YouVersion Logo
Search Icon

John 15

15
1మ సాసీ ఆంగూరేర్ ఝాడ్. మార్ బాప్ బాగెర్ మాలీక్.
2మార్మా ఫళ్ లాగేనీజే హర్యేక్ వేలేన ఊ కాణ్ణాకన్ బగాదచ. ఫళ్ లాగజకో హర్యేక్ వేల్ ఉజ్జీ జాదా ఫళ్ లాగ్ణోకన్, ఓర్మా రజే కామ్ దేనీజే వేలేవున కాణ్ణాకచ.
3మ తమేన కోజకో వాతేర్ కార్ణే తమ్ ఆబ పవిత్తర్ వేన్ ఛో
4మార్మా కాటో టకన్ రో. తమార్మా మ సదా టకన్ రూఁచుఁ. వేల్ అంగూరేర్ ఝాడేమా రత్తోజ్, ఓర్ ఊజ్ కూఁఫళ్ లాగెనీకో, హన్నూజ్ మార్మాఁయి నరోతో తమ్ సదా ఫళ్ దోనీ.
5మ అంగూరేర్ ఝాడ్. తమ్ వేలే, కూణ్ మార్మా థమన్ రచకో మ కేర్మాఁయి థమన్ రూఁచుఁ కో, ఊ ఘణ్ ఫళ్ దచ. మాతీ నాళీరేన్ తమ్ కాఁయిఁ సదా కర్సకోనీ.
6కుణీ వతోయి మార్మాయిఁ థమన్ నరతో ఓన వేలేర్ నైఁ బార ఫేంకాదచ. ఊ సుకాజావచ. మన్క్యా అసేన గోళాకరన్ ఆంగారేమా ఫెంక్దచ ఓ బళ్ జావచ.
7మార్మా తమన్, తమార్మా మార్వాతే ఘట్ వేన్ రతో, తమేనకాఁయి ఖాతర్కో మాంగో. ఊ తమేన మళచ.
8తమ్ వార్సేక్ ఫళ్ లాగో జేర్ కార్ణే మార్ బాపేన మహిమా ఆవచ. ఏర్ కార్ణే తమ్ మార్ చేలా వేజావొచో.
9బాప్ మన కూఁ ప్రేమ్ కీదోచ కో, మ సదా తమేన హన్నూజ్ ప్రేమ్ కిదో. మార్ ప్రేమేమా థమ్మన్ రో.
10మ మార్ బాపేర్ హకమేన పక్డన్ చాలన్, ఓర్ ప్రేమేమా రూఁ జేర్ నైఁ తమ్ సదా మార్ హకమేర్ నైఁ చాలోతో, మార్ ప్రేమేమా థమన్ రోచో.
11తమార్మా మార్ ఖుషీ రేణో కనన్ తమార్ ఖుషీ భర్పూర్ వేజావ్ణో కన్ ఏ వాతే తమేన కేరోంచుఁ
12మ తమేన ప్రేమ కిదో జూంజ్ తమ్ సదా ఏకేన ఏక్ ప్రేమ్ కర్ణో కన్ కజకోజ్ మార్ హకమ్.
13ఓర్ దోస్తి దారే వాస ఓర్ జాన్ దేవాళేతీ జాదా ప్రేమ్ కరేవాళో కుణీ ఛెని.
14మ తమేన దూఁజే హకమేన పక్డన్ చాలోతో, తమ్ మార్ దోస్తీ దార్ వేన్ రోచో.
15బాఁయాఁ ఓర్ మాలక్ కరజేన మాలమ్ కర్లేనీ. జేతి అబ్బెతీ తమేన బాఁయాఁకన్ బలావునీ పణ్, దోస్తీదార్ కన్ బలారోఁచుఁ, కసెన కతో మ మార్ బాపే కన సామ్ళో జకో వాతేసే తమేన మాలమ్ కీదో.
16తమ్ మన నియమ్ కర్లిదెకొని. తమ్ మార్ నామేపర్ బాపేన కాఁయిఁ మాంగోచోకో, ఓన ఊ తమేన దజుఁ తమ్ జాన్ ఫళ్ లాగేనన్ తమార్ ఫళ్ థమన్ రజుఁ మ తమేన కూంత్లేన్ నియంకీదో.
17తమ్ ఏకేన ఏక్ ప్రేమ్ కర్ణో కన్ తమేన హకమ్ దేరోంచుఁ.
18జగ్ తమేన ఖోటో కరతో తమార్ ఆంగజ్ మన ఖోటోకీదే కన్ తమేన మాలమ్.
19తమ్ ఏ లోకేర్ సంబంధీ వేన్ రేవొతో జగ్ ఓర్ వాళేన ప్రేమ్ కరచ; పణ్ తమ్ ఏ లోకేర్ సంబంధీ కోని; మ తమేన ఏ లోకే మాఁయిఁతీ టాళ్ళీదో; జేతీజ్ జగ్ తమేన ద్వేష్ కరచ.
20బాఁయాఁ ఓర్ మాలకేతీ మోటో కొని కన్ మ తమేన కోజకో వాత్ హార్దే లీయావో. ఏ లోకేర్ ఆద్మీ మన భావేటి ఘాలతో తమేన సదా బావేటి ఘాలచ. ఓ మార్ వాతే న దలేమా లేలతో తమార్ వాతేన సదా దలేమా లేలచ.
21పణ్ ఓ మన మేలోజేన వళ్కేనీ. జేతి మార్ నామేర్ వాస ఏసేన తమేన కరచ.
22మ ఆన్ ఉందేన బోధ నకీదోవుఁతో ఉందేన పాప్ రేతోకొని. అబ్బతో ఉందేర్ పాపేన. మాఫీ ఛేని.
23మన ద్వేష్ కరెవాళో మార్ బాపేన సదా ద్వేష్ కరచ.
24కుణీ సదా కర్సేని జకో కావతే ఉందేర్ వచ్చ నకీదోవుఁతో ఉందేన పాప్ రేతోకొని. అబ్బ వతో ఓ మనన్ మార్ బాపేన సదా దేకన్ ద్వేష్ అర్రేచ.
25పణ్ - ఓ మన కారణ్ ఛేనిజుఁ ద్వేష్ కీదే కన్ ఉందేర్ ధరంశాస్త్రేమా లక్మేలెజకో వాత్ పూర్వజుఁ హన్నూహుయో.
26బాపె కన్నెతీ నిక్ళజకో సత్తేర్ స్వరూపేర్ ఆత్మా ఆవజనా ఊ మార్ కార్ణే గవాయి దచ.
27తమ్ ఆగ్డీతీ మార్ కన్న రేజకోఛో జేతి తమ్ సదా గవాయి దోచో.

Currently Selected:

John 15: Lambadi

Highlight

Share

Copy

None

Want to have your highlights saved across all your devices? Sign up or sign in