LUKE 6

Sabbath Tingba ha Keteu kecu

(Mat. 12:1-8; Mrk. 2:23-28)

1 # Hez. 23:25. Pecai Sabbath nai pa luh kah gwang kezeu dau pe caisuime hereibuih ge nriap lu eh penui ba gage neuh nkak lü teila. 2Dede Phariseeme ge cu, “Daitei eh nnui Sabbath nai hezai kemakbe tei lano?” dedi.

3Ge Jisu cu, “Nnui David mzeu dige pa depai tei bi pei meni, pa nah pecu ngngwa kelame dung; 4#Lev. 24:9. #1 Sa. 21:1-6.pa dainzwa Tinggwang ki ga lüt eh nku kemcibe, cide cingkume gwale tyei la kemak de keu lü tyeibi nah pecu ngngwa kelame de peubi?” debeu.

5Nah pa rang si eh, “Mina Nabe Sabbath nai reu de Rampaube lie,” debeu.

Mina pe ba Ketsaime ge

(Mat. 12:9-14; Mrk. 3:1-6)

6Pecai kemtak tingba keda nai ge pa synagogue ga lüt mide ledeu bam ge, mina pe ba ketsaime ge cika bam. 7Nah Hezai kecime nah Phariseeme pa Sabbath nai mide tei myi zie mi lakbi pecu kwa bam, delü pe mau pei lu kera ziemne. 8Dede pa penui lung ci lü pe ba ketsaibe dade cu, “Aika gwang sap lulo” debeu. Ge pa cuh lü sap lu. 9Nah Jisu penui dade cu, “I nnui dade mage keteu zie; Sabbath nai makeyi tei kerabe mi makesia tei kera petau no, mide keli luzie mi daptset ti kerabe no?” debeu. 10Nah pa penui pelane de pie togwa gai eh peda de cu,#6:10. rang gai; laisiu kesa ga bam kesiu gai. “N ba nzang pet gailo,” debeu. Ge pa ciciu gaige pe ba yi dai lu.

11Dede penui penui rata süt ti, nah Jisu de teupwa depai tei dide yi zie bi mpau bam di.

Jisu Apostleme Kereikena de Kedetkelu

(Mat. 10:1-4; Mrk. 3:13-19)

12Pecai cidau pa kekie tei zie lie kideutuh reu gega hangh di; nah pa tingmuizie pelane kie mtak mene Tinggwang dade kie bam di. 13Nah tingba dige pa pe caisuime de qulu, nah cidung kak gade kereikena kedet lü penui zi apostleme lie eh msiak peu: 14Simon, (pa pezi Peter msiak kebeube) nah pe sinabe Andrew nah Jakob penai Johan, nah Philip nah Bartholomew, 15nah Matthi, nah Thomas, nah Alphaeus napei Jakob, nah Simon (pecu le Leuhkube lie qu kelabe), 16nah Jakob napei Judas, nah Judas Iscariot, pa kekamle bie tui kegaibe tei di.

Jisu Keledeu nah Teimmi kebeu

(Mat. 4:23-25)

17Nah pa apostleme ze ngngwa lu delü nghungh kideu kelangkie ga sap lu, nah mina maadi ge Judah nah Jerusalem nah duikuung ga kebam Tyre nah Sidon gade pe sam nking zie lie nah penui mateei tei myi lu zie lie gwang kap lu; 18nah mci kemak rabe dung ne keliangteu kelame dung de, ciciu eh penui ze tei myi lu. 19Nah mina maabe pecu deu gai zie lie eh peei ladi, kedanemene kenkieng peda de mpet eh penui de tei myi kap kebeu ne.

Samlam Pungtume nah Kemakme

(Mat. 5:1-12)

20Pa ngangcuh pe caisuime de pie eh rang eh cu,

“Nnui kegame samlam pungtu;

kedanemene Tinggwang kedi au nnui gulu!

21Nnui cu mzeu kelame samlam pungtu,

kedanemene nnui nggei lu zielu!

“Nnui cu hap kelame samlam pungtu,

kedanemene nnui nuih zielu!”

22“Mina Nabe ziemne mi nnui ze nkau nah nnui de cau nah nnui ze rang msia, nah nnui ze sia lie eh keu mpet tsam cai nnui samlam pungtu lie!#1 Pe. 4:14. 23Cipau nai nnui sui yilu, nah nnui suiyi eh nsuhng lu, kedanemene ainie, tinggim ga nnui ziehi au dih süt zielu; kedanemene penui paome de caihasam kecime de ciciu gwang delu.”#2 Hl. 36:16; Bat. 7:52.

24“Dede co, nnui cu keheime,

nnui nnui sui keyi ting ngau luda!

25Co, nnui cu nggei kebamme;

nnui mzeu dizie!

Co, nnui cu nuih kebamme;

nnui sui sia nah hap zie!”

26“Co, nnui, mi nnui ze rang mmi kelame dung; penui paome de kenret caihasam kecime dede ciciu gwang da.”

Ngauraume ze Hung lulo

(Mat. 5:38-48; 7:12)

27“Dede I nnui kingnei kelame dage rang zeu, nnui ngauraume de hung lu, nnui ze nneu kelame dage makeyi tei gailu, 28nnui ze reset kelame de samlam beulu, nah nnui ze rang kemsiame ziemne kie lu, 29N bia ket lam kepoi kecu bede kedale de nreu beu lo; nah mige n pai keu cai n mcua de peu laklie helo. 30Mina keheibe de nda de kie kelame de peu lo, nah mi n gunia keukelame dade keteu dai so. 31#Mat. 7:12.Nang peu mide nda ge tei gai keneube penui dage cinzwa tei gailu.

32“Nang mi ncu ku la kelame de rünne ku la cai n keyi depai no? Kedanemene kemaume de mi penui ze ku kelame de ku lalu. 33Nah nang mi nda ge keyi tei gai kelame dage rünne keyi tei gaila cai n keyi cide depai no? Kemaume de cikenzwa tei lalu. 34Nah nang penui dade ngau dai lu kera kenlumme de repok peu la cai n keyi cide depai no? Kemaume de kemaume de repok peu la, cii kieege ngau dai lu kerane. 35Dede nnui ngauraume de hung lu, nah makeyi de tei lu nah ngau dai lu kera cet mene repok de beulu; ciciu lu cai nnui ziehi dih süt zie; nah nnui Hutube name tei luzie; kedanemene pa au mide twaneu la kemakme nah kesia keteime dade de pezai yi lalu. 36Nnui Pei mide ngaunggia kecu nzwa eh nnui de mide ngaunggia lulo.

Mimau Kepeei

(Mat. 7:1-5)

37“Mimau pei so, ciciu de mmau de peeilak, mide mmau so, ciciu de ncu de mmau lak; mimau gi beu ciciu de n mau de gi beuzie; 38peu lo, ciciu de ncu de peu zie; mdet kemmyi, nimkentip, hecung kehekwa, nah puih kenliem de si eh nnui pai gage dom beuzie. Kedanemene nang mdet kebeu de cipau mdet de ngau dai zie kecune.”

39 # Mat. 15:14. Pa samgwa gede penui dage rang si eh, “Mikcietme gene mikcietme ge lampui sau lubui ni? Penai hang nana hekoki ga cak miedi lakni? 40#Mat. 10:24,25; Jhn. 13:16; 15:20.Ledeukelube au pe keledeube swa dima: dede pecu ledeu cang kebeu caine pe keledeube nzwa dizie. 41Nang daitei n sinabe mik ga herah keceuna de pie lano, dede n mik ga tsingloa kebam de cet la meno? 42Mede nang dainzwa n sinabe dade cu, ‘A sinabo, peu acu n mik ga herah de keu mpet di lo’ de eh rang lulai, nangbe nkatei n mik ga tsingloa kebam de pie mene. Nang hezaitei kelabo, n mik gade tsingloa be keu mpet rai dilu, nah ciciu de nang n sinabe mik ga herah na de keu mpet kera ngau ncigi luzie.

Tsingbang nah Petsi

(Mat. 7:16-20; 12:33-35)

43“Tsingbang keyibe petsi kesia buih lama, mede tsingbang kesiabe petsi keyi buih lama: 44#Mat. 12:33. kedanemene tsingbang gede au petsi gade ci lula kelane. Migede hetuubang gade nzüttsi rai lu lama, mede müntiakbang gade kubetsi rai lu lama. 45#Mat. 12:34.Mina keyime pelung mabam keyi gade makeyi keu mpet la; nah mina kesiame de pelung gade makesia keu mpet la: kedanemene pelung ga kebambe pemui rangpet kelane. Kedanemene pe mlung ga puih kebambe pemui gade rangpet lalu.

Ki Kena Keteibe

(Mat. 7:24-27)

46“Nnui daitei eh I rang kebeube tei mene acu, ‘Rampaubo, Rampaubo’ de qu lano? 47Mina keheibe de ada gwang eh a sam kingnei nah cidung de mzai kelabe, pa depai nzwa bi I nnui dage keulia zie. 48Pa au mige ki ge tei kebam nzwa pa su ncuk lu delü tsura reu gage pebang dualu; ciciu eh duidi cu eh kereuki be lwamie cide sam de tei kelai luma, kedanemene cide tei ntip süt kedine. 49Dede kingnei lude tei mzai la kemakbe au mige pe bangdua mene kideu reu gage ki tei kelube nzwa delie; cide de kereuki ne lwamie sam ge zette cide kau di, nah ki cide pekap dizu lie!”

Currently Selected:

LUKE 6: ZemeNB

Highlight

Copy