mi bambae i mas tekem ol asis blong buluk ya, i mas go putum long wan ples we i klin long fes blong mi afsaed long ples ya we ol haos tapolen blong yufala i stap long hem. Asis ya bambae i save stap gud long ples ya, nao bambae yufala i save yusum blong mekemrere wota blong mekem yufala i klin long fes blong mi. Wota ya we asis blong buluk ya i stap long hem bambae i save mekem man i klin long fes blong mi. 10Nao man we i go putumgud asis blong buluk ya i mas wasem ol klos blong hem, mo hem tu bambae i no klin long fes blong mi gogo kasem we san i godaon. Yufala evriwan we i laen blong Isrel, wetem ol man afsaed we oli stap wetem yufala, rul ya bambae i holem yufala olwe, gogo i no save finis.”
Man we i tajem dedbodi, hem i doti long fes blong Hae God
11Mo Hae God i talem long tufala se, “Man we i tajem dedbodi, bambae hem i no klin long fes blong mi gogo kasem seven dei. 12Nao long namba tri dei blong hem, mo long namba seven dei blong hem, hem i mas mekem hem i klin long wota we asis blong red buluk ya i stap long hem, nao bambae hem i kam klin bakegen. Be sipos hem i no mekem fasin ya, bambae hem i no save kam klin long fes blong mi, 13nao hem i stap mekem Haos Tapolen blong mi i doti long fes blong mi, mo bambae mi mi no moa save kaontem hem, se i man blong mi#19.13: Yu luk futnot B long 9.13. Bambae hem i stap olsem nomo, we i doti long fes blong mi, from we hem i no askem wan man we i klin long fes blong mi blong tekem wota ya, i kafsaedem i go long bodi blong hem blong mekem hem i klin.
14“Mo sipos wan man i ded insaed long wan haos tapolen blong yufala, rul blong samting ya i olsem. Ol man we oli stap long haos tapolen ya long taem ya, mo ol man we biaen oli go insaed long haos ya, bambae oli stap seven dei, we oli doti long fes blong mi. 15Mo olgeta botel mo sospen long haos ya we ol man oli no putum led long olgeta, ol samting ya tu oli kam doti long fes blong mi. 16Mo sipos man i stap long open ples, nao i tajem man we i ded long faet no long sam narafala samting, no i tajem bun blong wan man we i ded bifo, no i tajem beregraon blong wan man, man ya tu bambae i stap seven dei, we hem i doti long fes blong mi.
17“Fasin we yufala i mas folem blong mekem olgeta oli klin bakegen long fes blong mi i olsem. Wan man i mas tekem asis ya, i mas putum long wan sospen, mo i mas kafsaedem wota we oli kasem long springwota i go long hem. 18Nao sipos man i ded long haos, wan man we i klin long fes blong mi bambae i mas tekem wan smol han blong tri ya hisop,* i mas pusum i go long wota ya, mo i mas saksakem wota ya i go long haos ya, mo long evri samting we i stap insaed long hem, mo long olgeta man we oli stap long haos ya long taem ya we dedman i stap. Mo sipos man i no klin from we i tajem bun blong dedman, no i tajem dedbodi, no beregraon blong wan man, man we i klin long fes blong mi bambae i mas saksakem wota ya i go long hem. 19Man ya i mas saksakem wota ya i go long hem long namba tri dei blong hem mo long namba seven dei blong hem, mo long namba seven dei ya nao, bambae i mekem hem i klin long fes blong mi. Nao man ya we fastaem i no klin bambae hem i mas wasem ol klos blong hem, mo i mas swim blong bodi blong hem i klin, mo long taem we san i godaon, bambae hem i klin.
20“Be sipos man we i doti long fes blong mi i no mekem ol samting ya blong kam klin bakegen, bambae hem i mekem Haos Tapolen blong mi i doti tu, mo bambae mi mi no moa save kaontem hem se i man blong mi. Bambae hem i stap olsem nomo, we i doti long fes blong mi, from we hem i no askem wan man we i klin long fes blong mi blong tekem wota ya, i kafsaedem i go long bodi blong hem. 21Hemia i wan rul we bambae yufala i mas folem oltaem, gogo i no save finis.
“Man we i stap saksakem wota i go long man olsem blong mekem hem i klin, hem tu bambae i mas wasem ol klos blong hem, mo olgeta man we oli tajem wota ya, bambae oli doti long fes blong mi, gogo kasem we san i godaon. 22Mo sipos wan man we i doti i tajem wan samting, samting ya tu bambae i kam doti long fes blong mi, mo sipos narafala man i tajem samting ya, bambae hem tu i doti gogo kasem we san i godaon.”
Currently Selected:
Namba 19: OBBR
Highlight
Copy
Compare
Share
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012
