YouVersion Logo
Search Icon

San Juan 13

13
Gudiib Jesús guiaꞌ ree xbejnman
1Guixiezi gal lanij pascw. Ma ragbee Jesús guial ma bidxin hor gusaꞌnman guidxliuj guie din yaguiaj loj xDadaman. Zianczi guyën ree xbejnman, bén rigaꞌ ree loj guidxliuj, rënman laa reeman goctëëz. 2-4Chi gad reeman gaw xche, mal badxeꞌ xindxab ni mal luxdoo Judas, xiꞌn Simón Iscariote, ma rüjnx xgab yayüx Jesús loj ree bén gugüjt laaman. Ragbee Jesús guial badëëd xDadaman gra guialrniabee lojman, laa tëëman guxhaal laaman, zeel yaguiajman lod zaꞌman. Laꞌtgaj cayaw reeman, bisuman xan mex, gulëëman tijb lajd najcwaman luya, dxel cwaꞌman tijb tuay guxhii xizaman. 5Abiꞌ badxeꞌman nijs loj tijb xijg, guzulojman caguiibaman guiaꞌ ree xbejnman, cucwiidx tëëman laan con tuay naxii xizaman. 6Chi bayal quiibaman guiaꞌ Simón, bén rniee reeman Bëd, rëbaman loj Jesús:
―Dad, ¿lüj quiib guiaꞌn ya?
7Badxiꞌman laan rëbaman:
―Ad rigniaꞌtil ni cayünan yan, per qui chigniaꞌrilan.
8Zeel rëb Bëd lojman:
―Ad zatiëëbtan quiibil guiaꞌn.
Abiꞌ rëb Jesús:
―Bal id zaguiiban guiaꞌl, ad zileꞌtri gaquil da bejnan.
9Zeel rëb Bëd lojman:
―Dad, ad bal guiaꞌzan quiibil, gudiib në yan con guican.
10Badxiꞌman laan rëbaman:
Bén goznejz guiaꞌzaman riaadx chëd, din guidibaman naya. Abiꞌ lëjt ma nayadi, majsi ad gratidi.
11Ma ragbeeman chu yayü laaman, zeel rëbaman: “Ad gratidi naya.”
12Chi gulox gudiibaman guiaꞌ reeman, bayajcw xabaman, gurejman xan mex guin zatijb, dxel rëbaman:
―¿Bigniaꞌdi ni benan ya? 13Rnieedi naj Mextr në Dad, waliquidi najn. 14Bal najn Mextr në Dad, gudiiban guiaꞌdi, ziangajc quiib guiaꞌ lasaꞌdi. 15Ma balün lëjt, din güündi ziꞌc benan. 16Diidxliczi ganin, achut mojs na̱j mazri guial loj bén rniabee laaman, achut bén riꞌt na̱j mazri guial loj bén rxhiaal laaman. 17Bal rigniaꞌdi nine güün tëëdan, yabaanë Dios lëjt.
18’Ad gratidi ruzatan ragbeen chu reenin gulen. Per rayal gac cumplid ni ca loj xtiidx Dios, rëban: “Bén rawnëꞌn tijbzi, bayejcaman contr naj.” 19Ma rugojnan lëjt din gagbeedi chi gac zian, din chililadxidi chu najn. 20Diidxliczi ganin, bén rucaagdiajg ni rëb bén rxhialan, najn rucaagdiajgaman, guiáad bén rucaagdiajg da diidxan, xtiidx bén guxhaal najn rucaagdiajgaman.
Bagojn Jesús chu yayü laaman
(Mt. 26:20‑25; Mr. 14:17‑21; Lc. 22:21‑23)
21Chi gulox gunee Jesús zian, dád guyunayaman, dxel rëbaman loj reeman zagdxe:
―Diidxliczi ganin, tijb lëjt yayü naj loj ree bén gugüjt naj.
22Dxel guzuloj ree xbejnman ruguiaa loj lasaꞌ reeman, niꞌquid ragbeet reeman chunin ruzaꞌtaman. 23Tijb bén guyën daꞌtaman zojb cwëꞌman, hor zii chi cayaw reeman xche, 24dxel been Bëd sen lojman din guiniabdiidxaman chunin ruzaꞌt Jesús. 25Zeel mazri gubigaman cwëꞌ Jesús gunabdiidxaman, rëbaman:
―Dad, ¿chunin?
26Badxiꞌ Jesúsan rëbaman:
―Gugajdxan taꞌn guiadxtil, din loj xin gudëdanan, laaxan yayü naj.
Dxel bagajdxaman taꞌn guiadxtil badëëman laan loj Judas, xiꞌn Simón Iscariote. 27Chi gudawixan, laa guyu gajc xindxab luxdoox. Zeel rëb Jesús lojx:
―Ni güünl, cari beenan.
28Per achutczi ree bén zojb xan mex guin bigniaꞌ chexc zeel rëbaman zian. 29Guial caꞌ Judas bols ni yuꞌ milia, zeel naladx garol reeman rëb Jesús lojx din chisiix ni gaw reeman lanij guin o gudëëdix taꞌnan loj ree bén rzagdiaj ya. 30Chi ma gudawix guiadxtil guin, dxel briix, ma guxhin.
Gunabee Jesús tijb nicüb
31Chi ma brii Judas, rëb Jesús loj ree xbejnman:
―Yan guien xguialrniabee Bén guxhaal Dios din gagbee ree bejn xhienaag na̱j guialrniabee gudëë Dios lojman. 32Din bal gulüü Bén guxhaal Dios xguialrniabee Dios, ziangajc gulüü Dios xguialrniabeeman, zeel ma gudëëdaman laan. 33Xiꞌn, ad zien dxejtri gazunëꞌn lëjt, yaguiilidi naj, per ziꞌcgajc rën loj ree bejn, ziangajc ganin lojdi yan: Ad zajct chedi lod gan. 34Ganin tijb nicüb ganabeen: Gol guyën lasaꞌdi ziꞌc rënan lëjt. 35Bal guiën lasaꞌdi, zian gagbee gra bejn guial najdi da bejnan.
Guiëb Bëd ad nünbeetaman Jesús
(Mt. 26:31‑35; Mr. 14:27‑31; Lc. 22:31‑34)
36Gunabdiidx Bëd loj Jesús rëbaman:
―Dad, ¿ban chel?
Zeel rëb Jesús:
―Ad zajct guidnalil naj lod gan yan, per zadxin dxej guidnalil naj.
37Zeel rëb Bëd:
―Dad, ¿chexc zeel ad zajct guidnaalan lüj yan? Xt zajc guiëtan por lüj.
38Badxiꞌ Jesúsan rëbaman:
―¿Walil ya rënl guiëtil por naj? Diidxliczi ganin, chi gad gui̱d cwidxaꞌ, mal rëbil choon volt, ad nünbeetil naj.

Currently Selected:

San Juan 13: zas

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy