San Lujc 17
17
Bén ruzaalguiiw bejn din güünman dol
(Mt. 18:6‑7, 21‑22; Mr. 9:42)
1Rëb Jesús loj ree xbejnman:
―Zianczi yuꞌ ree ni ruzaalguiiw bejn din güünman dol, per ¡probza na̱j bén ruzaalguiiw zatijb bejn guial güünman dol! 2Par laaman zagdxeli na̱j guixhii reeman tijb guiaj mulin yëjnman din guzaal reeman laaman loj nijsdoo, luar guzaalguiiwaman tijb bén qui rliladxri naj din güünman dol. 3¡Gol gojp cudad!
’Bal xhie tijb ni mal güün tijb lasaꞌl, guneenëman. Abiꞌ bal bayüjnman xgab por ni beenman, beenman perdon. 4Majsi gajdx volt loj tibdxej güünman xhienin contr lüj, abiꞌ bal guiꞌtaman lojl gajdx volt naman: “Been naj perdon ad züntran zian”, rayal güünl laaman perdon.
Guialrniabee në guialrliladx
5Dxel rëb ree xi apóstoles Jesús lojman:
―Banee dunujn mazri guialrliladx.
6Abiꞌ rëb Jesús loj reeman:
―Bal na̱j xguialrliladxidi majsi ziꞌczi na̱j xhaj moxtajs, zileꞌ guiëbidi loj yagroꞌ guin: “Biaꞌxh guie, bisob loj nijsdoo”, zuzooban xtiidxidi.
Ni rayal güün tijb mojs
7’Bal tijb lëjt rajp tijb mojs, abiꞌ chi yaguiaad mojs guin biglaꞌx yuj o bigajpix beguiꞌxh ree ya, ¿wen zëjbidi lojx ya: “Guyu, gurej din gawil”? 8Ad zëjbtidi zian, guiëblidi: “Bachaa xabil, been ni gawan, gudaꞌn. Chi lox gawan guiëꞌ tëën dxel ma zajc gawil guiëꞌ tëël.” 9Abiꞌ wed niꞌqui quixtëë ad zudëëtidi lojx din cayüjnzix ni rayal güünx. 10Ziangajc lëjt chi loox güündi gra ni gunabee Dios dxel guiëbidi: “Nayajcan mojs ni ad rüjnt sirv, din baguieenzan ni rayal yaguieenan.”
Rayüjn Jesús chii ree bén rajc guialguijdx la lepra
11Chi ma cadxin Jesús Jerusalén, gudëdaman guiedx rigaꞌ ree niz Samaria në niz Galilea. 12Abiꞌ chi cayuman tijb luguiedx dobëz, bigchaagloj chii ree bén rajc guialguijdx la lepra laaman. Per zijt guzuj reeman, 13rbixdiaj reeman, rëb reeman:
―¡Jesús, Mextr, baya dunujn!
14Chi baguiaa Jesús laa reeman, rëbaman loj reeman:
―Gol chej loj ree bixhioz din guguiaa reeman lëjt.
Abiꞌ laꞌtgaj zë reeman, baya xcuerp reeman guialguijdx ni rajc reeman. 15Dxel tijbaman chi gogbeeman ma bayajcaman, bayejcaman, rbixdiajman rudëëman quixtëë loj Dios. 16Abiꞌ bazuxibaman loj Jesús, basajb lojman xt luyuj persi badëëman quixtëë lojman. Abiꞌ najman bén Samaria. 17Dxel rëb Jesús:
―¿Nid chii na̱j ree bén bayajc ya? ¿Con zagaa reeman? 18¿Tijbzi benzit guie bayejc ya rudëëman quixtëë loj Dios?
19Dxel rëbaman loj bén guin:
―Bisu. Baguiaj, ma bayajquil guial bililadxil naj.
Xhienaag guiꞌt xguialrniabee Dios
(Mt. 24:23‑28, 36‑41)
20Gunabdiidx ree bénfarisew loj Jesús goc guiꞌt xguialrniabee Dios, abiꞌ rëbaman:
―Xguialrniabee Dios ad najtan ni guguiaa bejn. 21Abiꞌ achut guiëb: “Laan zaꞌ guie”, o “Laan zaꞌ ni” ya, din xguialrniabee Dios mal zaꞌn galaydi.
22Dxel rëbaman loj ree xbejnman:
―Zadxin dxej guiëndi guguiaadi Bén guxhaal Dios majsi tibdxejzi, per ad zuguiaatidi laaman. 23Abiꞌ yuꞌ reeman na lëjt: “Laaman zaꞌ guie”, o “Laaman zaꞌ ni” ya, ad bal chinalidi laa reeman. 24Din ziꞌc chi rëꞌp nijs rulaan bachaꞌ guidib xanyabaa, zian gac chi guiꞌt Bén guxhaal Dios loj guidxliuj. 25Per yalojxgaj sagdiajman abiꞌ ad zënt ree bén rigaꞌ yan laaman. 26Ziꞌc goc gulal chi guban Noé, zian gac chi guiꞌt Bén guxhaal Dios. 27Din nadxel gudaw ree bejn, guꞌ reeman, baxhliaa reeman badëë tëë xiꞌn reeman baxhliaa xt chi bidxin dxej guyu Noé lën barcwroꞌ ni beenman, abiꞌ guzuloj guiadoxh ni bagüjt gra reeman. 28Ziangajc gojc chi guban bén brii laj Lot, gudaw ree bejn, guꞌ reeman, batoꞌ reeman, guzii reeman, guxübin reeman been tëë reeman yu ree. 29Per chi brii Lot luguiedx Sodoma, guzuloj biyajb guij xanyabaa në azufre, abiꞌ güjt gra reeman. 30Ziangajc gac dxej ni guiꞌt Bén guxhaal Dios.
31’Dxej ni gac zian, bén yëꞌp guijc yu ad zaguiajttaman chiglëë ni naguꞌman lënü. Abiꞌ bén zaꞌ dajn, ad zayejct lidxaman. 32Gol basaaladx ni guzac lacheel bén brii laj Lot. 33Bén mazri rën guialnaban rajpaman loj guidxliuj guie, zadxin dxej gunijtaman laan, per bén guiët por naj, zajpaman guialnaban tiblayaa con Dios.
34’Naj rni lëjt, guxhinzii lod nagaꞌ tioꞌp bejn tijbzi loj loon, tijbaman sa zatijbaman yayaꞌn. 35Guiáad lod cayojt tioꞌp ree béngunaa, tijbaman sa zatijbaman yayaꞌn. 36Abiꞌ lod zaꞌ tioꞌp ree xinguiaaw dajn, tijbix sa zatijbix yayaꞌn.
37Chi biguiejn ree xbejnman zian, rëb reeman:
―¿Ban guin, Dad?
Badxiꞌman laan rëbaman:
―Laa guiguien gajc ban guinan, ziꞌc chi radoꞌp ree golbich laa rguien gajc nagaꞌ tijb begüt.
Currently Selected:
San Lujc 17: zas
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.