San Lujc 2
2
Rajl Jesús
(Mt. 1:18‑25)
1Lën ree dxejzii gunabee rey César Augusto guiyab gra ree bejn guidib lod rniabeeman. 2Laan na̱j ni yaloj biyab ree bejn chi goc Cirenio gobernador Siria. 3Graczi ree bejn na̱j yaguiaj ladx ladx din guiyab reeman. 4Zianan zeel brii Xiëb luguiedx Nazaret ni rigaꞌ niz Galilea, wejman Belén, ni rigaꞌ niz Judea, lod gol rey Davi din loj xdiaa rey Davi zëëd Xiëb. 5Wejman binëman Li, lacheelaman din guiyab reeman. Ma yuꞌ xiꞌn Li. 6Abiꞌ laꞌtgaj zaꞌ reeman Belén, bidxin dxej gojl bejndobëz guin. 7Yagaj gol xiꞌn yaloj Li, dxel batüübaman bejndobëz guin lajd, gudijxhaman laaman lod ru ni raw ree be, guial ad bidxejlt lënü nayaꞌn reeman.
Bidxin ree xianjl Dios lod zaꞌ ree bén rajp xiil
8Gajxh Belén guin zaꞌ ree bén rajp xiil, abiꞌ dajn guin gajc rdëd reeman guiaal rajp reeman laa reeb. 9Dxejczi balüüloj tijb xianjl Dios loj reeman, naynidxuj basni xbiani Dios lod rigaꞌ reeman abiꞌ dád bidxeb reeman. 10Per rëb anjl guin loj reeman:
―Ad rdxebidi din zidnëꞌn diidxzaꞌc lojdi, por laan yabaa gra ree bejn. 11Yan, ladx rey Davi ma gojl bén yabëë lëjt loj ni cazajquidi, laaman na̱j Cristo, laaman na̱j Dad. 12Abiꞌ din yayünbeedi laaman; nadüübaman lajd, nagaꞌman lod ru ni raw ree be.
13Dxejczi balüüloj zien daꞌt ree anjl cwëꞌ anjl yaloj guin, ruzaꞌt reeman Dios zagdxe, rëb reeman:
14¡Benzaꞌc bendxoon na̱j Dios bén yuꞌ xanyabaa,
abiꞌ loj guidxliuj yabeꞌcdxeman luxdoo bén rüjn ree ziꞌc rënman!
15Chi ma zia ree anjl guin xanyabaa, dxel rëb loj lasaꞌ ree bén rajp ree xiil guin:
―Yoꞌ ree Belén yuquiaa ree ni goc ni, ziꞌc ma bagojn dux Dad ree Dios dunuj ree.
16Dxel cari daꞌt zë reeman, abiꞌ bidxaagloj reeman Li në Xiëb, nëtëë bejndobëz guin nagaꞌman lod ru ni raw ree be. 17Chi baguiaa reeman laaman, be reeman diidx ni rëb anjl guin loj reeman xcwent bejndobëz guin, 18abiꞌ graczi ree bén biguiejn dád badxa loj reeman ni rëb ree bén rajp ree xiil guin. 19Per Li, rguꞌchaaw luxdooman gra ni rucaagdiajgaman, rüjn tëëman laan xgab. 20Dxel zia ree bén rajp ree xiil guin, rabaa reeman rudëë tëë reeman quixtëë loj Dios por gra ni baguiaa reeman biguiejn tëë reeman, guial gojc ziꞌc rëb anjl guin loj reeman.
Binë reeman Jesús lën yadooroꞌ Jerusalén
21Chi ma gojc toxman gojl bejndobëz guin, badxeꞌ reeman laaman sen ni ru ree bén Israel, baguꞌ tëë reeman lajman Jesús ziꞌc rëb anjl guin loj Li chi gad Jesús gacxhiej lënman.
22Chi bayaaloj ree dxej ni been Li ziꞌc rüjn ree béngunaa rajl xiꞌn, dxel binë reeman bejndobëz guin loj Dios lën yadooroꞌ Jerusalén. 23Been reeman zian din loj ley guin ca: “Gra ree xindoniguiaaw rajl yaloj ma na̱j reex par Dios.” 24Abiꞌ binë reeman gon par Dios ziꞌc rniabee ley: rayal chinë reeman tioꞌp gugdoo o tioꞌp palomdoo.
25Tiamp zii zojb bén la Simeón Jerusalén. Najman benzaꞌc rën tëëman Dios, rbëzaman bén gagnë bén Israel ree zaꞌnë tëë xSprijt Dios laaman. 26Abiꞌ por Sprijt guin gogbeeman guial ad zëjttaman xt guguiaaman Cristo, bén guixhiaalaman. 27Dxel por xSprijt Dios wejman lën yadooroꞌ Jerusalén. Laꞌtgaj yuꞌman lën yadoo guin, Xiëb con Li bidxinnë reeman Jesús din güün reeman ziꞌc rniabee ley, 28zianz gudiidx Simeón bejndobëz guin bazaꞌtaman Dios zagdxe, rëbaman:
29Dad, yanri ma babedxe luxdon.
Ma zajc guslaal naj guiëtan
najn xmojsil, ma gojc ziꞌc nal.
30Din con quijb guiaalon ma baguian bén gagnë dunujn.
31Guial ma bazujl laaman loj gra ree bénguidxliuj.
32Laaman na̱j biani par ree bén ad najt bén Israel,
na̱j tëëman bachaꞌ par ree xbén Israelil.
33Guiáad Xiëb con xniaa Jesús dád badxa loj reeman ni biguiejn reeman rëb Simeón xcwent bejndobëz guin. 34Dxel beenleꞌman laa reeman, zianz rëbaman loj Li xniaa Jesús:
―Li, Dios bacaabee bejndobëz guie din por laaman zien daꞌt ree bén Israel laa loj dol, per zien reeman yayaꞌn loj xtol. Zidgalüüman bejn ree conin na̱j ni ruladx Dios, per zien reeman ad zënt laaman. 35Abiꞌ zian gagbeeman xhienaag na̱j xixgab tijbgaj bejn, guiáad lüj ziꞌc tijb espad chëëz luxdool chi gac ree ni guin.
36Yagaj gajc zaꞌ tijb béngunaa yoꞌxh laman Ana, rudëëman xtiidx Dios loj ree bejn, xdadaman brii laj Fanuel, xdiaagulalaman gojc Aser. Benguiagan chi cwaꞌ xinguiaaw laaman, abiꞌ gajdx ijsi gubajnnë lacheelaman. 37Ma gojc tajpgajlbitap ijz bayaꞌnman bizëjb. Zianczi yuꞌman lën yadooroꞌ, rbaꞌnman rbejdx rniab tëëman Dios. 38Loj hor ziigajc bibigaman lod zaꞌnë Xiëb Li con Jesús, guzuloj cudëëdaman quixtëë loj Dios cuzaꞌt tëëman bejndobëz guin loj gra ree bén cabëz guixhiaal Dios bén gagnë bén Jerusalén ree.
Zia reeman Nazaret
39Chi ma been reeman graczi ni rniabee xley Dios, dxel zia ladx reeman Nazaret ni rigaꞌ niz Galilea. 40Caniꞌs bejndobëz guin, cayuman gojl, cayajcaman nasin, cayüjnleꞌ tëë Dios laaman.
Yuꞌ Jesús lën yadooroꞌ Jerusalén
41Gazob ijz rej ree xdad Jesús Jerusalén lanij pascw. 42Chi bazaꞌ Jesús chiptioꞌp ijz, binë ree xdadaman laaman lanij zii ziꞌc na̱j xcostumbr reeman. 43Chi ma gudëd lanij guin, baza ree xdad Jesús ma zia ladx reeman. Ad gogbeet reeman bayaꞌn Jesús Jerusalén. 44Gunaladx reeman ma noꞌchaman loj ree bén zia. Zian guza reeman tibdxej. Per chi baguiil reeman laaman loj lasaꞌ reeman në loj ree bén nünbee reeman, 45achut laaman naguiee. Dxel bayejc reeman zia reeman Jerusalén zatijb zigdiil reeman laaman.
46Xt ni gocri choon dxej badxejl reeman laaman lën yadooroꞌ Jerusalén, zojbaman galay ree mextr rajc ley, cucaagdiajgaman canabdiidx tëëman laa reeman. 47Gra ree bén caguiejn ni rnieeman caydxaloj reeman guial rajcaman në ree diidx radxiꞌman. 48Chi baguiaa ree xdadaman laaman, dád badxaloj reeman, dxel rëb xniaaman:
―Xiꞌn, ¿chexc zeel basajquil dunujn zian? Xdadil con naj dád nadxuꞌn xgab caydiilan lüj.
49Badxiꞌ Jesús laan rëbaman:
―¿Chexc zeel raguiilidi naj? ¿Nid ragbeedi ya rayal günan xchiin da Dadan?
50Per ad bigniaꞌt reeman xhie rën guiëb ni rëbaman.
51Dxel bayejcnëman laa reeman zia reeman Nazaret, graczi xtiidx ree xdadaman ruzoobaman, guiáad xniaaman graczan rguꞌchaaw luxdooman. 52Ziꞌcri caniꞌs Jesús cayu tëë mazri xquiarguiejnman. Rabaanë Dios laaman rabaanë tëë ree bejn laaman.
Currently Selected:
San Lujc 2: zas
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.