San Juan 8
8
Béngunaa banaaznë xinguiaaw ren
1Per Jesús zëman ruguiaꞌ Olivos. 2Chi bareguiaal, rsil badxinman lën yadooroꞌ Jerusalén stijb. Zien ree bejn bidoꞌp lod zaꞌman, dxel gurejman guzuloj culüüman laa reeman. 3Abiꞌ mextr rulüü ree ley con ree bénfarisew bidxinnë tijb béngunaa banaaznë tijb xinguiaaw, dxel bazuj reeman laaman galay ree bén guin, 4zianz rëb reeman loj Jesús:
―Mextr, banaaz béngunaa guie loj mer hor ni yuꞌnëman xinguiaaw ren. 5Abiꞌ loj ley basaꞌnnë Moisejs dunuj ree ca guial lasaꞌ béngunaa guie rayal guiëtaman con guiaj. ¿Laadx lüj xhie nal?
6Gunabdiidx reeman zian din guidoon xhie guiëbaman din gac gutediaꞌ reeman laaman. Per con basajb lojman abiꞌ guzulojman cucaaman luyuj con xbacwënman. 7Per guial laa reeman canabdiidxzi canabdiidx reeman lojman, abiꞌ babejliman, rëbaman loj reeman:
―Chutëëz bén ad wayüjnt dol, yaloj laaman gucaaguiaj béngunaa guie.
8Dxel basajb lojman stijb, basnuu bacaaman luyuj guin. 9Chi biguiejn reeman ni guneeman, guzuloj cayza tijbgaj reeman, diizd mazri bengol xt bara reeman baza. Tijbzi béngunaa guin bayaꞌn con Jesús loj ree bén rigaꞌ yagaj. 10Dxel babejliman, rëbaman loj béngunaa guin:
―¿Con ree bén bidnë lüj? ¿Niꞌqui tijb reeman achut xhie been lüj ya?
11Dxel rëb béngunaa guin:
―Dad, niꞌqui tijbaman.
Abiꞌ rëb Jesús:
―Niꞌqui naj achet günan lüj. Baguiaj yan, ad güünril dol.
Jesús na̱j bajl par bénguidxliuj
12Dxel gunee Jesús stijb, rëbaman loj ree bén rigaꞌ yagaj:
―Naj na̱j bajl rusni bénguidxliuj. Abiꞌ bén guzoob da diidxan, zani xquiarguiejnman xhienaag gapaman guialnaban tiblayaa con Dios, ad yuꞌ tëët dxej guicajy xquiarguiejnman.
13Abiꞌ ree bénfarisew rëb reeman lojman:
―Lüj gajc ruzaꞌt lüj, abiꞌ achet lasajc xtiidxil.
14Dxel rëb Jesús loj reeman:
―Lasajc da diidxan, majsi naj gajc cane por naj, din naj ragbee ban zialan ban tëë gan, saꞌn lëjt ad ragbeetidi ban zialan ban tëë gan. 15Lëjt rnieedi bejn ziꞌctizi na̱j xixgabidi, saꞌn naj achut ruzatan. 16Abiꞌ bal guzatan bejn, ganen diidxli, din ad zanetan ziꞌc na̱j da xgaban, në da Dadan bén guxhaal naj ragbee guial diidxli na̱j ni ganen. 17Abiꞌ loj xleydi ca guial chi yuꞌ tioꞌp bén rniee tiblojzi, diidxliqui na̱j ni rniee reeman. 18Yan, naj gajc na̱j tijb bén rniee por naj, abiꞌ da Dadan bén guxhaal naj, na̱j stijb bén rniee por naj.
19Gunabdiidx reeman lojman rëb reeman:
―¿Con xdadil?
Badxiꞌman laan rëbaman:
―Lëjt ad nünbeetidi naj, ad nünbee tëëtidi da Dadan, din bal nüjnbeedi naj, ziangajc nüjnbeedi da Dadan.
20Zian gunee Jesús laꞌtgaj rulüüman bejn ree lën yadooroꞌ Jerusalén, niz lod zaꞌ ree ni rguꞌ reeman gon. Per achut gunaaz laaman, din ad wadxint hor guiniaazaman.
Lod gan ad zileꞌt guiꞌtidi
21Gunee Jesús stijb, rëbaman:
―Chi ma gan, zaguiilidi naj, per zëjtnë xtolidi, din lod gan ad zileꞌt guiꞌtidi.
22Dxel rëb ree bén Israel guin:
―¿Wen ni laagajcaman gugüjt laaman ya, zeel naman guial ad zajct yoꞌ ree lod cheman?
23Abiꞌ rëb Jesús loj reeman:
―Lëjt na̱j bén ladguiajt guie, saꞌn naj ladya ni zialan. Lëjt na̱j bénguidxliuj, saꞌn naj ad bénguidxliujt na̱j. 24Zeel rnin, zëjtnë xtolidi. Din bal id zaliladxidi guial naj na̱j bén najn, zëjtnë xtolidi.
25Dxel gunabdiidx reeman lojman, rëb reeman:
―¿Chuza lüj?
Badxiꞌman laan rëbaman:
―Ma rnin lojdi diizd yaloj. 26Zien ni raꞌpan gulün lëjt ni ganenëꞌ tëën lëjt. Per naj, ni canen loj bénguidxliuj na̱j ni rucagdiagan rniee bén guxhaal naj, abiꞌ ni rnieeman na̱j diidxli.
27Per laa reeman ad gogbeet guial Diosan ruzaꞌtaman. 28Zeel rëbaman loj reeman:
―Chi ma beendi ziꞌctizi rëndi con Bén guxhaal Dios, dxel gagbeedi najcan, gagbee tëëdi guial achetczi rünan por da xgabzan, naj rnie ni ma balüü da Dadan naj. 29Din laaman guxhaal naj, laaman zaꞌ con naj, abiꞌ ad yuꞌt dxej cwëëladxaman naj, guial zianczi rünan ni rayuladxaman.
30Chi rëb Jesús zian, zien ree bejn bililadx laaman.
Bén wali na̱j xbejn Dios
31Rëb Jesús loj ree bén Israel bililadx laaman:
―Bal gusnuu guzoobidi da diidxan, waliqui najdi da bejnan, 32abiꞌ züjnbeedi conin na̱j diidxli, abiꞌ por diidxli guin zalaadi.
33Badxiꞌ reeman laan rëb reeman:
―Dunujn zioꞌp loj xdiaa Abraham, abiꞌ ad yuꞌt dxej wayajcan ziꞌc bén nadoꞌ. ¿Chexquiza zeel nal du lojn, guial por diidxli zalaan?
34Dxel rëbaman loj reeman:
―Diidxli rnin lojdi, guial graczi bén rüjn ganaxzi dol, laa reeman na̱j ziꞌc bén nadoꞌ loj dol. 35Abiꞌ tijb bén nadoꞌ loj bejn, ad zileꞌt guiëbaman xfamilaman na̱j xpatronman, saꞌn xiꞌn patron guin zileꞌ guiëbix xfamilixan. 36Zeel bal Xiꞌnman guslaa lëjt, ad najtridi ziꞌc bén nadoꞌ. 37Ma qui ragbeen guial loj xdiaa Abraham zëëdidi, per lëjt rën gugüjt naj guial ad rayuladxtidi da diidxan. 38Naj rni ni ma balüü da Dadan naj, saꞌn lëjt rüjndi ziꞌc na xDadidi güündi.
39Badxiꞌ reeman rëb reeman:
―Dux Dadan na̱j Abraham.
Dxel rëb Jesús loj reeman:
―Bal niajquidi xiꞌn Abraham, züjndi ziꞌc beenman. 40Per yan, majsi ma rnin lëjt diidxli ziꞌc balüü Dios naj, lëjt rëndi gugüjtidi naj. ¡Abiꞌ Abraham ad yuꞌt dxej nüjnman zian! 41Saꞌn lëjt rüjndi ziꞌcgajc rüjn xDadidi.
Abiꞌ rëb reeman loj Jesús:
―Dunujn achut mazri xiꞌn nayajcan. Tijbzi Dios na̱j dux Dadan.
42Dxel rëb Jesús loj reeman:
―Bal walidi Dios na̱j xDadidi, guiëndi naj, din por laaman zialan loj guidxliuj. Ad zialtan por naj gajc, zialan por Dios bén guxhaal naj. 43Abiꞌ ad rigniaꞌtidi ni rnin, guial ad rëntidi gucaagdiajguidi da diidxan. 44XDadidi na̱j xindxab, abiꞌ rüjndi ziꞌc rënx güündi, din diizd yaloj ruladx xindxab guin gugüjtix bejn. Ad yuꞌt dxej chinalix ni na̱j diidxli, din ad rnieetix diidxli. Chi rnieex diidx rusquiee, achet naladxix, din laax na̱j xin rusquiee na̱j tëëx xdad guialrusquiee. 45Per guial naj rni lëjt ganax diidxli, ad rliladxtidi naj. 46¿Chu lëjt zajc na guial yuꞌ xhie dol ma benan? Abiꞌ bal diidxli na̱j ni canen, ¿chexquiza zeel ad rliladxtidi naj? 47Bén na̱j xbejn Dios rucaagdiajgaman xtiidxaman, per lëjt ad xbejntaman najdi, zeel ad rucaagdiajgtidi xtiidxaman.
Mal yuꞌ Jesús chi gad Abraham gal
48Dxel rëb ree bén Israel guin loj Jesús:
―Waliqui ni ranan guial xindxab yuꞌ luxdool na̱j tëël bén Samaria.
49Badxiꞌman laan rëbaman:
―Achut xindxab yuꞌ luxdon, naj cuzob xtiidx da Dadan, per lëjt ganax diidxguijdx rnieedi naj. 50Naj ad raguiltan guilies ree bejn da valoran, majsi yuꞌ bén rën güün bejn zian, abiꞌ laaman rüjn xguialguxtis. 51Diidxli rnin lëjt, bén guzoob da diidxan, ad yuꞌt dxej guiëtaman.
52Dxel rëb ree bén Israel guin lojman:
―Yanri ma rayagbeechaawan guial xindxabqui yuꞌ luxdool. Abraham në gra ree bén badëë xtiidx Dios loj ree bejn, güjt reeman, guiáad lüj nal: “Bén guzoob da diidxan, ad yuꞌt dxej guiëtaman.” 53¿Wen mazri lasajquil ya guial loj dux béngulal ree Abraham? Güjtaman, güjt tëë ree bén badëë xtiidx Dios loj ree bejn. ¿Laadx lüj chu naladxil najl?
54Abiꞌ rëb Jesús loj reeman:
―Bal naj gajc gales da valoran, achet lasajc ni ganen por naj. Per bén rlies da valoran na̱j da Dadan, bén nagajquidi na̱j xDiosidi. 55Lëjt ad nünbeetidi laaman, saꞌn naj nünbeen laaman. Abiꞌ bal ganin ad nünbeetan laaman, nëgajc naj ma na̱j bén rusquiee ziꞌcgajc lëjt. Per nünbeen laaman abiꞌ ruzoban xtiidxaman. 56Xbéngulalidi Abraham, babaaman guial guguiaaman dxej ni guialan. Abiꞌ chi baguiaaman dxej guin, mazri babaaman.
57Dxel rëb ree bén Israel guin lojman:
―Niꞌqui gadil chuꞌ tüꞌpchii ijz, ¿guiáad lüj ya nal baguiaal Abraham?
58Abiꞌ gunee Jesús rëbaman:
―Diidxli rnin lojdi, mal nabanan chi gad Abraham chuꞌ.
59Dxel gules reeman guiaj din nucaa reeman laan Jesús. Per laa guzëëb gajcaman galay ree bejn, abiꞌ gudëdaman galay reeman bariiman lën yadoo guin, laa zia gajcaman.
Currently Selected:
San Juan 8: zas
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.