San Lujc 10
10
Rxhiaal Jesús gayojnchii bejn
1Chi gudëd gojc ree ni guin, gulej Dad Jesús gayojnchii bejn, abiꞌ guxhaalaman tioꞌp gaj reeman luguiedx ree në ree ranch din ned reeman che gaj reeman lod na̱j cheman. 2Rëbaman loj reeman:
―Diidxliczi, zien bejn rën gucaagdiajg xtiidx Dios, per ad zient bén gulüü laa reeman yuꞌ. Zeel gol gurejdx gunab Dios din guixhiaalaman mazri zien bén gulüü laa reeman. 3Gol chej, naj rxhial lëjt ziꞌc rej ree xiil galay ree cuyojt. 4Ad chinëdi guijxh, niꞌqui milia, niꞌqui zatib nejz xgurëchidi, ad sudxedi guinieenëdi bejn ree runejz. 5Bantëëz lënü chuꞌdi, yalojxgaj gol güjdx: “Dios yabeꞌcdxe luxdoodi.” 6Abiꞌ bal lënüzii yuꞌ ree bén rayal guialnazaꞌc guin, zayaꞌnan yagaj. Guiáad bal id rayal reeman laan zayejcan con lëjt. 7Yagaj gol bayaꞌn, gol gudaw, gol guꞌ ni gunee reeman. Din bén rüjn dxiin rayal gaxaman. Yagajzi gol bayaꞌn ad bal yayaꞌndi lood ren. 8Chi guidxindi tijb guiedx lod yacaꞌ reeman lëjt, gol gudaw ni gunee reeman. 9Gol bayüjn ree bénragxuu yuꞌ ree luguiedx guin, gol güjdx tëë loj reeman: “Ma zëëd xguialrniabee Dios gajxh par lëjt.” 10Per bal guidxindi tijb guiedx lod ad rënt reeman yacaꞌ reeman lëjt, gol brii lunejz, gol güjdx loj reeman: 11“Xt xgoxyuj ladxidi ni cwa du guiaꞌn, radxijpan ziꞌc tijb sen guial ad bidxgaꞌtidi dux tiidxan. Per gol gogbee, guial ma zëëd xguialrniabee Dios gajxh par lëjt.” 12Naj rni lëjt guial dxej yadëëd ree bejn cwent loj Dios, mazri casti naroob yayal reeman guial loj ree bén gure guiedx Sodoma.
Bén ad bazoobt ree xtiidx Dios
(Mt. 11:20‑24)
13Rëb tëë Jesús:
―¡Probza lëjt bén Corazín! ¡Probza lëjt bén Betsaida! Din bal guiedx Tiro në guiedx Sidón niajc gra ree milagr ni goc ladxidi, diizd gocli nayüjn reeman xgab por xtol reeman, niajcw reeman lajd yaꞌs nuroob tëë cobdëj guijc reeman ziꞌc tijb sen guial ma bayüjn reeman xgab por xtol reeman. 14Per rnin lojdi guial dxej yadëëd ree bejn cwent loj Dios, mazri casti naroob yayalidi guial loj ree bén Tiro në ree bén Sidón. 15Guiáad lëjt, bén Capernaum, ad naladxidi yayalidi xanyabaa, lëjt yayal gabijl.
16Dxel rëb Jesús loj ree xbejnman:
―Bén ridxgaꞌ lëjt, najn ridxgaꞌman, per bén ad ridxgaꞌt lëjt, najn ad ridxgaꞌtaman. Guiáad bén ad ridxgaꞌt naj, bén guxhaal najn ad ridxgaꞌtaman.
Badxin ree bén gayojnchii guxhaal Jesús
17Chi badxin ree bén gayojnchii guxhaal Jesús, dád rabaa reeman rëb reeman lojman:
―Dad, xt ree xindxab ruzoob dux tiidxan chi razaꞌtan lajl.
18Abiꞌ rëb Jesús loj reeman:
―Waliquidi, naj baguia, ziꞌczi rëꞌp nijs basëëb xguialrniabee xindxab. 19Naj banee lëjt guialrniabee din gulëëdi guijc ree bëël në guijc ree nixüb, në par güündi gan loj xguialrniabee xindxab sin guial güünx lëjt xhienin. 20Per ad rabaadi guial ruzoob ree xindxab guin xtiidxidi, gol babaa guial ca lajdi loj libr yuꞌ xanyabaa.
Rabaa Jesús
(Mt. 11:25‑27; 13:16‑17)
21Loj hor ziigajc babaa daꞌt Jesús por xSprijt Dios, abiꞌ rëbaman:
―Ruzatan lüj zagdxe, Dad, lüj rniabee xanyabaa në loj guidxliuj, din ni baquieꞌchil loj ree bén rajc në loj ree bén rigniaꞌ, laan ma balüül loj ree bén ad rajczaꞌct. Zian gojcan Dad, din zian guyënl.
22’Da Dadan banee gra lon. Abiꞌ achut nünbee Jesucrist Xiꞌn Dios, tijbzi Dios, achu tëët nünbee Dios, tijbzi Jesucrist xiꞌnman con ree bén rënman güünbee Dios.
23Dxel baguiaaman loj ree xbejnman, abiꞌ rëbaman lojzi reeman:
―Xiquilbaa ree bén guguiaa ni cuguiaadi. 24Din naj rni lojdi, zien ree bén badëë xtiidx Dios loj ree bejn në ree rey guyën nuguiaa ni cuguiaadi, per ad baguiaat reeman laan. Guyën reeman nucaagdiajg reeman ni cucaagdiajguidi, per ad bacaagdiajgt reeman laan.
Xcwent tijb bén Samaria
25Tijb mextr rajc ley guzuliman guneenëman Jesús. Abiꞌ din güünman laaman prueb, gunabdiidxaman lojman rëbaman:
―Mextr, ¿xhie rayal günan din gaꞌpan guialnaban tiblayaa con Dios?
26Badxiꞌ Jesús laan rëbaman:
―¿Xhie ca loj ley badëë Dios loj Moisejs? ¿Xhienaag rigniaꞌlan?
27Abiꞌ rëb mextr guin:
―“Guyën xDadil Dios guidib guijc guidib ladxil guyën tëë ben ren ziꞌc rën lüj gajc.”
28Badxiꞌ Jesús laan, rëbaman:
―Zagdxequi badxiꞌlan. Bal güünl zian zajpil guialnaban tiblayaa con Dios.
29Per guyën mextr guin nayaꞌnman zagdxe, gunabdiidxaman loj Jesús, rëbaman:
―¿Chu bénan guiënan ziꞌc rën naj gajc?
30Dxel be Jesús tijb cwent lojman, rëbaman:
―Tijb bén Israel briiman Jerusalén zëman guiedx Jericó. Abiꞌ gunaaz ree xingubaan laaman, gudijn reex laaman gulan tëë reex gra ni caꞌman xt në xabaman, basaꞌn reex laaman ma güjtczaman. 31Dxel gudëd tijb bixhioz niz yagaj, per chi baguiaaman bén guin, zijt bicaaman volt, zëtaman. 32Në tijb bén Levita bén rüjn yudar bixhioz ree, gudëd niz yagaj, chi baguiaaman bén guin, zijt bicaaman volt, zëtaman. 33Per tijb bén Samaria gudëd niz yagaj, chi baguiaaman bén guin, bayaman laaman, 34dxel gubigaman lod nagaꞌman, badxeꞌman sejt con vin lod nadxeelguijdxaman dxel guxhiiman laan con lajd. Zianz badxiibaman laaman xburaman binëman laaman lënü lod rayaꞌn ree bejn. Yagaj gunajman laaman. 35Chi bareguiaal, chi ma yaguiaj bén Samaria guin, gulëëman milia xieen tioꞌp dxej dxiin badëëman laan loj bén na̱j lidxan, rëbaman lojman: “Gunaj bén guie, bal gunijtil mazri, naj yaguix laan chi yayeꞌcan.”
36Dxel rëb Jesús loj mextr guin:
―Yan, loj guiyon ree bén guin, ¿chu bénan guyën bén gudin ree xingubaan guin?
37Badxiꞌ mextr guinan rëbaman:
―Bén baya laaman.
Dxel rëb Jesús lojman:
―Baguiaj, been ziangajc con ben ren.
Rignaj Jesús Mart në Li
38Basnuu Jesús zëman abiꞌ bidxinman tijb guiedxdoo, yagaj wejman lidx tijb biin la Mart. 39Yuꞌ tijb xbëlim lam Li. Gurej Li guin guiaꞌ Jesús cucaagdiajguim ni caneeman. 40Per Mart guin mazri ruquiejnnë gra xmandadim, abiꞌ bibiguim loj Jesús rëbim:
―Dad, ¿nid rul xgab ya guial rusaꞌn da bëlan naj con gra mandad guin? Güjdx lojm din güünm naj yudar.
41Badxiꞌ Jesús laan rëbaman:
―Mart, Mart, dád rul xgab guial yuꞌ daꞌt xmandadil. 42Per tijbzi ni mazri zojbloj yuꞌ. Li gulejm ni mazri zojbloj, abiꞌ achut zajc chiquiedan lojm.
Currently Selected:
San Lujc 10: zas
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.