KHABÊNG 7

Jodông lûm

1Ediko Teso ma Noah nâng ngatwah, “Nê humte tangkâ heh phangtang khhôankho khhen ko wãngen; Ngãma hahtokkhoh phangtang ko nang lôlôbã toangtang moatlem moatte khẽ ekĩ. 2Nang demko nîem jũnko ngemsâ jat wah chentô wah jut engit ru sietwên oh, epa nyũ alã chendanga, ngãle nîem jũnko ngemchin jat hehwah mĩn juttheh ru sietwên oh, epamĩn nyũ alã chendanga, 3ngãle rangkho wah wõ hehwah mĩn jut engit ru kepwên oh, epamĩn apõng anyõng chendanga. Aroh mo oh, eroh kobã thinma hahtokkhoh ko lidîen lahma engak jat aja a. 4Thejâma jâengit diko Ngãma hahtokkhoh ko rangpat epatthuk ang, epa ngih roakbelîî penroak belîî epat a, epa Ngãma chentô ahînte jat hôantek heh hahtokkhoh kowah phangtang mahsiet rãng patthuk ekãng.” 5Ngãle Noah ma Teso ma chenroh chîentah a eroh moat wah.

6Chenthû hahtokkhoh pa jodông ma lũmtah poatko Noah châ erok rangpâ dâng wah. 7#Mt 24.38-39; Luk 17.27Ate ngãle ate tangnyũ, ngãle ate chha dela chha heh ediko thin tangnyũ heh jodông lûm wah pêrãng khhôankho khhen ko johwâng wah. 8Ediko ngem angah ngãle wõchhũ wõchha hehwah chentô jatwah nîem jũnko angek jat wah mĩn ngãle asâjat wah mĩn nyũ alã, 9chenroh Joban ma chîentah a eroh Noah demko khhôankho ko johwâng wah. 10Phûmma jâengit diko hahtokkhoh ko jodông lûmhok wah.

11 # 2Pet 3.6 Chenthû Noah châ erok rangpâ dângko, khhadi dâjeng wah, echhi jâengit jâko, jokhô jatkhô adongdong heh hahkhhen wah rapjên wênwah, ngãle rangkhhethung wah rangpat patkat rãng pongkâ kâsek heh laang rêwah. 12ngãle hahtokkhoh ko rangpat pa ngihroak belîî penroak belîî patwah. 13Erejâ rangwô ko Noah ngãle ate tangnyũ, thin chha dela chha wãrem Shem, Ham, ngãle Japheth, ediko thin tangnyũ heh demko nyupwâng wah. 14thin demko chentô jat wũnngem angah, chentô jat hum nyem achhah, ediko hahtokkhoh wah chentô jat ngemchhũ ngahchha, chentô jat wõ, ngãle chentô rangwîn jat. 15Ediko chentô ahînte jat hehwah nyũ alã Noah demko khhôankho khhen ko johwâng wah. 16Joban ma chenroh chîentah a eroh wângwah. Ediko Teso ma Noah ngema kâsek pa sekwah.

17Jodông ma hahtokkhoh ko jâroak belîî lûm wah, ngãle jo pa khhôankho lânphô roh lûwah. 18Jo pa jênglũ lũjâ lûwah, ngãle ephûmma khhôankho pa jo khoh ko phôwah. 19Ngãle jo pa atôlû dâng wah hahkõng chõang thhôan pamĩn mahlûm wah. 20Jodông pumma hahkõng kho pa roaknîî phut bengâ chôangma lûmwah. 21Hahtokkhoh wah chentô hînte jat heh phangtang ritwah —chentô wõchhũ wõchha heh, chentô ngem angah heh, ngãle chentô mihnyãn nyũchha heh ritwah. 22Hahtokkhoh wah chentô rek ahõng hõng apa ritwah. 23Teso ma hahtokkhoh wah chentô ahînte jat heh phangtang ritphê wah —mihnyãn nyũchha, ngem angah, ngemchhũ ngahchha, ngãle rangkho wah wõ heh phangtang hahtokkhoh wah mahsiet wah. Phûmma Noah lôlôbã pêwah, ngãle ate demwah khhôankho kowah heh pẽ rêwah. 24Jo pa châtheh roak bengâ rangwô hahtokkhoh wah larup ma dâng wah.

Currently Selected:

KHABÊNG 7: Nokte

Highlight

Copy